๑๓. สิริมณฺฑตฺเถรคาถา

๔๔๗. [อุทา. ๔๕; จูฬว. ๓๘๕; ปริ. ๓๓๙] ‘‘ฉนฺนมติวสฺสติ, วิวฏํ นาติวสฺสติ;

ตสฺมา ฉนฺนํ วิวเรถ, เอวํ ตํ นาติวสฺสติ.

๔๔๘. [สํ. นิ. ๑.๖๖; เนตฺติ. ๑๘] ‘‘มจฺจุนาพฺภหโต โลโก, ชราย ปริวาริโต;

ตณฺหาสลฺเลน โอติณฺโณ, อิจฺฉาธูปายิโต สทา.

๔๔๙. ‘‘มจฺจุนาพฺภหโต โลโก, ปริกฺขิตฺโต ชราย จ;

หญฺญติ นิจฺจมตฺตาโณ, ปตฺตทณฺโฑว ตกฺกโร.

๔๕๐. ‘‘อาคจฺฉนฺตคฺคิขนฺธาว, มจฺจุ พฺยาธิ ชรา ตโย;

ปจฺจุคฺคนฺตุํ พลํ นตฺถิ, ชโว นตฺถิ ปลายิตุํ.

๔๕๑. ‘‘อโมฆํ ทิวสํ กยิรา, อปฺเปน พหุเกน วา;

ยํ ยํ วิชหเต [วิรหเต (สี. ปี.), วิวหเต (สฺยา.)] รตฺตึ, ตทูนํ ตสฺส ชีวิตํ.

๔๕๒. ‘‘จรโต ติฏฺฐโต วาปิ, อาสีนสยนสฺส วา;

อุเปติ จริมา รตฺติ, น เต กาโล ปมชฺชิตุ’’นฺติ.

… สิริมณฺโฑ [สิริมนฺโท (สี.)] เถโร….