๑๕. เสฏฺฐิปุตฺตเปตวตฺถุ

๘๐๒. [ชา. ๑.๔.๕๔ ชาตเกปิ] ‘‘สฏฺฐิวสฺสสหสฺสานิ, ปริปุณฺณานิ สพฺพโส;

นิรเย ปจฺจมานานํ, กทา อนฺโต ภวิสฺสติ’’.

๘๐๓. [ชา. ๑.๔.๕๕ ชาตเกปิ] ‘‘นตฺถิ อนฺโต กุโต อนฺโต, น อนฺโต ปฏิทิสฺสติ;

ตถา หิ ปกตํ ปาปํ, ตุยฺหํ มยฺหญฺจ มาริสา [มม ตุยฺหญฺจ มาริส (สี. สฺยา. ปี.)].

๘๐๔. [ชา. ๑.๔.๕๓ ชาตเกปิ] ‘‘ทุชฺชีวิตมชีวมฺห, เย สนฺเต น ททมฺหเส;

สนฺเตสุ เทยฺยธมฺเมสุ, ทีปํ นากมฺห อตฺตโน.

๘๐๕. [ชา. ๑.๔.๕๖ ชาตเกปิ] ‘‘โสหํ นูน อิโต คนฺตฺวา, โยนึ ลทฺธาน มานุสึ;

วทญฺญู สีลสมฺปนฺโน, กาหามิ กุสลํ พหุ’’นฺติ.

เสฏฺฐิปุตฺตเปตวตฺถุ ปนฺนรสมํ.