๕๑๗. ทกรกฺขสชาตกํ (๗)

๒๒๔. สเจ โว วุยฺหมานานํ, สตฺตนฺนํ อุทกณฺณเว;

มนุสฺสพลิเมสาโน, นาวํ คเณฺหยฺย รกฺขโส;

อนุปุพฺพํ กถํ ทตฺวา, มุญฺเจสิ ทกรกฺขสา [ทกรกฺขโต (ปี.)].

๒๒๕. มาตรํ ปฐมํ ทชฺชํ, ภริยํ ทตฺวาน ภาตรํ;

ตโต สหายํ ทตฺวาน, ปญฺจมํ ทชฺชํ [ทชฺช (สฺยา.)] พฺราหฺมณํ;

ฉฏฺฐาหํ ทชฺชมตฺตานํ, เนว ทชฺชํ มโหสธํ.

๒๒๖. โปเสตา เต ชเนตฺตี จ, ทีฆรตฺตานุกมฺปิกา;

ฉพฺภี ตยิ ปทุสฺสติ [ปทุฏฺฐสฺมึ (สี. สฺยา.)], ปณฺฑิตา อตฺถทสฺสินี;

อญฺญํ อุปนิสํ กตฺวา, วธา ตํ ปริโมจยิ.

๒๒๗. ตํ ตาทิสึ [ตาทิสํ (ก.)] ปาณททึ, โอรสํ คพฺภธารินึ [คพฺภธาริณึ (สี. สฺยา.)];

มาตรํ เกน โทเสน, ทชฺชาสิ ทกรกฺขิโน [ทกรกฺขโต (ปี.)].

๒๒๘. ทหรา วิยลงฺการํ, ธาเรติ อปิฬนฺธนํ;

โทวาริเก อนีกฏฺเฐ, อติเวลํ ปชคฺฆติ [สญฺชคฺฆติ (ก.)].

๒๒๙. อโถปิ ปฏิราชูนํ, สยํ ทูตานิ สาสติ;

มาตรํ เตน โทเสน, ทชฺชาหํ ทกรกฺขิโน.

๒๓๐. อิตฺถิคุมฺพสฺส ปวรา, อจฺจนฺตํ ปิยภาณินี [อจฺจนฺตปิยวาทินี (สี. ปี.)];

อนุคฺคตา [อนุพฺพตา (สฺยา.), อนุปุพฺพตา (ก.)] สีลวตี, ฉายาว อนปายินี.

๒๓๑. อกฺโกธนา ปุญฺญวตี [ปญฺญวตี (สี. ปี.)], ปณฺฑิตา อตฺถทสฺสินี;

อุพฺพรึ [อุปฺปรึ (สี.)] เกน โทเสน, ทชฺชาสิ ทกรกฺขิโน.

๒๓๒. ขิฑฺฑารติสมาปนฺนํ, อนตฺถวสมาคตํ;

สา มํ สกาน ปุตฺตานํ, อยาจํ ยาจเต ธนํ.

๒๓๓. โสหํ ททามิ สารตฺโต [สารโต (สฺยา.)], พหุํ อุจฺจาวจํ ธนํ;

สุทุจฺจชํ จชิตฺวาน, ปจฺฉา โสจามิ ทุมฺมโน;

อุพฺพรึ เตน โทเสน, ทชฺชาหํ ทกรกฺขิโน.

๒๓๔. เยโนจิตา ชนปทา [ชานปทา (สี. สฺยา. ปี.)], อานีตา จ ปฏิคฺคหํ;

อาภตํ ปรรชฺเชภิ, อภิฏฺฐาย พหุํ ธนํ.

๒๓๕. ธนุคฺคหานํ ปวรํ, สูรํ ติขิณมนฺตินํ;

ภาตรํ เกน โทเสน, ทชฺชาสิ ทกรกฺขิโน.

๒๓๖. เยโนจิตา [มโยจิตา (สี.), มยาจิตา (ปี.)] ชนปทา, อานีตา จ ปฏิคฺคหํ;

อาภตํ ปรรชฺเชภิ, อภิฏฺฐาย พหุํ ธนํ.

๒๓๗. ธนุคฺคหานํ ปวโร, สูโร ติขิณมนฺติ จ [ติขิณมนฺติโน (ก.)];

มยายํ [มยา โส (สี. ปี.)] สุขิโต ราชา, อติมญฺญติ ทารโก.

๒๓๘. อุปฏฺฐานมฺปิ เม อยฺเย, น โส เอติ ยถา ปุเร;

ภาตรํ เตน โทเสน, ทชฺชาหํ ทกรกฺขิโน.

๒๓๙. เอกรตฺเตน อุภโย, ตฺวญฺเจว ธนุเสข จ [ธนุเสขวา (สี. สฺยา. ปี.)];

อุโภ ชาเตตฺถ ปญฺจาลา, สหายา สุสมาวยา.

