๖. ปราภวสุตฺตํ

เอวํ เม สุตํ – เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเม. อถ โข อญฺญตรา เทวตา อภิกฺกนฺตาย รตฺติยา อภิกฺกนฺตวณฺณา เกวลกปฺปํ เชตวนํ โอภาเสตฺวา เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ อฏฺฐาสิ. เอกมนฺตํ ฐิตา โข สา เทวตา ภควนฺตํ คาถาย อชฺฌภาสิ –

๙๑. ‘‘ปราภวนฺตํ ปุริสํ, มยํ ปุจฺฉาม โคตม [โคตมํ (สี. สฺยา.)];

ภควนฺตํ [ภวนฺตํ (สฺยา. ก.)] ปุฏฺฐุมาคมฺม, กึ ปราภวโต มุขํ’’.

๙๒. ‘‘สุวิชาโน ภวํ โหติ, สุวิชาโน [ทุวิชาโน (สฺยา. ก.)] ปราภโว;

ธมฺมกาโม ภวํ โหติ, ธมฺมเทสฺสี ปราภโว’’.

๙๓. ‘‘อิติ เหตํ วิชานาม, ปฐโม โส ปราภโว;

ทุติยํ ภควา พฺรูหิ, กึ ปราภวโต มุขํ’’.

๙๔. ‘‘อสนฺตสฺส ปิยา โหนฺติ, สนฺเต น กุรุเต ปิยํ;

อสตํ ธมฺมํ โรเจติ, ตํ ปราภวโต มุขํ’’.

๙๕. ‘‘อิติ เหตํ วิชานาม, ทุติโย โส ปราภโว;

ตติยํ ภควา พฺรูหิ, กึ ปราภวโต มุขํ’’.

๙๖. ‘‘นิทฺทาสีลี สภาสีลี, อนุฏฺฐาตา จ โย นโร;

อลโส โกธปญฺญาโณ, ตํ ปราภวโต มุขํ’’.

๙๗. ‘‘อิติ เหตํ วิชานาม, ตติโย โส ปราภโว;

จตุตฺถํ ภควา พฺรูหิ, กึ ปราภวโต มุขํ’’.

๙๘. ‘‘โย มาตรํ [โย มาตรํ วา (สี. สฺยา. กํ. ปี.)] ปิตรํ วา, ชิณฺณกํ คตโยพฺพนํ;

ปหุ สนฺโต น ภรติ, ตํ ปราภวโต มุขํ’’.

๙๙. ‘‘อิติ เหตํ วิชานาม, จตุตฺโถ โส ปราภโว;

ปญฺจมํ ภควา พฺรูหิ, กึ ปราภวโต มุขํ’’.

๑๐๐. ‘‘โย พฺราหฺมณํ [โย พฺราหฺมณํ วา (สี. สฺยา. กํ. ปี.)] สมณํ วา, อญฺญํ วาปิ วนิพฺพกํ;

มุสาวาเทน วญฺเจติ, ตํ ปราภวโต มุขํ’’.

๑๐๑. ‘‘อิติ เหตํ วิชานาม, ปญฺจโม โส ปราภโว;

ฉฏฺฐมํ ภควา พฺรูหิ, กึ ปราภวโต มุขํ’’.

๑๐๒. ‘‘ปหูตวิตฺโต ปุริโส, สหิรญฺโญ สโภชโน;

เอโก ภุญฺชติ สาทูนิ, ตํ ปราภวโต มุขํ’’.

๑๐๓. ‘‘อิติ เหตํ วิชานาม, ฉฏฺฐโม โส ปราภโว;

สตฺตมํ ภควา พฺรูหิ, กึ ปราภวโต มุขํ’’.

๑๐๔. ‘‘ชาติตฺถทฺโธ ธนตฺถทฺโธ, โคตฺตตฺถทฺโธ จ โย นโร;

สญฺญาตึ อติมญฺเญติ, ตํ ปราภวโต มุขํ’’.

๑๐๕. ‘‘อิติ เหตํ วิชานาม, สตฺตโม โส ปราภโว;

อฏฺฐมํ ภควา พฺรูหิ, กึ ปราภวโต มุขํ’’.

๑๐๖. ‘‘อิตฺถิธุตฺโต สุราธุตฺโต, อกฺขธุตฺโต จ โย นโร;

ลทฺธํ ลทฺธํ วินาเสติ, ตํ ปราภวโต มุขํ’’.

๑๐๗. ‘‘อิติ เหตํ วิชานาม, อฏฺฐโม โส ปราภโว;

นวมํ ภควา พฺรูหิ, กึ ปราภวโต มุขํ’’.

๑๐๘. ‘‘เสหิ ทาเรหิ อสนฺตุฏฺโฐ [ทาเรหฺยสนฺตุฏฺโฐ (ก.)], เวสิยาสุ ปทุสฺสติ [ปทิสฺสติ (สี.)];

ทุสฺสติ [ทิสฺสติ (สี. ปี.)] ปรทาเรสุ, ตํ ปราภวโต มุขํ’’.

๑๐๙. ‘‘อิติ เหตํ วิชานาม, นวโม โส ปราภโว;

ทสมํ ภควา พฺรูหิ, กึ ปราภวโต มุขํ’’.

๑๑๐. ‘‘อตีตโยพฺพโน โปโส, อาเนติ ติมฺพรุตฺถนึ;

ตสฺสา อิสฺสา น สุปติ, ตํ ปราภวโต มุขํ’’.

๑๑๑. ‘‘อิติ เหตํ วิชานาม, ทสโม โส ปราภโว;

เอกาทสมํ ภควา พฺรูหิ, กึ ปราภวโต มุขํ’’.

๑๑๒. ‘‘อิตฺถึ โสณฺฑึ วิกิรณึ, ปุริสํ วาปิ ตาทิสํ;

อิสฺสริยสฺมึ ฐเปติ [ฐาเปติ (สี. ปี.), ถเปติ (ก.)], ตํ ปราภวโต มุขํ’’.

๑๑๓. ‘‘อิติ เหตํ วิชานาม, เอกาทสโม โส ปราภโว;

ทฺวาทสมํ ภควา พฺรูหิ, กึ ปราภวโต มุขํ’’.

๑๑๔. ‘‘อปฺปโภโค มหาตโณฺห, ขตฺติเย ชายเต กุเล;

โส จ รชฺชํ ปตฺถยติ, ตํ ปราภวโต มุขํ’’.

๑๑๕. ‘‘เอเต ปราภเว โลเก, ปณฺฑิโต สมเวกฺขิย;

อริโย ทสฺสนสมฺปนฺโน, ส โลกํ ภชเต สิว’’นฺติ.

ปราภวสุตฺตํ ฉฏฺฐํ นิฏฺฐิตํ.