๑๕. สุขวคฺโค

๑๙๗. สุสุขํ วต ชีวาม, เวริเนสุ อเวริโน;

เวริเนสุ มนุสฺเสสุ, วิหราม อเวริโน.

๑๙๘. สุสุขํ วต ชีวาม, อาตุเรสุ อนาตุรา;

อาตุเรสุ มนุสฺเสสุ, วิหราม อนาตุรา.

๑๙๙. สุสุขํ วต ชีวาม, อุสฺสุเกสุ อนุสฺสุกา;

อุสฺสุเกสุ มนสฺเสสุ, วิหราม อนุสฺสุกา.

๒๐๐. สุสุขํ วต ชีวาม, เยสํ โน นตฺถิ กิญฺจนํ;

ปีติภกฺขา ภวิสฺสาม, เทวา อาภสฺสรา ยถา.

๒๐๑. ชยํ เวรํ ปสวติ, ทุกฺขํ เสติ ปราชิโต;

อุปสนฺโต สุขํ เสติ, หิตฺวา ชยปราชยํ.

๒๐๒. นตฺถิ ราคสโม อคฺคิ, นตฺถิ โทสสโม กลิ;

นตฺถิ ขนฺธสมา [ขนฺธาทิสา (สี. สฺยา. ปี. รูปสิทฺธิยา สเมติ)] ทุกฺขา, นตฺถิ สนฺติปรํ สุขํ.

๒๐๓. ชิฆจฺฉาปรมา โรคา, สงฺขารปรมา [สงฺการา ปรมา (พหูสุ)] ทุขา;

เอตํ ญตฺวา ยถาภูตํ, นิพฺพานํ ปรมํ สุขํ.

๒๐๔. อาโรคฺยปรมา ลาภา, สนฺตุฏฺฐิปรมํ ธนํ;

วิสฺสาสปรมา ญาติ [วิสฺสาสปรโม ญาติ (ก. สี.), วิสฺสาสปรมา ญาตี (สี. อฏฺฐ.), วิสฺสาสา ปรมา ญาติ (ก.)], นิพฺพานํ ปรมํ [นิพฺพาณปรมํ (ก. สี.)] สุขํ.

๒๐๕. ปวิเวกรสํ ปิตฺวา [ปีตฺวา (สี. สฺยา. กํ. ปี.)], รสํ อุปสมสฺส จ;

นิทฺทโร โหติ นิปฺปาโป, ธมฺมปีติรสํ ปิวํ.

๒๐๖. สาหุ ทสฺสนมริยานํ, สนฺนิวาโส สทา สุโข;

อทสฺสเนน พาลานํ, นิจฺจเมว สุขี สิยา.

๒๐๗. พาลสงฺคตจารี [พาลสงฺคติจารี (ก.)] หิ, ทีฆมทฺธาน โสจติ;

ทุกฺโข พาเลหิ สํวาโส, อมิตฺเตเนว สพฺพทา;

ธีโร จ สุขสํวาโส, ญาตีนํว สมาคโม.

๒๐๘. ตสฺมา หิ –

ธีรญฺจ ปญฺญญฺจ พหุสฺสุตญฺจ, โธรยฺหสีลํ วตวนฺตมริยํ;

ตํ ตาทิสํ สปฺปุริสํ สุเมธํ, ภเชถ นกฺขตฺตปถํว จนฺทิมา [ตสฺมา หิ ธีรํ ปญฺญญฺจ, พหุสฺสุตญฺจ โธรยฺหํ; สีลํ ธุตวตมริยํ, ตํ ตาทิสํ สปฺปุริสํ; สุเมธํ ภเชถ นกฺขตฺตปถํว จนฺทิมา; (ก.)].

สุขวคฺโค ปนฺนรสโม นิฏฺฐิโต.