๒๔๐. จริยา ตํ อนุพนฺธิตฺโถ [อนุพนฺโธ (ก.)], เอกทุกฺขสุโข ตว;

อุสฺสุกฺโก เต ทิวารตฺตึ, สพฺพกิจฺเจสุ พฺยาวโฏ;

สหายํ เกน โทเสน, ทชฺชาสิ ทกรกฺขิโน.

๒๔๑. จริยา มํ อยํ [จริยาย อยํ (สี. ปี.)] อยฺเย, ปชคฺฆิตฺโถ [สญฺชคฺฆิตฺโถ (สฺยา.)] มยา สห;

อชฺชาปิ เตน วณฺเณน, อติเวลํ ปชคฺฆติ.

๒๔๒. อุพฺพริยาปิหํ อยฺเย, มนฺตยามิ รโหคโต;

อนามนฺโต [อนามนฺตา (สี.)] ปวิสติ, ปุพฺเพ อปฺปฏิเวทิโต.

๒๔๓. ลทฺธทฺวาโร [ลทฺธวาโร (สี. ปี.)] กโตกาโส, อหิริกํ อนาทรํ;

สหายํ เตน โทเสน, ทชฺชาหํ ทกรกฺขิโน.

๒๔๔. กุสโล สพฺพนิมิตฺตานํ, รุตญฺญู [รุทญฺญู (สี. สฺยา. ปี.)] อาคตาคโม;

อุปฺปาเต สุปิเน ยุตฺโต, นิยฺยาเน จ ปเวสเน.

๒๔๕. ปฏฺโฐ [ปทฺโธ (สี. ปี.)] ภูมนฺตลิกฺขสฺมึ, นกฺขตฺตปทโกวิโท;

พฺราหฺมณํ เกน โทเสน, ทชฺชาสิ ทกรกฺขิโน.

๒๔๖. ปริสายมฺปิ เม อยฺเย, อุมฺมีลิตฺวา อุทิกฺขติ;

ตสฺมา อจฺจภมุํ ลุทฺทํ, ทชฺชาหํ ทกรกฺขิโน.

๒๔๗. สสมุทฺทปริยายํ, มหึ สาครกุณฺฑลํ;

วสุนฺธรํ อาวสสิ, อมจฺจปริวาริโต.

๒๔๘. จาตุรนฺโต มหารฏฺโฐ, วิชิตาวี มหพฺพโล;

ปถพฺยา เอกราชาสิ, ยโส เต วิปุลํ คโต.

๒๔๙. โสฬสิตฺถิสหสฺสานิ, อามุตฺตมณิกุณฺฑลา;

นานาชนปทา นารี, เทวกญฺญูปมา สุภา.

๒๕๐. เอวํ สพฺพงฺคสมฺปนฺนํ, สพฺพกามสมิทฺธินํ;

สุขิตานํ ปิยํ ทีฆํ, ชีวิตํ อาหุ ขตฺติย.

๒๕๑. อถ ตฺวํ เกน วณฺเณน, เกน วา ปน เหตุนา;

ปณฺฑิตํ อนุรกฺขนฺโต, ปาณํ จชสิ ทุจฺจชํ.

๒๕๒. ยโตปิ อาคโต อยฺเย, มม หตฺถํ มโหสโธ;

นาภิชานามิ ธีรสฺส, อนุมตฺตมฺปิ ทุกฺกฏํ.

๒๕๓. สเจ จ กิสฺมิจิ กาเล, มรณํ เม ปุเร สิยา;

โส เม ปุตฺเต [ปุตฺเต จ เม (สี. สฺยา. ปี.] ปปุตฺเต จ, สุขาเปยฺย มโหสโธ.

๒๕๔. อนาคตํ ปจฺจุปฺปนฺนํ, สพฺพมตฺถมฺปิ ปสฺสติ [สพฺพมตฺถํ วิปสฺสติ (สี. สฺยา. ปี.)];

อนาปราธกมฺมนฺตํ, น ทชฺชํ ทกรกฺขิโน.

๒๕๕. อิทํ สุณาถ ปญฺจาลา, จูฬเนยฺยสฺส [จูฬนียสฺส (สี.)] ภาสิตํ;

ปณฺฑิตํ อนุรกฺขนฺโต, ปาณํ จชติ ทุจฺจชํ.

๒๕๖. มาตุ ภริยาย ภาตุจฺจ, สขิโน พฺราหฺมณสฺส จ;

อตฺตโน จาปิ ปญฺจาโล, ฉนฺนํ จชติ ชีวิตํ.

๒๕๗. เอวํ มหตฺถิกา [ขหิทฺธิยา (สฺยา.), มหิทฺธิกา (ก.)] ปญฺญา, นิปุณา สาธุจินฺตินี;

ทิฏฺฐธมฺมหิตตฺถาย, สมฺปรายสุขาย จาติ.

ทกรกฺขสชาตกํ สตฺตมํ.