๑๒. มุนิสุตฺตํ

๒๐๙. สนฺถวาโต [สนฺธวโต (ก.)] ภยํ ชาตํ, นิเกตา ชายเต รโช;

อนิเกตมสนฺถวํ, เอตํ เว มุนิทสฺสนํ.

๒๑๐. โย ชาตมุจฺฉิชฺช น โรปเยยฺย, ชายนฺตมสฺส นานุปฺปเวจฺเฉ;

ตมาหุ เอกํ มุนินํ จรนฺตํ, อทฺทกฺขิ โส สนฺติปทํ มเหสิ.

๒๑๑. สงฺขาย วตฺถูนิ ปมาย [ปหาย (ก. สี. ก.), สมาย (ก.) ป + มี + ตฺวา = ปมาย, ยถา นิสฺสายาติปทํ] พีชํ, สิเนหมสฺส นานุปฺปเวจฺเฉ;

ส เว มุนี ชาติขยนฺตทสฺสี, ตกฺกํ ปหาย น อุเปติ สงฺขํ.

๒๑๒. อญฺญาย สพฺพานิ นิเวสนานิ, อนิกามยํ อญฺญตรมฺปิ เตสํ;

ส เว มุนี วีตเคโธ อคิทฺโธ, นายูหตี ปารคโต หิ โหติ.

๒๑๓. สพฺพาภิภุํ สพฺพวิทุํ สุเมธํ, สพฺเพสุ ธมฺเมสุ อนูปลิตฺตํ;

สพฺพญฺชหํ ตณฺหกฺขเย วิมุตฺตํ, ตํ วาปิ ธีรา มุนิ [มุนึ (สี. ปี.)] เวทยนฺติ.

๒๑๔. ปญฺญาพลํ สีลวตูปปนฺนํ, สมาหิตํ ฌานรตํ สตีมํ;

สงฺคา ปมุตฺตํ อขิลํ อนาสวํ, ตํ วาปิ ธีรา มุนิ เวทยนฺติ.

๒๑๕. เอกํ จรนฺตํ มุนิมปฺปมตฺตํ, นินฺทาปสํสาสุ อเวธมานํ;

สีหํว สทฺเทสุ อสนฺตสนฺตํ, วาตํว ชาลมฺหิ อสชฺชมานํ;

ปทฺมํว [ปทุมํว (สี. สฺยา. ปี.)] โตเยน อลิปฺปมานํ [อลิมฺปมานํ (สฺยา. ก.)], เนตารมญฺเญสมนญฺญเนยฺยํ;

ตํ วาปิ ธีรา มุนิ เวทยนฺติ.

๒๑๖. โย โอคหเณ ถมฺโภริวาภิชายติ, ยสฺมึ ปเร วาจาปริยนฺตํ [วาจํ ปริยนฺตํ (ก.)] วทนฺติ;

ตํ วีตราคํ สุสมาหิตินฺทฺริยํ, ตํ วาปิ ธีรา มุนิ เวทยนฺติ.

๒๑๗. โย เว ฐิตตฺโต ตสรํว อุชฺชุ, ชิคุจฺฉติ กมฺเมหิ ปาปเกหิ;

วีมํสมาโน วิสมํ สมญฺจ, ตํ วาปิ ธีรา มุนิ เวทยนฺติ.

๒๑๘. โย สญฺญตตฺโต น กโรติ ปาปํ, ทหโร มชฺฌิโม จ มุนิ [ทหโร จ มชฺโฌ จ มุนี (สี. สฺยา. กํ. ปี.)] ยตตฺโต;

อโรสเนยฺโย น โส โรเสติ กญฺจิ [น โรเสติ (สฺยา.)], ตํ วาปิ ธีรา มุนิ เวทยนฺติ.

๒๑๙. ยทคฺคโต มชฺฌโต เสสโต วา, ปิณฺฑํ ลเภถ ปรทตฺตูปชีวี;

นาลํ ถุตุํ โนปิ นิปจฺจวาที, ตํ วาปิ ธีรา มุนิ เวทยนฺติ.

๒๒๐. มุนึ จรนฺตํ วิรตํ เมถุนสฺมา, โย โยพฺพเน โนปนิพชฺฌเต กฺวจิ;

มทปฺปมาทา วิรตํ วิปฺปมุตฺตํ, ตํ วาปิ ธีรา มุนิ เวทยนฺติ.

๒๒๑. อญฺญาย โลกํ ปรมตฺถทสฺสึ, โอฆํ สมุทฺทํ อติตริย ตาทึ;

ตํ ฉินฺนคนฺถํ อสิตํ อนาสวํ, ตํ วาปิ ธีรา มุนิ เวทยนฺติ.

๒๒๒. อสมา อุโภ ทูรวิหารวุตฺติโน, คิหี [คิหิ (ก.)] ทารโปสี อมโม จ สุพฺพโต;

ปรปาณโรธาย คิหี อสญฺญโต, นิจฺจํ มุนี รกฺขติ ปาณิเน [ปาณิโน (สี.)] ยโต.

๒๒๓. สิขี ยถา นีลคีโว [นีลคิโว (สฺยา.)] วิหงฺคโม, หํสสฺส โนเปติ ชวํ กุทาจนํ;

เอวํ คิหี นานุกโรติ ภิกฺขุโน, มุนิโน วิวิตฺตสฺส วนมฺหิ ฌายโตติ.

มุนิสุตฺตํ ทฺวาทสมํ นิฏฺฐิตํ.

อุรควคฺโค ปฐโม นิฏฺฐิโต.