๗. อรหนฺตวคฺโค

๙๐. คตทฺธิโน วิโสกสฺส, วิปฺปมุตฺตสฺส สพฺพธิ;

สพฺพคนฺถปฺปหีนสฺส, ปริฬาโห น วิชฺชติ.

๙๑. อุยฺยุญฺชนฺติ สตีมนฺโต, น นิเกเต รมนฺติ เต;

หํสาว ปลฺลลํ หิตฺวา, โอกโมกํ ชหนฺติ เต.

๙๒. เยสํ สนฺนิจโย นตฺถิ, เย ปริญฺญาตโภชนา;

สุญฺญโต อนิมิตฺโต จ, วิโมกฺโข เยสํ โคจโร;

อากาเส ว สกุนฺตานํ [สกุณานํ (ก.)], คติ เตสํ ทุรนฺนยา.

๙๓. ยสฺสาสวา ปริกฺขีณา, อาหาเร จ อนิสฺสิโต;

สุญฺญโต อนิมิตฺโต จ, วิโมกฺโข ยสฺส โคจโร;

อากาเส ว สกุนฺตานํ, ปทํ ตสฺส ทุรนฺนยํ.

๙๔. ยสฺสินฺทฺริยานิ สมถงฺคตานิ [สมถํ คตานิ (สี. ปี.)], อสฺสา ยถา สารถินา สุทนฺตา;

ปหีนมานสฺส อนาสวสฺส, เทวาปิ ตสฺส ปิหยนฺติ ตาทิโน.

๙๕. ปถวิสโม โน วิรุชฺฌติ, อินฺทขิลุปโม [อินฺทขีลูปโม (สี. สฺยา. ก.)] ตาทิ สุพฺพโต;

รหโทว อเปตกทฺทโม, สํสารา น ภวนฺติ ตาทิโน.

๙๖. สนฺตํ ตสฺส มนํ โหติ, สนฺตา วาจา จ กมฺม จ;

สมฺมทญฺญา วิมุตฺตสฺส, อุปสนฺตสฺส ตาทิโน.

๙๗. อสฺสทฺโธ อกตญฺญู จ, สนฺธิจฺเฉโท จ โย นโร;

หตาวกาโส วนฺตาโส, ส เว อุตฺตมโปริโส.

๙๘. คาเม วา ยทิ วารญฺเญ, นินฺเน วา ยทิ วา ถเล;

ยตฺถ อรหนฺโต วิหรนฺติ, ตํ ภูมิรามเณยฺยกํ.

๙๙. รมณียานิ อรญฺญานิ, ยตฺถ น รมตี ชโน;

วีตราคา รมิสฺสนฺติ, น เต กามคเวสิโน.

อรหนฺตวคฺโค สตฺตโม นิฏฺฐิโต.