๑๒. ธมฺมทินฺนาเถรีคาถา

๑๒. ‘‘ฉนฺทชาตา อวสายี, มนสา จ ผุฏา [ผุฏฺฐา (สฺยา.), ผุฐา (สี. อฏฺฐ.)] สิยา;

กาเมสุ อปฺปฏิพทฺธจิตฺตา [อปฺปฏิพนฺธจิตฺตา (ก.)], อุทฺธํโสตาติ วุจฺจตี’’ติ [อุทฺธํโสตา วิมุจฺจตีติ (สี. ปี.)].

… ธมฺมทินฺนา เถรี….

๑๓.วิสาขาเถรีคาถา

๑๓. ‘‘กโรถ พุทฺธสาสนํ, ยํ กตฺวา นานุตปฺปติ;

ขิปฺปํ ปาทานิ โธวิตฺวา, เอกมนฺเต นิสีทถา’’ติ.

… วิสาขา เถรี….

๑๔.สุมนาเถรีคาถา

๑๔. ‘‘ธาตุโย ทุกฺขโต ทิสฺวา, มา ชาตึ ปุนราคมิ;

ภเว ฉนฺทํ วิราเชตฺวา, อุปสนฺตา จริสฺสสี’’ติ.

… สุมนา เถรี….