๑๒. วจฺฉโคตฺตสํยุตฺตํ

๑. รูปอญฺญาณสุตฺตํ

๖๐๗. เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเม. อถ โข วจฺฉโคตฺโต ปริพฺพาชโก เยน ภควา เตนุปสงฺกมิ; อุปสงฺกมิตฺวา ภควตา สทฺธึ สมฺโมทิ. สมฺโมทนียํ กถํ สารณียํ วีติสาเรตฺวา เอกมนฺตํ นิสีทิ. เอกมนฺตํ นิสินฺโน โข วจฺฉโคตฺโต ปริพฺพาชโก ภควนฺตํ เอตทโวจ – ‘‘โก นุ โข, โภ โคตม, เหตุ, โก ปจฺจโย, ยานิมานิ [เยนิมานิ (?)] อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา, อนฺตวา โลโกติ วา, อนนฺตวา โลโกติ วา, ตํ ชีวํ ตํ สรีรนฺติ วา, อญฺญํ ชีวํ อญฺญํ สรีรนฺติ วา, โหติ ตถาคโต ปรํ มรณาติ วา, น โหติ ตถาคโต ปรํ มรณาติ วา, โหติ จ น จ โหติ ตถาคโต ปรํ มรณาติ วา, เนว โหติ น น โหติ ตถาคโต ปรํ มรณาติ วา’’ติ? ‘‘รูเป โข, วจฺฉ, อญฺญาณา, รูปสมุทเย อญฺญาณา, รูปนิโรเธ อญฺญาณา, รูปนิโรธคามินิยา ปฏิปทาย อญฺญาณา; เอวมิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วาติ. อยํ โข, วจฺฉ, เหตุ, อยํ ปจฺจโย, ยานิมานิ [เยน (สี.), เยนิมานิ (?)] อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วา’’ติ. ปฐมํ.

๒. เวทนาอญฺญาณสุตฺตํ

๖๐๘. สาวตฺถินิทานํ. เอกมนฺตํ นิสินฺโน โข วจฺฉโคตฺโต ปริพฺพาชโก ภควนฺตํ เอตทโวจ – ‘‘โก นุ โข, โภ โคตม, เหตุ, โก ปจฺจโย, ยานิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วา’’ติ? ‘‘เวทนาย โข, วจฺฉ, อญฺญาณา, เวทนาสมุทเย อญฺญาณา, เวทนานิโรเธ อญฺญาณา, เวทนานิโรธคามินิยา ปฏิปทาย อญฺญาณา; เอวมิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วาติ. อยํ โข, วจฺฉ, เหตุ, อยํ ปจฺจโย, ยานิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วา’’ติ. ทุติยํ.

๓. สญฺญาอญฺญาณสุตฺตํ

๖๐๙. สาวตฺถินิทานํ. เอกมนฺตํ นิสินฺโน โข วจฺฉโคตฺโต ปริพฺพาชโก ภควนฺตํ เอตทโวจ – ‘‘โก นุ โข, โภ โคตม, เหตุ, โก ปจฺจโย, ยานิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วา’’ติ? ‘‘สญฺญาย โข, วจฺฉ, อญฺญาณา, สญฺญาสมุทเย อญฺญาณา, สญฺญานิโรเธ อญฺญาณา, สญฺญานิโรธคามินิยา ปฏิปทาย อญฺญาณา; เอวมิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วาติ. อยํ โข, วจฺฉ, เหตุ, อยํ ปจฺจโย, ยานิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วา’’ติ. ตติยํ.

๔. สงฺขารอญฺญาณสุตฺตํ

๖๑๐. สาวตฺถินิทานํ. เอกมนฺตํ นิสินฺโน โข วจฺฉโคตฺโต ปริพฺพาชโก ภควนฺตํ เอตทโวจ – ‘‘โก นุ โข, โภ โคตม, เหตุ, โก ปจฺจโย, ยานิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วา’’ติ? ‘‘สงฺขาเรสุ โข, วจฺฉ, อญฺญาณา, สงฺขารสมุทเย อญฺญาณา, สงฺขารนิโรเธ อญฺญาณา, สงฺขารนิโรธคามินิยา ปฏิปทาย อญฺญาณา; เอวมิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วาติ. อยํ โข, วจฺฉ, เหตุ, อยํ ปจฺจโย, ยานิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วา’’ติ. จตุตฺถํ.

