๔๖๙. มหากณฺหชาตกํ (๖)

๖๑. กโณฺห กโณฺห จ โฆโร จ, สุกฺกทาโฐ ปภาสวา [ปตาปวา (สี. สฺยา. ปี.)];

พทฺโธ ปญฺจหิ รชฺชูหิ, กึ รวิ [ธีร (สี. ปี.), วีร (สฺยา.)] สุนโข ตว.

๖๒. นายํ มิคานมตฺถาย, อุสีนก [อุสีนร (สี. ปี.), อุสีนฺนร (สฺยา.)] ภวิสฺสติ;

มนุสฺสานํ อนโย หุตฺวา, ตทา กโณฺห ปโมกฺขติ.

๖๓. ปตฺตหตฺถา สมณกา, มุณฺฑา สงฺฆาฏิปารุตา;

นงฺคเลหิ กสิสฺสนฺติ, ตทา กโณฺห ปโมกฺขติ.

๖๔. ตปสฺสินิโย [ตปนียา (ก.) ทุติยนฺตปทานิ เหตานิ] ปพฺพชิตา, มุณฺฑา สงฺฆาฏิปารุตา;

ยทา โลเก คมิสฺสนฺติ, ตทา กโณฺห ปโมกฺขติ.

๖๕. ทีโฆตฺตโรฏฺฐา ชฏิลา, ปงฺกทนฺตา รชสฺสิรา;

อิณํ โจทาย [โวทาย (สี. ปี.), โจทย (สฺยา.)] คจฺฉนฺติ, ตทา กโณฺห ปโมกฺขติ.

๖๖. อธิจฺจ เวเท [เวทํ (ก.)] สาวิตฺตึ, ยญฺญตนฺตญฺจ [ตนฺตฺรญฺจ (สี. สฺยา. ปี.)] พฺราหฺมณา;

ภติกาย ยชิสฺสนฺติ, ตทา กโณฺห ปโมกฺขติ.

๖๗. มาตรํ ปิตรญฺจาปิ, ชิณฺณกํ คตโยพฺพนํ;

ปหู สนฺโต [สนฺตา (สี.)] น ภรนฺติ, ตทา กโณฺห ปโมกฺขติ.

๖๘. มาตรํ ปิตรญฺจาปิ, ชิณฺณกํ คตโยพฺพนํ;

พาลา ตุเมฺหติ วกฺขนฺติ, ตทา กโณฺห ปโมกฺขติ.

๖๙. อาจริยภริยํ สขึ [อาจริยภริยํ สขาภริยํ (สี. ปี.)], มาตุลานึ ปิตุจฺฉกึ [ปิตุจฺฉยํ (สี.), ปิตุจฺฉสํ (ปี.)];

ยทา โลเก คมิสฺสนฺติ, ตทา กโณฺห ปโมกฺขติ.

๗๐. อสิจมฺมํ คเหตฺวาน, ขคฺคํ ปคฺคยฺห พฺราหฺมณา;

ปนฺถฆาตํ กริสฺสนฺติ, ตทา กโณฺห ปโมกฺขติ.

๗๑. สุกฺกจฺฉวี เวธเวรา, ถูลพาหู อปาตุภา;

มิตฺตเภทํ กริสฺสนฺติ, ตทา กโณฺห ปโมกฺขติ.

๗๒. มายาวิโน เนกติกา, อสปฺปุริสจินฺตกา;

ยทา โลเก ภวิสฺสนฺติ, ตทา กโณฺห ปโมกฺขตีติ.

มหากณฺหชาตกํ ฉฏฺฐํ.