๙. อนุรุทฺธตฺเถรคาถา

๘๙๒. ‘‘ปหาย มาตาปิตโร, ภคินี ญาติภาตโร;

ปญฺจ กามคุเณ หิตฺวา, อนุรุทฺโธว ฌายตุ.

๘๙๓. ‘‘สเมโต นจฺจคีเตหิ, สมฺมตาฬปฺปโพธโน;

น เตน สุทฺธิมชฺฌคํ [สุทฺธมชฺฌคา (สี. ก.), สุทฺธิมชฺฌคมา (สฺยา.)], มารสฺส วิสเย รโต.

๘๙๔. ‘‘เอตญฺจ สมติกฺกมฺม, รโต พุทฺธสฺส สาสเน;

สพฺโพฆํ สมติกฺกมฺม, อนุรุทฺโธว ฌายติ.

๘๙๕. ‘‘รูปา สทฺทา รสา คนฺธา, โผฏฺฐพฺพา จ มโนรมา;

เอเต จ สมติกฺกมฺม, อนุรุทฺโธว ฌายติ.

๘๙๖. ‘‘ปิณฺฑปาตปฏิกฺกนฺโต, เอโก อทุติโย มุนิ;

เอสติ ปํสุกูลานิ, อนุรุทฺโธ อนาสโว.

๘๙๗. ‘‘วิจินี อคฺคหี โธวิ, รชยี ธารยี มุนิ;

ปํสุกูลานิ มติมา, อนุรุทฺโธ อนาสโว.

๘๙๘. ‘‘มหิจฺโฉ จ อสนฺตุฏฺโฐ, สํสฏฺโฐ โย จ อุทฺธโต;

ตสฺส ธมฺมา อิเม โหนฺติ, ปาปกา สํกิเลสิกา.

๘๙๙. ‘‘สโต จ โหติ อปฺปิจฺโฉ, สนฺตุฏฺโฐ อวิฆาตวา;

ปวิเวกรโต วิตฺโต, นิจฺจมารทฺธวีริโย.

๙๐๐. ‘‘ตสฺส ธมฺมา อิเม โหนฺติ, กุสลา โพธิปกฺขิกา;

อนาสโว จ โส โหติ, อิติ วุตฺตํ มเหสินา.

๙๐๑. ‘‘มม สงฺกปฺปมญฺญาย, สตฺถา โลเก อนุตฺตโร;

มโนมเยน กาเยน, อิทฺธิยา อุปสงฺกมิ.

๙๐๒. ‘‘ยทา เม อหุ สงฺกปฺโป, ตโต อุตฺตริ เทสยิ;

นิปฺปปญฺจรโต พุทฺโธ, นิปฺปปญฺจมเทสยิ.

๙๐๓. ‘‘ตสฺสาหํ ธมฺมมญฺญาย, วิหาสึ สาสเน รโต;

ติสฺโส วิชฺชา อนุปฺปตฺตา, กตํ พุทฺธสฺส สาสนํ.

๙๐๔. ‘‘ปญฺจปญฺญาสวสฺสานิ, ยโต เนสชฺชิโก อหํ;

ปญฺจวีสติวสฺสานิ, ยโต มิทฺธํ สมูหตํ.

๙๐๕. [ที. นิ. ๒.๒๒๒] ‘‘นาหุ อสฺสาสปสฺสาสา, ฐิตจิตฺตสฺส ตาทิโน;

อเนโช สนฺติมารพฺภ, จกฺขุมา ปรินิพฺพุโต.

๙๐๖. [ที. นิ. ๒.๒๒๒] ‘‘อสลฺลีเนน จิตฺเตน, เวทนํ อชฺฌวาสยิ;

ปชฺโชตสฺเสว นิพฺพานํ, วิโมกฺโข เจตโส อหุ.

๙๐๗. ‘‘เอเต ปจฺฉิมกา ทานิ, มุนิโน ผสฺสปญฺจมา;

นาญฺเญ ธมฺมา ภวิสฺสนฺติ, สมฺพุทฺเธ ปรินิพฺพุเต.

๙๐๘. ‘‘นตฺถิ ทานิ ปุนาวาโส, เทวกายสฺมิ ชาลินิ;

วิกฺขีโณ ชาติสํสาโร, นตฺถิ ทานิ ปุนพฺภโว.

๙๐๙. ‘‘ยสฺส มุหุตฺเตน สหสฺสธา, โลโก สํวิทิโต สพฺรหฺมกปฺโป;

วสี อิทฺธิคุเณ จุตูปปาเต, กาเล ปสฺสติ เทวตา ส ภิกฺขุ [สภิกฺขุโน (สี. ก.)].

๙๑๐. ‘‘อนฺนภาโร [อนฺนหาโร (สี.)] ปุเร อาสึ, ทลิทฺโท ฆาสหารโก;

สมณํ ปฏิปาเทสึ, อุปริฏฺฐํ ยสสฺสินํ.

๙๑๑. ‘‘โสมฺหิ สกฺยกุเล ชาโต, อนุรุทฺโธติ มํ วิทู;

อุเปโต นจฺจคีเตหิ, สมฺมตาฬปฺปโพธโน.

๙๑๒. ‘‘อถทฺทสาสึ สมฺพุทฺธํ, สตฺถารํ อกุโตภยํ;

ตสฺมึ จิตฺตํ ปสาเทตฺวา, ปพฺพชึ อนคาริยํ.

๙๑๓. ‘‘ปุพฺเพนิวาสํ ชานามิ, ยตฺถ เม วุสิตํ ปุเร;

ตาวตึเสสุ เทเวสุ, อฏฺฐาสึ สกฺกชาติยา [สตชาติยา (สี.)].

๙๑๔. ‘‘สตฺตกฺขตฺตุํ มนุสฺสินฺโท, อหํ รชฺชมการยึ;

จาตุรนฺโต วิชิตาวี, ชมฺพุสณฺฑสฺส อิสฺสโร;

อทณฺเฑน อสตฺเถน, ธมฺเมน อนุสาสยึ.

๙๑๕. ‘‘อิโต สตฺต ตโต สตฺต, สํสารานิ จตุทฺทส;

นิวาสมภิชานิสฺสํ, เทวโลเก ฐิตา ตทา.

๙๑๖. ‘‘ปญฺจงฺคิเก สมาธิมฺหิ, สนฺเต เอโกทิภาวิเต;

ปฏิปฺปสฺสทฺธิลทฺธมฺหิ, ทิพฺพจกฺขุ วิสุชฺฌิ เม.

๙๑๗. ‘‘จุตูปปาตํ ชานามิ, สตฺตานํ อาคตึ คตึ;

อิตฺถภาวญฺญถาภาวํ, ฌาเน ปญฺจงฺคิเก ฐิโต.

๙๑๘. ‘‘ปริจิณฺโณ มยา สตฺถา…เป… ภวเนตฺติ สมูหตา.

๙๑๙. ‘‘วชฺชีนํ เวฬุวคาเม, อหํ ชีวิตสงฺขยา;

เหฏฺฐโต เวฬุคุมฺพสฺมึ, นิพฺพายิสฺสํ อนาสโว’’ติ.

… อนุรุทฺโธ เถโร….