๕. วิญฺญาณอญฺญาณสุตฺตํ

๖๑๑. สาวตฺถินิทานํ. เอกมนฺตํ นิสินฺโน โข วจฺฉโคตฺโต ปริพฺพาชโก ภควนฺตํ เอตทโวจ – ‘‘โก นุ โข, โภ โคตม, เหตุ, โก ปจฺจโย, ยานิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา …เป… เนว โหติ น น โหติ ตถาคโต ปรํ มรณาติ วา’’ติ? ‘‘วิญฺญาเณ โข, วจฺฉ, อญฺญาณา, วิญฺญาณสมุทเย อญฺญาณา, วิญฺญาณนิโรเธ อญฺญาณา, วิญฺญาณนิโรธคามินิยา ปฏิปทาย อญฺญาณา; เอวมิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วาติ. อยํ โข, วจฺฉ, เหตุ, อยํ ปจฺจโย, ยานิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วา’’ติ. ปญฺจมํ.

๖-๑๐. รูปอทสฺสนาทิสุตฺตปญฺจกํ

๖๑๒-๖๑๖. สาวตฺถินิทานํ. เอกมนฺตํ นิสินฺโน โข วจฺฉโคตฺโต ปริพฺพาชโก ภควนฺตํ เอตทโวจ – ‘‘โก นุ โข, โภ โคตม, เหตุ, โก ปจฺจโย, ยานิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วา’’ติ? รูเป โข, วจฺฉ, อทสฺสนา…เป… รูปนิโรธคามินิยา ปฏิปทาย อทสฺสนา…เป… เวทนาย … สญฺญาย … สงฺขาเรสุ โข, วจฺฉ, อทสฺสนา…เป… วิญฺญาเณ โข, วจฺฉ, อทสฺสนา…เป… วิญฺญาณนิโรธคามินิยา ปฏิปทาย อทสฺสนา…เป…. ทสมํ.

๑๑-๑๕. รูปอนภิสมยาทิสุตฺตปญฺจกํ

๖๑๗-๖๒๑. สาวตฺถินิทานํ. รูเป โข, วจฺฉ, อนภิสมยา…เป… รูปนิโรธคามินิยา ปฏิปทาย อนภิสมยา…เป….

สาวตฺถินิทานํ. เวทนาย โข, วจฺฉ, อนภิสมยา…เป….

สาวตฺถินิทานํ. สญฺญาย โข, วจฺฉ, อนภิสมยา…เป….

สาวตฺถินิทานํ. สงฺขาเรสุ โข, วจฺฉ, อนภิสมยา…เป….

สาวตฺถินิทานํ. วิญฺญาเณ โข, วจฺฉ, อนภิสมยา…เป…. ปนฺนรสมํ.

๑๖-๒๐. รูปอนนุโพธาทิสุตฺตปญฺจกํ

๖๒๒-๖๒๖. สาวตฺถินิทานํ. เอกมนฺตํ นิสินฺโน โข วจฺฉโคตฺโต ปริพฺพาชโก ภควนฺตํ เอตทโวจ – โก นุ โข, โภ โคตม, เหตุ, โก ปจฺจโย…เป… รูเป โข, วจฺฉ, อนนุโพธา…เป… รูปนิโรธคามินิยา ปฏิปทาย อนนุโพธา…เป….

สาวตฺถินิทานํ. เวทนาย โข, วจฺฉ…เป….

สาวตฺถินิทานํ. สญฺญาย โข, วจฺฉ…เป….

สาวตฺถินิทานํ. สงฺขาเรสุ โข, วจฺฉ…เป….

สาวตฺถินิทานํ. วิญฺญาเณ โข, วจฺฉ อนนุโพธา…เป… วิญฺญาณนิโรธคามินิยา ปฏิปทาย อนนุโพธา. วีสติมํ.

๒๑-๒๕. รูปอปฺปฏิเวธาทิสุตฺตปญฺจกํ

๖๒๗-๖๓๑. สาวตฺถินิทานํ. โก นุ โข, โภ โคตม, เหตุ, โก ปจฺจโย…เป…. รูเป โข, วจฺฉ, อปฺปฏิเวธา…เป… วิญฺญาเณ โข, วจฺฉ, อปฺปฏิเวธา…เป…. ปญฺจวีสติมํ.

๒๖-๓๐. รูปอสลฺลกฺขณาทิสุตฺตปญฺจกํ

๖๓๒-๖๓๖. สาวตฺถินิทานํ. รูเป โข, วจฺฉ, อสลฺลกฺขณา…เป… วิญฺญาเณ โข, วจฺฉ, อสลฺลกฺขณา…เป…. ตึสติมํ.

๓๑-๓๕. รูปอนุปลกฺขณาทิสุตฺตปญฺจกํ

๖๓๗-๖๔๑. สาวตฺถินิทานํ. รูเป โข, วจฺฉ, อนุปลกฺขณา…เป… วิญฺญาเณ โข, วจฺฉ, อนุปลกฺขณา…เป…. ปญฺจตึสติมํ.

