๔๕๑. จกฺกวากชาตกํ (๑๓)

๑๓๕. วณฺณวา อภิรูโปสิ, ฆโน สญฺชาตโรหิโต;

จกฺกวาก สุรูโปสิ, วิปฺปสนฺนมุขินฺทฺริโย.

๑๓๖. ปาฐีนํ ปาวุสํ มจฺฉํ, พลชํ [วาลชํ (สี. ปี.), พลชฺชํ (สฺยา.)] มุญฺชโรหิตํ;

คงฺคาย ตีเร นิสินฺโน [คงฺคาตีเร นิสินฺโนสิ (สฺยา. ก.)], เอวํ ภุญฺชสิ โภชนํ.

๑๓๗. น วาหเมตํ [สพฺพตฺถปิ สมานํ] ภุญฺชามิ, ชงฺคลาโนทกานิ วา;

อญฺญตฺร เสวาลปณกา, เอตํ [อญฺญํ (สฺยา.)] เม สมฺม โภชนํ.

๑๓๘. น วาหเมตํ สทฺทหามิ, จกฺกวากสฺส โภชนํ;

อหมฺปิ สมฺม ภุญฺชามิ, คาเม โลณิยเตลิยํ.

๑๓๙. มนุสฺเสสุ กตํ ภตฺตํ, สุจึ มํสูปเสจนํ;

น จ เม ตาทิโส วณฺโณ, จกฺกวาก ยถา ตุวํ.

๑๔๐. สมฺปสฺสํ อตฺตนิ เวรํ, หึสยํ [หึสาย (สฺยา. ปี. ก.)] มานุสึ ปชํ;

อุตฺรสฺโต ฆสสี ภีโต, เตน วณฺโณ ตเวทิโส.

๑๔๑. สพฺพโลกวิรุทฺโธสิ, ธงฺก ปาเปน กมฺมุนา;

ลทฺโธ ปิณฺโฑ น ปีเณติ, เตน วณฺโณ ตเวทิโส.

๑๔๒. อหมฺปิ [อหญฺจ (?)] สมฺม ภุญฺชามิ, อหึสํ สพฺพปาณินํ;

อปฺโปสฺสุกฺโก นิราสงฺกี, อโสโก อกุโตภโย.

๑๔๓. โส กรสฺสุ อานุภาวํ, วีติวตฺตสฺสุ สีลิยํ;

อหึสาย จร โลเก, ปิโย โหหิสิ มํมิว.

๑๔๔. โย น หนฺติ น ฆาเตติ, น ชินาติ น ชาปเย;

เมตฺตํโส สพฺพภูเตสุ, เวรํ ตสฺส น เกนจีติ.

จกฺกวากชาตกํ เตรสมํ.