๑๘. มลวคฺโค

๒๓๕. ปณฺฑุปลาโสว ทานิสิ, ยมปุริสาปิ จ เต [ตํ (สี. สฺยา. กํ. ปี.)] อุปฏฺฐิตา;

อุยฺโยคมุเข จ ติฏฺฐสิ, ปาเถยฺยมฺปิ จ เต น วิชฺชติ.

๒๓๖. โส กโรหิ ทีปมตฺตโน, ขิปฺปํ วายม ปณฺฑิโต ภว;

นิทฺธนฺตมโล อนงฺคโณ, ทิพฺพํ อริยภูมึ อุเปหิสิ [ทิพฺพํ อริยภูมิเมหิสิ (สี. สฺยา. ปี.), ทิพฺพมริยภูมึ อุเปหิสิ (?)].

๒๓๗. อุปนีตวโย จ ทานิสิ, สมฺปยาโตสิ ยมสฺส สนฺติเก;

วาโส [วาโสปิ จ (พหูสุ)] เต นตฺถิ อนฺตรา, ปาเถยฺยมฺปิ จ เต น วิชฺชติ.

๒๓๘. โส กโรหิ ทีปมตฺตโน, ขิปฺปํ วายม ปณฺฑิโต ภว;

นิทฺธนฺตมโล อนงฺคโณ, น ปุนํ ชาติชรํ [น ปุน ชาติชรํ (สี. สฺยา.), น ปุน ชาติชฺชรํ (ก.)] อุเปหิสิ.

๒๓๙. อนุปุพฺเพน เมธาวี, โถกํ โถกํ ขเณ ขเณ;

กมฺมาโร รชตสฺเสว, นิทฺธเม มลมตฺตโน.

๒๔๐. อยสาว มลํ สมุฏฺฐิตํ [สมุฏฺฐาย (ก.)], ตตุฏฺฐาย [ตทุฏฺฐาย (สี. สฺยา. ปี.)] ตเมว ขาทติ;

เอวํ อติโธนจารินํ, สานิ กมฺมานิ [สกกมฺมานิ (สี. ปี.)] นยนฺติ ทุคฺคตึ.

๒๔๑. อสชฺฌายมลา มนฺตา, อนุฏฺฐานมลา ฆรา;

มลํ วณฺณสฺส โกสชฺชํ, ปมาโท รกฺขโต มลํ.

๒๔๒. มลิตฺถิยา ทุจฺจริตํ, มจฺเฉรํ ททโต มลํ;

มลา เว ปาปกา ธมฺมา, อสฺมึ โลเก ปรมฺหิ จ.

๒๔๓. ตโต มลา มลตรํ, อวิชฺชา ปรมํ มลํ;

เอตํ มลํ ปหนฺตฺวาน, นิมฺมลา โหถ ภิกฺขโว.

๒๔๔. สุชีวํ อหิริเกน, กากสูเรน ธํสินา;

ปกฺขนฺทินา ปคพฺเภน, สํกิลิฏฺเฐน ชีวิตํ.

๒๔๕. หิรีมตา จ ทุชฺชีวํ, นิจฺจํ สุจิคเวสินา;

อลีเนนาปฺปคพฺเภน, สุทฺธาชีเวน ปสฺสตา.

๒๔๖. โย ปาณมติปาเตติ, มุสาวาทญฺจ ภาสติ;

โลเก อทินฺนมาทิยติ, ปรทารญฺจ คจฺฉติ.

๒๔๗. สุราเมรยปานญฺจ, โย นโร อนุยุญฺชติ;

อิเธวเมโส โลกสฺมึ, มูลํ ขณติ อตฺตโน.

๒๔๘. เอวํ โภ ปุริส ชานาหิ, ปาปธมฺมา อสญฺญตา;

มา ตํ โลโภ อธมฺโม จ, จิรํ ทุกฺขาย รนฺธยุํ.

๒๔๙. ททาติ เว ยถาสทฺธํ, ยถาปสาทนํ [ยตฺถ ปสาทนํ (กตฺถจิ)] ชโน;

ตตฺถ โย มงฺกุ ภวติ [ตตฺถ เจ มํกุ โย โหติ (สี.), ตตฺถ โย มงฺกุโต โหติ (สฺยา.)], ปเรสํ ปานโภชเน;

น โส ทิวา วา รตฺตึ วา, สมาธิมธิคจฺฉติ.

๒๕๐. ยสฺส เจตํ สมุจฺฉินฺนํ, มูลฆจฺจํ [มูลฆจฺฉํ (ก.)] สมูหตํ;

ส เว ทิวา วา รตฺตึ วา, สมาธิมธิคจฺฉติ.

๒๕๑. นตฺถิ ราคสโม อคฺคิ, นตฺถิ โทสสโม คโห;

นตฺถิ โมหสมํ ชาลํ, นตฺถิ ตณฺหาสมา นที.

๒๕๒. สุทสฺสํ วชฺชมญฺเญสํ, อตฺตโน ปน ทุทฺทสํ;

ปเรสํ หิ โส วชฺชานิ, โอปุนาติ [โอผุนาติ (ก.)] ยถา ภุสํ;

อตฺตโน ปน ฉาเทติ, กลึว กิตวา สโฐ.

๒๕๓. ปรวชฺชานุปสฺสิสฺส, นิจฺจํ อุชฺฌานสญฺญิโน;

อาสวา ตสฺส วฑฺฒนฺติ, อารา โส อาสวกฺขยา.

๒๕๔. อากาเสว ปทํ นตฺถิ, สมโณ นตฺถิ พาหิเร;

ปปญฺจาภิรตา ปชา, นิปฺปปญฺจา ตถาคตา.

๒๕๕. อากาเสว ปทํ นตฺถิ, สมโณ นตฺถิ พาหิเร;

สงฺขารา สสฺสตา นตฺถิ, นตฺถิ พุทฺธานมิญฺชิตํ.

มลวคฺโค อฏฺฐารสโม นิฏฺฐิโต.