๑. มหากสฺสปตฺเถรคาถา

๑๐๕๔. ‘‘น คเณน ปุรกฺขโต จเร, วิมโน โหติ สมาธิ ทุลฺลโภ;

นานาชนสงฺคโห ทุโข, อิติ ทิสฺวาน คณํ น โรจเย.

๑๐๕๕. ‘‘น กุลานิ อุปพฺพเช มุนิ, วิมโน โหติ สมาธิ ทุลฺลโภ;

โส อุสฺสุกฺโก รสานุคิทฺโธ, อตฺถํ ริญฺจติ โย สุขาวโห.

๑๐๕๖. ‘‘ปงฺโกติ หิ นํ อเวทยุํ, ยายํ วนฺทนปูชนา กุเลสุ;

สุขุมํ สลฺล ทุรุพฺพหํ, สกฺกาโร กาปุริเสน ทุชฺชโห.

๑๐๕๗. ‘‘เสนาสนมฺหา โอรุยฺห, นครํ ปิณฺฑาย ปาวิสึ;

ภุญฺชนฺตํ ปุริสํ กุฏฺฐึ, สกฺกจฺจํ ตํ อุปฏฺฐหึ.

๑๐๕๘. ‘‘โส เม [ตํ (สี. ก.)] ปกฺเกน หตฺเถน, อาโลปํ อุปนามยิ;

อาโลปํ ปกฺขิปนฺตสฺส, องฺคุลิ เจตฺถ [เปตฺถ (สี. ก.)] ฉิชฺชถ.

๑๐๕๙. ‘‘กุฏฺฏมูลญฺจ [กุฑฺฑมูลญฺจ (สี. สฺยา.)] นิสฺสาย, อาโลปํ ตํ อภุญฺชิสํ;

ภุญฺชมาเน วา ภุตฺเต วา, เชคุจฺฉํ เม น วิชฺชติ.

๑๐๖๐. ‘‘อุตฺติฏฺฐปิณฺโฑ อาหาโร, ปูติมุตฺตญฺจ โอสธํ;

เสนาสนํ รุกฺขมูลํ, ปํสุกูลญฺจ จีวรํ;

ยสฺเสเต อภิสมฺภุตฺวา [อภิภุญฺชติ (?)], ส เว จาตุทฺทิโส นโร.

๑๐๖๑. ‘‘ยตฺถ เอเก วิหญฺญนฺติ, อารุหนฺตา สิลุจฺจยํ;

ตสฺส พุทฺธสฺส ทายาโท, สมฺปชาโน ปติสฺสโต;

อิทฺธิพเลนุปตฺถทฺโธ, กสฺสโป อภิรูหติ.

๑๐๖๒. ‘‘ปิณฺฑปาตปฏิกฺกนฺโต, เสลมารุยฺห กสฺสโป;

ฌายติ อนุปาทาโน, ปหีนภยเภรโว.

๑๐๖๓. ‘‘ปิณฺฑปาตปฏิกฺกนฺโต, เสลมารุยฺห กสฺสโป;

ฌายติ อนุปาทาโน, ฑยฺหมาเนสุ นิพฺพุโต.

๑๐๖๔. ‘‘ปิณฺฑปาตปฏิกฺกนฺโต, เสลมารุยฺห กสฺสโป;

ฌายติ อนุปาทาโน, กตกิจฺโจ อนาสโว.

๑๐๖๕. ‘‘กเรริมาลาวิตตา, ภูมิภาคา มโนรมา;

กุญฺชราภิรุทา รมฺมา, เต เสลา รมยนฺติ มํ.

๑๐๖๖. ‘‘นีลพฺภวณฺณา รุจิรา, วาริสีตา สุจินฺธรา;

อินฺทโคปกสญฺฉนฺนา, เต เสลา รมยนฺติ มํ.

๑๐๖๗. ‘‘นีลพฺภกูฏสทิสา, กูฏาคารวรูปมา;

วารณาภิรุทา รมฺมา, เต เสลา รมยนฺติ มํ.

๑๐๖๘. ‘‘อภิวุฏฺฐา รมฺมตลา, นคา อิสิภิ เสวิตา;

อพฺภุนฺนทิตา สิขีหิ, เต เสลา รมยนฺติ มํ.

๑๐๖๙. ‘‘อลํ ฌายิตุกามสฺส, ปหิตตฺตสฺส เม สโต;

อลํ เม อตฺถกามสฺส [อตฺตกามสฺส (?)], ปหิตตฺตสฺส ภิกฺขุโน.

๑๐๗๐. ‘‘อลํ เม ผาสุกามสฺส, ปหิตตฺตสฺส ภิกฺขุโน;

อลํ เม โยคกามสฺส, ปหิตตฺตสฺส ตาทิโน.

๑๐๗๑. ‘‘อุมาปุปฺเผน สมานา, คคนาวพฺภฉาทิตา;

นานาทิชคณากิณฺณา, เต เสลา รมยนฺติ มํ.

๑๐๗๒. ‘‘อนากิณฺณา คหฏฺเฐหิ, มิคสงฺฆนิเสวิตา;

นานาทิชคณากิณฺณา, เต เสลา รมยนฺติ มํ.

