๗. ปฐมอามกธญฺญเปยฺยาลวคฺโค

๑. อญฺญตฺรสุตฺตํ

๑๑๓๑. อถ โข ภควา ปริตฺตํ นขสิขายํ ปํสุํ อาโรเปตฺวา ภิกฺขู อามนฺเตสิ – ‘‘ตํ กึ มญฺญถ, ภิกฺขเว, กตมํ นุ โข พหุตรํ – โย วายํ มยา ปริตฺโต นขสิขายํ ปํสุ อาโรปิโต, อยํ วา มหาปถวี’’ติ? ‘‘เอตเทว, ภนฺเต, พหุตรํ, ยทิทํ – มหาปถวี; อปฺปมตฺตกายํ ภควตา ปริตฺโต นขสิขายํ ปํสุ อาโรปิโต. สงฺขมฺปิ น อุเปติ, อุปนิธมฺปิ น อุเปติ, กลภาคมฺปิ น อุเปติ มหาปถวึ อุปนิธาย ภควตา ปริตฺโต นขสิขายํ ปํสุ อาโรปิโต’’ติ.

‘‘เอวเมว โข, ภิกฺขเว, อปฺปมตฺตกา เต สตฺตา เย มนุสฺเสสุ ปจฺจาชายนฺติ; อถ โข เอเตว พหุตรา สตฺตา เย อญฺญตฺร มนุสฺเสหิ [มนุสฺเสสุ (ปี. ก.)] ปจฺจาชายนฺติ. ตํ กิสฺส เหตุ? อทิฏฺฐตฺตา, ภิกฺขเว, จตุนฺนํ อริยสจฺจานํ. กตเมสํ จตุนฺนํ? ทุกฺขสฺส อริยสจฺจสฺส…เป… ทุกฺขนิโรธคามินิยา ปฏิปทาย อริยสจฺจสฺส’’.

‘‘ตสฺมาติห, ภิกฺขเว, ‘อิทํ ทุกฺข’นฺติ โยโค กรณีโย…เป… ‘อยํ ทุกฺขนิโรธคามินี ปฏิปทา’ติ โยโค กรณีโย’’ติ. ปฐมํ.

๒. ปจฺจนฺตสุตฺตํ

๑๑๓๒. อถ โข ภควา ปริตฺตํ นขสิขายํ ปํสุํ อาโรเปตฺวา ภิกฺขู อามนฺเตสิ – ‘‘ตํ กึ มญฺญถ, ภิกฺขเว, กตมํ นุ โข พหุตรํ – โย วายํ มยา ปริตฺโต นขสิขายํ ปํสุ อาโรปิโต, อยํ วา มหาปถวี’’ติ? ‘‘เอตเทว, ภนฺเต, พหุตรํ, ยทิทํ – มหาปถวี; อปฺปมตฺตกายํ ภควตา ปริตฺโต นขสิขายํ ปํสุ อาโรปิโต. สงฺขมฺปิ น อุเปติ, อุปนิธมฺปิ น อุเปติ, กลภาคมฺปิ น อุเปติ มหาปถวึ อุปนิธาย ภควตา ปริตฺโต นขสิขายํ ปํสุ อาโรปิโต’’ติ.

‘‘เอวเมว โข, ภิกฺขเว, อปฺปมตฺตกา เต สตฺตา เย มชฺฌิเมสุ ชนปเทสุ ปจฺจาชายนฺติ; อถ โข เอเตว พหุตรา สตฺตา เย ปจฺจนฺติเมสุ ชนปเทสุ ปจฺจาชายนฺติ อวิญฺญาตาเรสุ มิลกฺเขสุ [มิลกฺขูสุ (สฺยา. กํ. ก.)] …เป…. ทุติยํ.

๓. ปญฺญาสุตฺตํ

๑๑๓๓. … ‘‘เอวเมว โข, ภิกฺขเว, อปฺปกา เต สตฺตา เย ปน อริเยน ปญฺญาจกฺขุนา สมนฺนาคตา; อถ โข เอเตว พหุตรา สตฺตา เย อวิชฺชาคตา สมฺมุฬฺหา…เป…. ตติยํ.

๔. สุราเมรยสุตฺตํ

๑๑๓๔. … ‘‘เอวเมว โข, ภิกฺขเว, อปฺปกา เต สตฺตา เย สุราเมรยมชฺชปฺปมาทฏฺฐานา ปฏิวิรตา; อถ โข เอเตว พหุตรา สตฺตา เย สุราเมรยมชฺชปฺปมาทฏฺฐานา อปฏิวิรตา…เป…. จตุตฺถํ.

๕. โอทกสุตฺตํ

๑๑๓๕. … ‘‘เอวเมว โข, ภิกฺขเว, อปฺปกา เต สตฺตา เย ถลชา; อถ โข เอเตว พหุตรา สตฺตา เย อุทกชา. ตํ กิสฺส เหตุ…เป…. ปญฺจมํ.

๖. มตฺเตยฺยสุตฺตํ

๑๑๓๖. … ‘‘เอวเมว โข, ภิกฺขเว, อปฺปกา เต สตฺตา เย มตฺเตยฺยา; อถ โข เอเตว พหุตรา สตฺตา เย อมตฺเตยฺยา…เป…. ฉฏฺฐํ.

๗. เปตฺเตยฺยสุตฺตํ

๑๑๓๗. … ‘‘เอวเมว โข, ภิกฺขเว, อปฺปกา เต สตฺตา เย เปตฺเตยฺยา; อถ โข เอเตว พหุตรา สตฺตา เย อเปตฺเตยฺยา…เป…. สตฺตมํ.

๘. สามญฺญสุตฺตํ

๑๑๓๘. … ‘‘เอวเมว โข, ภิกฺขเว, อปฺปกา เต สตฺตา เย สามญฺญา; อถ โข เอเตว พหุตรา สตฺตา เย อสามญฺญา…เป…. อฏฺฐมํ.

๙. พฺรหฺมญฺญสุตฺตํ

๑๑๓๙. … ‘‘เอวเมว โข, ภิกฺขเว, อปฺปกา เต สตฺตา เย พฺรหฺมญฺญา; อถ โข เอเตว พหุตรา สตฺตา เย อพฺรหฺมญฺญา…เป…. นวมํ.

๑๐. ปจายิกสุตฺตํ

๑๑๔๐. … ‘‘เอวเมว โข, ภิกฺขเว, อปฺปกา เต สตฺตา เย กุเล เชฏฺฐาปจายิโน; อถ โข เอเตว พหุตรา สตฺตา เย กุเล อเชฏฺฐาปจายิโนติ [อกุเล เชฏฺฐาปจายิโนติ (สฺยา. กํ.)] …เป…. ทสมํ.

ปฐมอามกธญฺญเปยฺยาลวคฺโค สตฺตโม.

ตสฺสุทฺทานํ –

อญฺญตฺร ปจฺจนฺตํ ปญฺญา, สุราเมรยโอทกา;

มตฺเตยฺย เปตฺเตยฺยา จาปิ, สามญฺญํ พฺรหฺมปจายิกนฺติ.