๑๑. วิชยสุตฺตํ

๑๙๕. จรํ วา ยทิ วา ติฏฺฐํ, นิสินฺโน อุท วา สยํ;

สมิญฺเชติ ปสาเรติ, เอสา กายสฺส อิญฺชนา.

๑๙๖. อฏฺฐินหารุสํยุตฺโต, ตจมํสาวเลปโน;

ฉวิยา กาโย ปฏิจฺฉนฺโน, ยถาภูตํ น ทิสฺสติ.

๑๙๗. อนฺตปูโร อุทรปูโร, ยกนเปฬสฺส [ยกเปฬสฺส (สี. สฺยา.)] วตฺถิโน;

หทยสฺส ปปฺผาสสฺส, วกฺกสฺส ปิหกสฺส จ.

๑๙๘. สิงฺฆาณิกาย เขฬสฺส, เสทสฺส จ เมทสฺส จ;

โลหิตสฺส ลสิกาย, ปิตฺตสฺส จ วสาย จ.

๑๙๙. อถสฺส นวหิ โสเตหิ, อสุจี สวติ สพฺพทา;

อกฺขิมฺหา อกฺขิคูถโก, กณฺณมฺหา กณฺณคูถโก.

๒๐๐. สิงฺฆาณิกา จ นาสโต, มุเขน วมเตกทา;

ปิตฺตํ เสมฺหญฺจ วมติ, กายมฺหา เสทชลฺลิกา.

๒๐๑. อถสฺส สุสิรํ สีสํ, มตฺถลุงฺคสฺส ปูริตํ;

สุภโต นํ มญฺญติ, พาโล อวิชฺชาย ปุรกฺขโต.

๒๐๒. ยทา จ โส มโต เสติ, อุทฺธุมาโต วินีลโก;

อปวิทฺโธ สุสานสฺมึ, อนเปกฺขา โหนฺติ ญาตโย.

๒๐๓. ขาทนฺติ นํ สุวานา [สุปาณา (ปี.)] จ, สิงฺคาลา [สิคาลา (สี. สฺยา. กํ. ปี.)] วกา กิมี;

กากา คิชฺฌา จ ขาทนฺติ, เย จญฺเญ สนฺติ ปาณิโน.

๒๐๔. สุตฺวาน พุทฺธวจนํ, ภิกฺขุ ปญฺญาณวา อิธ;

โส โข นํ ปริชานาติ, ยถาภูตญฺหิ ปสฺสติ.

๒๐๕. ยถา อิทํ ตถา เอตํ, ยถา เอตํ ตถา อิทํ;

อชฺฌตฺตญฺจ พหิทฺธา จ, กาเย ฉนฺทํ วิราชเย.

๒๐๖. ฉนฺทราควิรตฺโต โส, ภิกฺขุ ปญฺญาณวา อิธ;

อชฺฌคา อมตํ สนฺตึ, นิพฺพานํ ปทมจฺจุตํ.

๒๐๗. ทฺวิปาทโกยํ [ทิปาทโกยํ (สี. สฺยา. กํ. ปี.)] อสุจิ, ทุคฺคนฺโธ ปริหารติ [ปริหีรติ (สี. สฺยา. กํ. ปี.)];

นานากุณปปริปูโร, วิสฺสวนฺโต ตโต ตโต.

๒๐๘. เอตาทิเสน กาเยน, โย มญฺเญ อุณฺณเมตเว [อุนฺนเมตเว (?)];

ปรํ วา อวชาเนยฺย, กิมญฺญตฺร อทสฺสนาติ.

วิชยสุตฺตํ เอกาทสมํ นิฏฺฐิตํ.