๘. นิธิกณฺฑสุตฺตํ

๑. นิธึ นิเธติ ปุริโส, คมฺภีเร โอทกนฺติเก;

อตฺเถ กิจฺเจ สมุปฺปนฺเน, อตฺถาย เม ภวิสฺสติ.

๒. ราชโต วา ทุรุตฺตสฺส, โจรโต ปีฬิตสฺส วา;

อิณสฺส วา ปโมกฺขาย, ทุพฺภิกฺเข อาปทาสุ วา;

เอตทตฺถาย โลกสฺมึ, นิธิ นาม นิธียติ.

๓. ตาวสฺสุนิหิโต [ตาว สุนิหิโต (สี.)] สนฺโต, คมฺภีเร โอทกนฺติเก;

น สพฺโพ สพฺพทา เอว, ตสฺส ตํ อุปกปฺปติ.

๔. นิธิ วา ฐานา จวติ, สญฺญา วาสฺส วิมุยฺหติ;

นาคา วา อปนาเมนฺติ, ยกฺขา วาปิ หรนฺติ นํ.

๕. อปฺปิยา วาปิ ทายาทา, อุทฺธรนฺติ อปสฺสโต;

ยทา ปุญฺญกฺขโย โหติ, สพฺพเมตํ วินสฺสติ.

๖. ยสฺส ทาเนน สีเลน, สํยเมน ทเมน จ;

นิธี สุนิหิโต โหติ, อิตฺถิยา ปุริสสฺส วา.

๗. เจติยมฺหิ จ สงฺเฆ วา, ปุคฺคเล อติถีสุ วา;

มาตริ ปิตริ จาปิ [วาปิ (สฺยา. กํ.)], อโถ เชฏฺฐมฺหิ ภาตริ.

๘. เอโส นิธิ สุนิหิโต, อเชยฺโย อนุคามิโก;

ปหาย คมนีเยสุ, เอตํ อาทาย คจฺฉติ.

๙. อสาธารณมญฺเญสํ, อโจราหรโณ นิธิ;

กยิราถ ธีโร ปุญฺญานิ, โย นิธิ อนุคามิโก.

๑๐. เอส เทวมนุสฺสานํ, สพฺพกามทโท นิธิ;

ยํ ยเทวาภิปตฺเถนฺติ, สพฺพเมเตน ลพฺภติ.

๑๑. สุวณฺณตา สุสรตา, สุสณฺฐานา สุรูปตา [สุสณฺฐานสุรูปตา (สี.), สุสณฺฐานํ สุรูปตา (สฺยา. กํ.)];

อาธิปจฺจปริวาโร, สพฺพเมเตน ลพฺภติ.

๑๒. ปเทสรชฺชํ อิสฺสริยํ, จกฺกวตฺติสุขํ ปิยํ;

เทวรชฺชมฺปิ ทิพฺเพสุ, สพฺพเมเตน ลพฺภติ.

๑๓. มานุสฺสิกา จ สมฺปตฺติ, เทวโลเก จ ยา รติ;

ยา จ นิพฺพานสมฺปตฺติ, สพฺพเมเตน ลพฺภติ.

๑๔. มิตฺตสมฺปทมาคมฺม, โยนิโสว [โยนิโส เว (สี.), โยนิโส เจ (สฺยา.), โยนิโส จ (?)] ปยุญฺชโต;

วิชฺชา วิมุตฺติ วสีภาโว, สพฺพเมเตน ลพฺภติ.

๑๕. ปฏิสมฺภิทา วิโมกฺขา จ, ยา จ สาวกปารมี;

ปจฺเจกโพธิ พุทฺธภูมิ, สพฺพเมเตน ลพฺภติ.

๑๖. เอวํ มหตฺถิกา เอสา, ยทิทํ ปุญฺญสมฺปทา;

ตสฺมา ธีรา ปสํสนฺติ, ปณฺฑิตา กตปุญฺญตนฺติ.

นิธิกณฺฑสุตฺตํ นิฏฺฐิตํ.