๖. อาสีสวคฺโค

๕๑. อาสีเสเถว [อาสึเสเถว (สี. สฺยา. ปี.)] ปุริโส, น นิพฺพินฺเทยฺย ปณฺฑิโต;

ปสฺสามิ โวหํ อตฺตานํ, ยถา อิจฺฉึ ตถา อหูติ.

มหาสีลวชาตกํ ปฐมํ.

๕๒. วายเมเถว ปุริโส, น นิพฺพินฺเทยฺย ปณฺฑิโต;

ปสฺสามิ โวหํ อตฺตานํ, อุทกา ถลมุพฺภตนฺติ.

จูฬชนกชาตกํ ทุติยํ.

๕๓. ตเถว ปุณฺณา ปาติโย, อญฺญายํ วตฺตเต กถา;

อาการเณน [อาการเกน (สี. สฺยา. ปี.)] ชานามิ, น จายํ ภทฺทิกา สุราติ.

ปุณฺณปาติชาตกํ ตติยํ.

๕๔. นายํ รุกฺโข ทุรารุโห, นปิ คามโต อารกา;

อาการเณน ชานามิ, นายํ สาทุผโล ทุโมติ.

กึผลชาตกํ จตุตฺถํ.

๕๕. โย อลีเนน จิตฺเตน, อลีนมนโส นโร;

ภาเวติ กุสลํ ธมฺมํ, โยคกฺเขมสฺส ปตฺติยา;

ปาปุเณ อนุปุพฺเพน, สพฺพสํโยชนกฺขยนฺติ.

ปญฺจาวุธชาตกํ ปญฺจมํ.

๕๖. โย ปหฏฺเฐน จิตฺเตน, ปหฏฺฐมนโส นโร;

ภาเวติ กุสลํ ธมฺมํ, โยคกฺเขมสฺส ปตฺติยา;

ปาปุเณ อนุปุพฺเพน, สพฺพสํโยชนกฺขยนฺติ.

กญฺจนกฺขนฺธชาตกํ ฉฏฺฐํ.

๕๗. ยสฺเสเต จตุโร ธมฺมา, วานรินฺท ยถา ตว;

สจฺจํ ธมฺโม ธิติ [ธิตี (สี. ปี.)] จาโค, ทิฏฺฐํ โส อติวตฺตตีติ.

วานรินฺทชาตกํ สตฺตมํ.

๕๘. ยสฺเสเต จ [ยสฺส เอเต (สี. ปี.)] ตโย ธมฺมา, วานรินฺท ยถา ตว;

ทกฺขิยํ สูริยํ ปญฺญา, ทิฏฺฐํ โส อติวตฺตตีติ.

ตโยธมฺมชาตกํ อฏฺฐมํ.

๕๙. ธเม ธเม นาติธเม, อติธนฺตญฺหิ ปาปกํ;

ธนฺเตน หิ สตํ ลทฺธํ, อติธนฺเตน นาสิตนฺติ.

เภริวาทกชาตกํ นวมํ.

๖๐. ธเม ธเม นาติธเม, อติธนฺตญฺหิ ปาปกํ;

ธนฺเตนาธิคตา โภคา, เต ตาโต วิธมี ธมนฺติ.

สงฺขธมชาตกํ ทสมํ.

อาสีสวคฺโค ฉฏฺโฐ.

ตสฺสุทฺทานํ –

ยถา อิจฺฉึ ตถาหุทกา ถลา, สุร สาทุผโล จ อลีนมโน;

สมฺปหฏฺฐมโน จตุโร จ ตโย, สตลทฺธก โภคธเนน ทสาติ.