๑๐. ทุติยอุปฺปาทสุตฺตํ

๕๓๐. ‘‘ปญฺจิมานิ, ภิกฺขเว, อินฺทฺริยานิ ภาวิตานิ พหุลีกตานิ อนุปฺปนฺนานิ อุปฺปชฺชนฺติ, นาญฺญตฺร สุคตวินยา. กตมานิ ปญฺจ? สทฺธินฺทฺริยํ, วีริยินฺทฺริยํ, สตินฺทฺริยํ, สมาธินฺทฺริยํ, ปญฺญินฺทฺริยํ – อิมานิ โข, ภิกฺขเว, ปญฺจินฺทฺริยานิ ภาวิตานิ พหุลีกตานิ อนุปฺปนฺนานิ อุปฺปชฺชนฺติ, นาญฺญตฺร สุคตวินยา’’ติ. ทสมํ.

สูกรขตวคฺโค ฉฏฺโฐ.

ตสฺสุทฺทานํ –

สาลํ มลฺลิกํ เสโข จ, ปทํ สารํ ปติฏฺฐิตํ;

พฺรหฺมสูกรขตาโย, อุปฺปาทา อปเร ทุเวติ.