๕. พาลวคฺโค

๖๐. ทีฆา ชาครโต รตฺติ, ทีฆํ สนฺตสฺส โยชนํ;

ทีโฆ พาลานํ สํสาโร, สทฺธมฺมํ อวิชานตํ.

๖๑. จรญฺเจ นาธิคจฺเฉยฺย, เสยฺยํ สทิสมตฺตโน;

เอกจริยํ [เอกจริยํ (ก.)] ทฬฺหํ กยิรา, นตฺถิ พาเล สหายตา.

๖๒. ปุตฺตา มตฺถิ ธนมฺมตฺถิ [ปุตฺตมตฺถิ ธนมตฺถิ (ก.)], อิติ พาโล วิหญฺญติ;

อตฺตา หิ [อตฺตาปิ (?)] อตฺตโน นตฺถิ, กุโต ปุตฺตา กุโต ธนํ.

๖๓. โย พาโล มญฺญติ พาลฺยํ, ปณฺฑิโต วาปิ เตน โส;

พาโล จ ปณฺฑิตมานี, ส เว ‘‘พาโล’’ติ วุจฺจติ.

๖๔. ยาวชีวมฺปิ เจ พาโล, ปณฺฑิตํ ปยิรุปาสติ;

น โส ธมฺมํ วิชานาติ, ทพฺพี สูปรสํ ยถา.

๖๕. มุหุตฺตมปิ เจ วิญฺญู, ปณฺฑิตํ ปยิรุปาสติ;

ขิปฺปํ ธมฺมํ วิชานาติ, ชิวฺหา สูปรสํ ยถา.

๖๖. จรนฺติ พาลา ทุมฺเมธา, อมิตฺเตเนว อตฺตนา;

กโรนฺตา ปาปกํ กมฺมํ, ยํ โหติ กฏุกปฺผลํ.

๖๗. น ตํ กมฺมํ กตํ สาธุ, ยํ กตฺวา อนุตปฺปติ;

ยสฺส อสฺสุมุโข โรทํ, วิปากํ ปฏิเสวติ.

๖๘. ตญฺจ กมฺมํ กตํ สาธุ, ยํ กตฺวา นานุตปฺปติ;

ยสฺส ปตีโต สุมโน, วิปากํ ปฏิเสวติ.

๖๙. มธุวา [มธุํ วา (ที. นิ. ฏีกา ๑)] มญฺญติ พาโล, ยาว ปาปํ น ปจฺจติ;

ยทา จ ปจฺจติ ปาปํ, พาโล [อถ พาโล (สี. สฺยา.) อถ (?)] ทุกฺขํ นิคจฺฉติ.

๗๐. มาเส มาเส กุสคฺเคน, พาโล ภุญฺเชยฺย โภชนํ;

น โส สงฺขาตธมฺมานํ [สงฺขตธมฺมานํ (สี. ปี. ก.)], กลํ อคฺฆติ โสฬสึ.

๗๑. น หิ ปาปํ กตํ กมฺมํ, สชฺชุ ขีรํว มุจฺจติ;

ฑหนฺตํ พาลมเนฺวติ, ภสฺมจฺฉนฺโนว [ภสฺมาฉนฺโนว (สี. ปี. ก.)] ปาวโก.

๗๒. ยาวเทว อนตฺถาย, ญตฺตํ [ญาตํ (?)] พาลสฺส ชายติ;

หนฺติ พาลสฺส สุกฺกํสํ, มุทฺธมสฺส วิปาตยํ.

๗๓. อสนฺตํ ภาวนมิจฺเฉยฺย [อสนฺตํ ภาวมิจฺเฉยฺย (สฺยา.), อสนฺตภาวนมิจฺเฉยฺย (ก.)], ปุเรกฺขารญฺจ ภิกฺขุสุ;

อาวาเสสุ จ อิสฺสริยํ, ปูชา ปรกุเลสุ จ.

๗๔. มเมว กต มญฺญนฺตุ, คิหีปพฺพชิตา อุโภ;

มเมวาติวสา อสฺสุ, กิจฺจากิจฺเจสุ กิสฺมิจิ;

อิติ พาลสฺส สงฺกปฺโป, อิจฺฉา มาโน จ วฑฺฒติ.

๗๕. อญฺญา หิ ลาภูปนิสา, อญฺญา นิพฺพานคามินี;

เอวเมตํ อภิญฺญาย, ภิกฺขุ พุทฺธสฺส สาวโก;

สกฺการํ นาภินนฺเทยฺย, วิเวกมนุพฺรูหเย.

พาลวคฺโค ปญฺจโม นิฏฺฐิโต.