๓๖-๔๐. รูปอปฺปจฺจุปลกฺขณาทิสุตฺตปญฺจกํ

๖๔๒-๖๔๖. สาวตฺถินิทานํ. รูเป โข, วจฺฉ, อปฺปจฺจุปลกฺขณา…เป… วิญฺญาเณ โข, วจฺฉ, อปฺปจฺจุปลกฺขณา…เป…. จตฺตาลีสมํ.

๔๑-๔๕. รูปอสมเปกฺขณาทิสุตฺตปญฺจกํ

๖๔๗-๖๕๑. สาวตฺถินิทานํ. รูเป โข, วจฺฉ, อสมเปกฺขณา…เป… วิญฺญาเณ โข, วจฺฉ, อสมเปกฺขณา…เป…. ปญฺจจตฺตาลีสมํ.

๔๖-๕๐. รูปอปฺปจฺจุเปกฺขณาทิสุตฺตปญฺจกํ

๖๕๒-๖๕๖. สาวตฺถินิทานํ. รูเป โข, วจฺฉ, อปฺปจฺจุเปกฺขณา…เป… วิญฺญาเณ โข, วจฺฉ, อปฺปจฺจุเปกฺขณา…เป…. ปญฺญาสมํ.

๕๑-๕๔. รูปอปฺปจฺจกฺขกมฺมาทิสุตฺตจตุกฺกํ

๖๕๗-๖๖๐. สาวตฺถินิทานํ. อถ โข วจฺฉโคตฺโต ปริพฺพาชโก เยน ภควา เตนุปสงฺกมิ; อุปสงฺกมิตฺวา ภควตา สทฺธึ สมฺโมทิ. สมฺโมทนียํ กถํ สารณียํ วีติสาเรตฺวา เอกมนฺตํ นิสีทิ. เอกมนฺตํ นิสินฺโน โข วจฺฉโคตฺโต ปริพฺพาชโก ภควนฺตํ เอตทโวจ – ‘‘โก นุ โข, โภ โคตม, เหตุ, โก ปจฺจโย, ยานิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วา’’ติ? รูเป โข, วจฺฉ, อปฺปจฺจกฺขกมฺมา, รูปสมุทเย อปฺปจฺจกฺขกมฺมา, รูปนิโรเธ อปฺปจฺจกฺขกมฺมา, รูปนิโรธคามินิยา ปฏิปทาย อปฺปจฺจกฺขกมฺมา…เป….

สาวตฺถินิทานํ. เวทนาย โข, วจฺฉ, อปฺปจฺจกฺขกมฺมา…เป… เวทนานิโรธคามินิยา ปฏิปทาย อปฺปจฺจกฺขกมฺมา…เป….

สาวตฺถินิทานํ. สญฺญาย โข, วจฺฉ, อปฺปจฺจกฺขกมฺมา…เป… สญฺญานิโรธคามินิยา ปฏิปทาย อปฺปจฺจกฺขกมฺมา…เป….

สาวตฺถินิทานํ. สงฺขาเรสุ โข, วจฺฉ, อปฺปจฺจกฺขกมฺมา…เป… สงฺขารนิโรธคามินิยา ปฏิปทาย อปฺปจฺจกฺขกมฺมา…เป…. จตุปญฺญาสมํ.

๕๕. วิญฺญาณอปฺปจฺจกฺขกมฺมสุตฺตํ

๖๖๑. สาวตฺถินิทานํ. ‘‘วิญฺญาเณ โข, วจฺฉ, อปฺปจฺจกฺขกมฺมา, วิญฺญาณสมุทเย อปฺปจฺจกฺขกมฺมา, วิญฺญาณนิโรเธ อปฺปจฺจกฺขกมฺมา, วิญฺญาณนิโรธคามินิยา ปฏิปทาย อปฺปจฺจกฺขกมฺมา; เอวมิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา…เป… เนว โหติ น น โหติ ตถาคโต ปรํ มรณาติ วาติ. อยํ โข, วจฺฉ, เหตุ, อยํ ปจฺจโย, ยานิมานิ อเนกวิหิตานิ ทิฏฺฐิคตานิ โลเก อุปฺปชฺชนฺติ – สสฺสโต โลโกติ วา, อสสฺสโต โลโกติ วา, อนฺตวา โลโกติ วา, อนนฺตวา โลโกติ วา, ตํ ชีวํ ตํ สรีรนฺติ วา, อญฺญํ ชีวํ อญฺญํ สรีรนฺติ วา, โหติ ตถาคโต ปรํ มรณาติ วา, น โหติ ตถาคโต ปรํ มรณาติ วา, โหติ จ น จ โหติ ตถาคโต ปรํ มรณาติ วา, เนว โหติ น น โหติ ตถาคโต ปรํ มรณาติ วา’’ติ. ปญฺจปญฺญาสมํ.

วจฺฉโคตฺตสํยุตฺตํ สมตฺตํ.