๘. วรุณวคฺโค

๗๑. โย ปุพฺเพ กรณียานิ, ปจฺฉา โส กาตุมิจฺฉติ;

วรุณกฏฺฐ [วรณกฏฺฐ (สี. ปี.)] ภญฺโชว, ส ปจฺฉา มนุตปฺปตีติ.

วรุณชาตกํ ปฐมํ.

๗๒. อกตญฺญุสฺส โปสสฺส, นิจฺจํ วิวรทสฺสิโน;

สพฺพํ เจ ปถวึ [ปฐวึ (สี. สฺยา. ปี.)] ทชฺชา, เนว นํ อภิราธเยติ.

สีลวหตฺถิชาตกํ ทุติยํ.

๗๓. สจฺจํ กิเรวมาหํสุ, นรา เอกจฺจิยา อิธ;

กฏฺฐํ นิปฺลวิตํ [วิปฺลาวิตํ (สี. ปี.)] เสยฺโย, น เตฺวเวกจฺจิโย นโรติ.

สจฺจํกิรชาตกํ ตติยํ.

๗๔. สาธู สมฺพหุลา ญาตี, อปิ รุกฺขา อรญฺญชา;

วาโต วหติ เอกฏฺฐํ, พฺรหนฺตมฺปิ วนปฺปตินฺติ.

รุกฺขธมฺมชาตกํ จตุตฺถํ.

๗๕. อภิตฺถนย ปชฺชุนฺน, นิธึ กากสฺส นาสย;

กากํ โสกาย รนฺเธหิ, มญฺจ โสกา ปโมจยาติ.

มจฺฉชาตกํ ปญฺจมํ.

๗๖. อสงฺกิโยมฺหิ คามมฺหิ, อรญฺเญ นตฺถิ เม ภยํ;

อุชุํ มคฺคํ สมารูโฬฺห, เมตฺตาย กรุณาย จาติ.

อสงฺกิยชาตกํ ฉฏฺฐํ.

๗๗. อุสภา รุกฺขา คาวิโย ควา จ, อสฺโส กํโส สิงฺคาลี [สิคาสี (สี. สฺยา. ปี.)] จ กุมฺโภ;

โปกฺขรณี จ อปากจนฺทนํ, ลาพูนิ สีทนฺติ สิลา ปฺลวนฺติ.

มณฺฑูกิโย กณฺหสปฺเป คิลนฺติ, กากํ สุปณฺณา ปริวารยนฺติ;

ตสา วกา เอฬกานํ ภยาหิ, วิปริยาโส [วิปริยาโย (สฺยา. ก.)] วตฺตติ นยิธ มตฺถีติ.

มหาสุปินชาตกํ สตฺตมํ.

๗๘. อุโภ ขญฺชา อุโภ กุณี, อุโภ วิสมจกฺขุกา [จกฺขุลา (สี. ปี.)];

อุภินฺนํ ปิฬกา [ปีฬกา (สฺยา.)] ชาตา, นาหํ ปสฺสามิ อิลฺลิสนฺติ.

อิลฺลิสชาตกํ อฏฺฐมํ.

๗๙. ยโต วิลุตฺตา จ หตา จ คาโว, ทฑฺฒานิ เคหานิ ชโน จ นีโต;

อถาคมา ปุตฺตหตาย ปุตฺโต, ขรสฺสรํ ฑิณฺฑิมํ [เทณฺฑิมํ (สี. สฺยา. ปี.), ฑินฺทิมํ (ก.)] วาทยนฺโตติ.

ขรสฺสรชาตกํ นวมํ.

๘๐. ยํ เต ปวิกตฺถิตํ ปุเร, อถ เต ปูติสรา สชนฺติ ปจฺฉา;

อุภยํ น สเมติ ภีมเสน, ยุทฺธกถา จ อิทญฺจ เต วิหญฺญนฺติ.

ภีมเสนชาตกํ ทสมํ.

วรุณวคฺโค [วรณวคฺโค (สี. ปี.)] อฏฺฐโม.

ตสฺสุทฺทานํ –

วรุณา อกตญฺญูวเร ตุ สจฺจวรํ, สวนปฺปตินา จ อภิตฺถนย;

กรุณาย สิลาปฺลว อิลฺลิสโต, ปุน ฑิณฺฑิมปูติสเรน ทสาติ.