๑๐. ปาราปริยตฺเถรคาถา

๙๒๐. สมณสฺส อหุ จินฺตา, ปุปฺผิตมฺหิ มหาวเน;

เอกคฺคสฺส นิสินฺนสฺส, ปวิวิตฺตสฺส ฌายิโน.

๙๒๑. ‘‘อญฺญถา โลกนาถมฺหิ, ติฏฺฐนฺเต ปุริสุตฺตเม;

อิริยํ อาสิ ภิกฺขูนํ, อญฺญถา ทานิ ทิสฺสติ.

๙๒๒. ‘‘สีตวาตปริตฺตานํ, หิริโกปีนฉาทนํ;

มตฺตฏฺฐิยํ อภุญฺชึสุ, สนฺตุฏฺฐา อิตรีตเร.

๙๒๓. ‘‘ปณีตํ ยทิ วา ลูขํ, อปฺปํ วา ยทิ วา พหุํ;

ยาปนตฺถํ อภุญฺชึสุ, อคิทฺธา นาธิมุจฺฉิตา.

๙๒๔. ‘‘ชีวิตานํ ปริกฺขาเร, เภสชฺเช อถ ปจฺจเย;

น พาฬฺหํ อุสฺสุกา อาสุํ, ยถา เต อาสวกฺขเย.

๙๒๕. ‘‘อรญฺเญ รุกฺขมูเลสุ, กนฺทราสุ คุหาสุ จ;

วิเวกมนุพฺรูหนฺตา, วิหํสุ ตปฺปรายนา.

๙๒๖. ‘‘นีจา นิวิฏฺฐา สุภรา, มุทู อตฺถทฺธมานสา;

อพฺยาเสกา อมุขรา, อตฺถจินฺตา วสานุคา.

๙๒๗. ‘‘ตโต ปาสาทิกํ อาสิ, คตํ ภุตฺตํ นิเสวิตํ;

สินิทฺธา เตลธาราว, อโหสิ อิริยาปโถ.

๙๒๘. ‘‘สพฺพาสวปริกฺขีณา, มหาฌายี มหาหิตา;

นิพฺพุตา ทานิ เต เถรา, ปริตฺตา ทานิ ตาทิสา.

๙๒๙. ‘‘กุสลานญฺจ ธมฺมานํ, ปญฺญาย จ ปริกฺขยา;

สพฺพาการวรูเปตํ, ลุชฺชเต ชินสาสนํ.

๙๓๐. ‘‘ปาปกานญฺจ ธมฺมานํ, กิเลสานญฺจ โย อุตุ;

อุปฏฺฐิตา วิเวกาย, เย จ สทฺธมฺมเสสกา.

๙๓๑. ‘‘เต กิเลสา ปวฑฺฒนฺตา, อาวิสนฺติ พหุํ ชนํ;

กีฬนฺติ มญฺเญ พาเลหิ, อุมฺมตฺเตหิว รกฺขสา.

๙๓๒. ‘‘กิเลเสหาภิภูตา เต, เตน เตน วิธาวิตา;

นรา กิเลสวตฺถูสุ, สสงฺคาเมว โฆสิเต.

๙๓๓. ‘‘ปริจฺจชิตฺวา สทฺธมฺมํ, อญฺญมญฺเญหิ ภณฺฑเร;

ทิฏฺฐิคตานิ อเนฺวนฺตา, อิทํ เสยฺโยติ มญฺญเร.

๙๓๔. ‘‘ธนญฺจ ปุตฺตํ ภริยญฺจ, ฉฑฺฑยิตฺวาน นิคฺคตา;

กฏจฺฉุภิกฺขเหตูปิ, อกิจฺฉานิ นิเสวเร.

๙๓๕. ‘‘อุทราวเทหกํ ภุตฺวา, สยนฺตุตฺตานเสยฺยกา;

กถํ วตฺเตนฺติ [กถา วฑฺเฒนฺติ (สี. ก.)] ปฏิพุทฺธา, ยา กถา สตฺถุครหิตา.

๙๓๖. ‘‘สพฺพการุกสิปฺปานิ, จิตฺตึ กตฺวาน [จิตฺตีกตฺวาน (สี.), จิตฺตํ กตฺวาน (สฺยา.)] สิกฺขเร;

อวูปสนฺตา อชฺฌตฺตํ, สามญฺญตฺโถติ อจฺฉติ [ติริญฺจติ (?)].

๙๓๗. ‘‘มตฺติกํ เตลจุณฺณญฺจ, อุทกาสนโภชนํ;

คิหีนํ อุปนาเมนฺติ, อากงฺขนฺตา พหุตฺตรํ.

๙๓๘. ‘‘ทนฺตโปนํ กปิตฺถญฺจ, ปุปฺผํ ขาทนิยานิ จ;

ปิณฺฑปาเต จ สมฺปนฺเน, อมฺเพ อามลกานิ จ.

๙๓๙. ‘‘เภสชฺเชสุ ยถา เวชฺชา, กิจฺจากิจฺเจ ยถา คิหี;

คณิกาว วิภูสายํ, อิสฺสเร ขตฺติยา ยถา.

๙๔๐. ‘‘เนกติกา วญฺจนิกา, กูฏสกฺขี อปาฏุกา;

พหูหิ ปริกปฺเปหิ, อามิสํ ปริภุญฺชเร.

๙๔๑. ‘‘เลสกปฺเป ปริยาเย, ปริกปฺเปนุธาวิตา;

ชีวิกตฺถา อุปาเยน, สงฺกฑฺฒนฺติ พหุํ ธนํ.

๙๔๒. ‘‘อุปฏฺฐาเปนฺติ ปริสํ, กมฺมโต โน จ ธมฺมโต;

ธมฺมํ ปเรสํ เทเสนฺติ, ลาภโต โน จ อตฺถโต.

๙๔๓. ‘‘สงฺฆลาภสฺส ภณฺฑนฺติ, สงฺฆโต ปริพาหิรา;

ปรลาโภปชีวนฺตา, อหิรีกา น ลชฺชเร.

๙๔๔. ‘‘นานุยุตฺตา ตถา เอเก, มุณฺฑา สงฺฆาฏิปารุตา;

สมฺภาวนํเยวิจฺฉนฺติ, ลาภสกฺการมุจฺฉิตา.

๙๔๕. ‘‘เอวํ นานปฺปยาตมฺหิ, น ทานิ สุกรํ ตถา;

อผุสิตํ วา ผุสิตุํ, ผุสิตํ วานุรกฺขิตุํ.

๙๔๖. ‘‘ยถา กณฺฏกฏฺฐานมฺหิ, จเรยฺย อนุปาหโน;

สตึ อุปฏฺฐเปตฺวาน, เอวํ คาเม มุนี จเร.

๙๔๗. ‘‘สริตฺวา ปุพฺพเก โยคี, เตสํ วตฺตมนุสฺสรํ;

กิญฺจาปิ ปจฺฉิโม กาโล, ผุเสยฺย อมตํ ปทํ.

๙๔๘. ‘‘อิทํ วตฺวา สาลวเน, สมโณ ภาวิตินฺทฺริโย;

พฺราหฺมโณ ปรินิพฺพายี, อิสิ ขีณปุนพฺภโว’’ติ.

… ปาราปริโย [ปาราสริโย (สฺยา.)] เถโร….

วีสตินิปาโต นิฏฺฐิโต.