๑๐๗๓. ‘‘อจฺโฉทิกา ปุถุสิลา, โคนงฺคุลมิคายุตา;

อมฺพุเสวาลสญฺฉนฺนา, เต เสลา รมยนฺติ มํ.

๑๐๗๔. ‘‘น ปญฺจงฺคิเกน ตุริเยน, รติ เม โหติ ตาทิสี;

ยถา เอกคฺคจิตฺตสฺส, สมฺมา ธมฺมํ วิปสฺสโต.

๑๐๗๕. ‘‘กมฺมํ พหุกํ น การเย, ปริวชฺเชยฺย ชนํ น อุยฺยเม;

อุสฺสุกฺโก โส รสานุคิทฺโธ, อตฺถํ ริญฺจติ โย สุขาวโห.

๑๐๗๖. ‘‘กมฺมํ พหุกํ น การเย, ปริวชฺเชยฺย อนตฺตเนยฺยเมตํ;

กิจฺฉติ กาโย กิลมติ, ทุกฺขิโต โส สมถํ น วินฺทติ.

๑๐๗๗. ‘‘โอฏฺฐปฺปหตมตฺเตน, อตฺตานมฺปิ น ปสฺสติ;

ปตฺถทฺธคีโว จรติ, อหํ เสยฺโยติ มญฺญติ.

๑๐๗๘. ‘‘อเสยฺโย เสยฺยสมานํ, พาโล มญฺญติ อตฺตานํ;

น ตํ วิญฺญู ปสํสนฺติ, ปตฺถทฺธมานสํ นรํ.

๑๐๗๙. ‘‘โย จ เสยฺโยหมสฺมีติ, นาหํ เสยฺโยติ วา ปน;

หีโน ตํสทิโส [ตีโนหํ สทิโส (สฺยา.)] วาติ, วิธาสุ น วิกมฺปติ.

๑๐๘๐. ‘‘ปญฺญวนฺตํ ตถา ตาทึ, สีเลสุ สุสมาหิตํ;

เจโตสมถมนุตฺตํ, ตญฺเจ วิญฺญู ปสํสเร.

๑๐๘๑. ‘‘ยสฺส สพฺรหฺมจารีสุ, คารโว นูปลพฺภติ;

อารกา โหติ สทฺธมฺมา, นภโต ปุถวี ยถา.

๑๐๘๒. ‘‘เยสญฺจ หิริ โอตฺตปฺปํ, สทา สมฺมา อุปฏฺฐิตํ;

วิรูฬฺหพฺรหฺมจริยา เต, เตสํ ขีณา ปุนพฺภวา.

๑๐๘๓. ‘‘อุทฺธโต จปโล ภิกฺขุ, ปํสุกูเลน ปารุโต;

กปีว สีหจมฺเมน, น โส เตนุปโสภติ.

๑๐๘๔. ‘‘อนุทฺธโต อจปโล, นิปโก สํวุตินฺทฺริโย;

โสภติ ปํสุกูเลน, สีโหว คิริคพฺภเร.

๑๐๘๕. ‘‘เอเต สมฺพหุลา เทวา, อิทฺธิมนฺโต ยสสฺสิโน;

ทสเทวสหสฺสานิ, สพฺเพ เต พฺรหฺมกายิกา.

๑๐๘๖. ‘‘ธมฺมเสนาปตึ วีรํ, มหาฌายึ สมาหิตํ;

สาริปุตฺตํ นมสฺสนฺตา, ติฏฺฐนฺติ ปญฺชลีกตา.

๑๐๘๗. ‘‘‘นโม เต ปุริสาชญฺญ, นโม เต ปุริสุตฺตม;

ยสฺส เต นาภิชานาม, ยมฺปิ นิสฺสาย ฌายติ [ฌายสิ (ก. อฏฺฐ.)].

๑๐๘๘. ‘‘‘อจฺเฉรํ วต พุทฺธานํ, คมฺภีโร โคจโร สโก;

เย มยํ นาภิชานาม, วาลเวธิสมาคตา’.

๑๐๘๙. ‘‘ตํ ตถา เทวกาเยหิ, ปูชิตํ ปูชนารหํ;

สาริปุตฺตํ ตทา ทิสฺวา, กปฺปินสฺส สิตํ อหุ.

๑๐๙๐. ‘‘ยาวตา พุทฺธเขตฺตมฺหิ, ฐปยิตฺวา มหามุนึ;

ธุตคุเณ วิสิฏฺโฐหํ, สทิโส เม น วิชฺชติ.

๑๐๙๑. ‘‘ปริจิณฺโณ มยา สตฺถา, กตํ พุทฺธสฺส สาสนํ;

โอหิโต ครุโก ภาโร, นตฺถิ ทานิ ปุนพฺภโว.

๑๐๙๒. ‘‘น จีวเร น สยเน, โภชเน นุปลิมฺปติ;

โคตโม อนปฺปเมยฺโย, มุฬาลปุปฺผํ วิมลํว;

อมฺพุนา เนกฺขมฺมนินฺโน, ติภวาภินิสฺสโฏ.

๑๐๙๓. ‘‘สติปฏฺฐานคีโว โส, สทฺธาหตฺโถ มหามุนิ;

ปญฺญาสีโส มหาญาณี, สทา จรติ นิพฺพุโต’’ติ.

… มหากสฺสโป เถโร….

จตฺตาลีสนิปาโต นิฏฺฐิโต.