๓๗. สลฺเลขฏฺฐญาณนิทฺเทโส

๘๘. กถํ ปุถุนานตฺเตกตฺตเตชปริยาทาเน ปญฺญา สลฺเลขฏฺเฐ [ปุถุนานตฺเตกตฺตเตชปริยาทาเน (ก.)] ญาณํ? ปุถูติ – ราโค ปุถุ, โทโส ปุถุ, โมโห ปุถุ, โกโธ…เป… อุปนาโห… มกฺโข… ปฬาโส… อิสฺสา… มจฺฉริยํ… มายา… สาเฐยฺยํ… ถมฺโภ… สารมฺโภ… มาโน… อติมาโน… มโท… ปมาโท… สพฺเพ กิเลสา… สพฺเพ ทุจฺจริตา… สพฺเพ อภิสงฺขารา… สพฺเพ ภวคามิกมฺมา.

นานตฺเตกตฺตนฺติ กามจฺฉนฺโท นานตฺตํ, เนกฺขมฺมํ เอกตฺตํ. พฺยาปาโท นานตฺตํ, อพฺยาปาโท เอกตฺตํ. ถินมิทฺธํ นานตฺตํ, อาโลกสญฺญา เอกตฺตํ. อุทฺธจฺจํ นานตฺตํ, อวิกฺเขโป เอกตฺตํ. วิจิกิจฺฉา นานตฺตํ, ธมฺมววตฺถานํ เอกตฺตํ. อวิชฺชา นานตฺตํ, ญาณํ เอกตฺตํ. อรติ นานตฺตํ, ปาโมชฺชํ เอกตฺตํ. นีวรณา นานตฺตํ, ปฐมํ ฌานํ เอกตฺตํ…เป… สพฺเพ กิเลสา นานตฺตํ, อรหตฺตมคฺโค เอกตฺตํ.

เตโชติ ปญฺจ เตชา – จรณเตโช, คุณเตโช, ปญฺญาเตโช, ปุญฺญเตโช, ธมฺมเตโช. จรณเตเชน เตชิตตฺตา ทุสฺสีลฺยเตชํ ปริยาทิยติ. คุณเตเชน เตชิตตฺตา อคุณเตชํ ปริยาทิยติ. ปญฺญาเตเชน เตชิตตฺตา ทุปฺปญฺญเตชํ ปริยาทิยติ. ปุญฺญเตเชน เตชิตตฺตา อปุญฺญเตชํ ปริยาทิยติ. ธมฺมเตเชน เตชิตตฺตา อธมฺมเตชํ ปริยาทิยติ.

สลฺเลโขติ กามจฺฉนฺโท อสลฺเลโข, เนกฺขมฺมํ สลฺเลโข. พฺยาปาโท อสลฺเลโข, อพฺยาปาโท สลฺเลโข. ถินมิทฺธํ อสลฺเลโข, อาโลกสญฺญา สลฺเลโข. อุทฺธจฺจํ อสลฺเลโข, อวิกฺเขโป สลฺเลโข. วิจิกิจฺฉา อสลฺเลโข, ธมฺมววตฺถานํ สลฺเลโข. อวิชฺชา อสลฺเลโข, ญาณํ สลฺเลโข. อรติ อสลฺเลโข, ปาโมชฺชํ สลฺเลโข. นีวรณา อสลฺเลโข, ปฐมํ ฌานํ สลฺเลโข…เป… สพฺพกิเลสา อสลฺเลโข, อรหตฺตมคฺโค สลฺเลโข. ตํ ญาตฏฺเฐน ญาณํ, ปชานนฏฺเฐน ปญฺญา. เตน วุจฺจติ – ‘‘ปุถุนานตฺตเตชปริยาทาเน ปญฺญา สลฺเลขฏฺเฐ ญาณํ’’.

สลฺเลขฏฺฐญาณนิทฺเทโส สตฺตตึสติโม.