๖. อภิรูปนนฺทาเถรีอปทานํ

๑๔๓. ‘‘เอกนวุติโต กปฺเป, วิปสฺสี นาม นายโก;

อุปฺปชฺชิ จารุทสฺสโน, สพฺพธมฺเมสุ จกฺขุมา.

๑๔๔. ‘‘ตทาหํ พนฺธุมติยํ, อิทฺเธ ผีเต มหากุเล;

ชาตา สุรูปา ทยิตา, ปูชนียา ชนสฺส จ.

๑๔๕. ‘‘อุปคนฺตฺวา มหาวีรํ, วิปสฺสึ โลกนายกํ;

ธมฺมํ สุณิตฺวา สรณํ, อุเปสึ นรนายกํ.

๑๔๖. ‘‘สีเลสุ สํวุตา หุตฺวา, นิพฺพุเต จ นรุตฺตเม;

ธาตุถูปสฺส อุปริ, โสณฺณจฺฉตฺตมปูชยึ.

๑๔๗. ‘‘มุตฺตจาคา สีลวตี, ยาวชีวํ ตโต จุตา;

ชหิตฺวา มานุสํ เทหํ, ตาวตึสูปคา อหํ.

๑๔๘. ‘‘ตทา ทสหิ ฐาเนหิ, อธิโภตฺวาน เสสเก [อธิโภตฺวา อเสสโต (สฺยา.)];

รูปสทฺเทหิ คนฺเธหิ, รเสหิ ผุสเนหิ จ.

๑๔๙. ‘‘อายุนาปิ จ วณฺเณน, สุเขน ยสสาปิ จ;

ตเถวาธิปเตยฺเยน, อธิคยฺห วิโรจหํ.

๑๕๐. ‘‘ปจฺฉิเม จ ภเว ทานิ, ชาตาหํ กปิลวฺหเย;

ธีตา เขมกสกฺกสฺส, นนฺทา นามาติ วิสฺสุตา.

๑๕๑. ‘‘อภิรูปสมฺปทมฺปิ [อภิรุปํ อุปปทํ (สี.), อภิรุปํ อุปฺปาทํ (ปี.)], อหุ เม กนฺติสูจกํ;

ยทาหํ โยพฺพนปฺปตฺตา, รูปลาวญฺญภูสิตา.

๑๕๒. ‘‘ตทา [ตทา มมตฺถํ (สี.), อิธ มมตฺเต (สฺยา. ก.)] มตฺเถ สกฺยานํ, วิวาโท สุมหา อหุ;

ปพฺพาเชสิ ตโต ตาโต, มา สกฺยา วินสฺสึสุติ.

๑๕๓. ‘‘ปพฺพชิตฺวา ตถาคตํ, รูปเทสฺสึ นรุตฺตมํ;

สุตฺวาน โนปคจฺฉามิ, มม รูเปน คพฺพิตา.

๑๕๔. ‘‘โอวาทมฺปิ น คจฺฉามิ, พุทฺธทสฺสนภีรุตา;

ตทา ชิโน อุปาเยน, อุปเนตฺวา สสนฺติกํ.

๑๕๕. ‘‘ติสฺสิตฺถิโย [ติสฺโส ถีโย (สี. ปี.)] นิทสฺเสสิ, อิทฺธิยา มคฺคโกวิโท;

อจฺฉรารูปสทิสํ, ตรุณึ ชริตํ [ชริกํ (สฺยา. ก.)] มตํ.

๑๕๖. ‘‘ตาโย ทิสฺวา สุสํวิคฺคา, วิรตฺตาเส กเฬวเร;

อฏฺฐาสึ ภวนิพฺพินฺทา, ตทา มํ อาห นายโก.

๑๕๗. ‘‘‘อาตุรํ อสุจึ ปูตึ, ปสฺส นนฺเท สมุสฺสยํ;

อุคฺฆรนฺตํ ปคฺฆรนฺตํ, พาลานํ อภินนฺทิตํ.

๑๕๘. ‘‘‘อสุภาย จิตฺตํ ภาเวหิ, เอกคฺคํ สุสมาหิตํ;

ยถา อิทํ ตถา เอตํ, ยถา เอตํ ตถา อิทํ.

๑๕๙. ‘‘‘เอวเมตํ อเวกฺขนฺตี, รตฺตินฺทิวมตนฺทิตา;

ตโต สกาย ปญฺญาย, อภินิพฺพิชฺฌ วจฺฉสิ’.

๑๖๐. ‘‘ตสฺสา เม อปฺปมตฺตาย, วิจรนฺติยา [วิจรนฺตฺวาธ (สี.), วิจินนฺตีธ (สฺยา. ปี.)] โยนิโส;

ยถาภูตํ อยํ กาโย, ทิฏฺโฐ สนฺตรพาหิโร.

๑๖๑. ‘‘อถ นิพฺพินฺทหํ กาเย, อชฺฌตฺตญฺจ วิรชฺชหํ;

อปฺปมตฺตา วิสํยุตฺตา, อุปสนฺตามฺหิ นิพฺพุตา.

๑๖๒. ‘‘อิทฺธีสุ จ วสี โหมิ, ทิพฺพาย โสตธาตุยา;

เจโตปริยญาณสฺส, วสี โหมิ มหามุเน.

๑๖๓. ‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;

สพฺพาสวปริกฺขีณา, นตฺถิ ทานิ ปุนพฺภโว.

๑๖๔. ‘‘อตฺถธมฺมนิรุตฺตีสุ, ปฏิภาเน ตเถว จ;

ญาณํ มม มหาวีร, อุปฺปนฺนํ ตว สนฺติเก.

๑๖๕. ‘‘กิเลสา ฌาปิตา มยฺหํ…เป… วิหรามิ อนาสวา.

๑๖๖. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๖๗. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อภิรูปนนฺทา ภิกฺขุนี อิมา คาถาโย อภาสิตฺถาติ.

อภิรูปนนฺทาเถริยาปทานํ ฉฏฺฐํ.