๑๑. ชราวคฺโค

๑๔๖. โก นุ หาโส [กินฺนุ หาโส (ก.)] กิมานนฺโท, นิจฺจํ ปชฺชลิเต สติ;

อนฺธกาเรน โอนทฺธา, ปทีปํ น คเวสถ.

๑๔๗. ปสฺส จิตฺตกตํ พิมฺพํ, อรุกายํ สมุสฺสิตํ;

อาตุรํ พหุสงฺกปฺปํ, ยสฺส นตฺถิ ธุวํ ฐิติ.

๑๔๘. ปริชิณฺณมิทํ รูปํ, โรคนีฬํ [โรคนิฑฺฒํ (สี. ปี.), โรคนิทฺธํ (สฺยา.)] ปภงฺคุรํ;

ภิชฺชติ ปูติสนฺเทโห, มรณนฺตญฺหิ ชีวิตํ.

๑๔๙. ยานิมานิ อปตฺถานิ [ยานิมานิ อปตฺถานิ (สี. สฺยา. ปี.), ยานิมานิ’ปวิทฺธานิ (?)], อลาพูเนว [อลาปูเนว (สี. สฺยา. ปี.)] สารเท;

กาโปตกานิ อฏฺฐีนิ, ตานิ ทิสฺวาน กา รติ.

๑๕๐. อฏฺฐีนํ นครํ กตํ, มํสโลหิตเลปนํ;

ยตฺถ ชรา จ มจฺจุ จ, มาโน มกฺโข จ โอหิโต.

๑๕๑. ชีรนฺติ เว ราชรถา สุจิตฺตา, อโถ สรีรมฺปิ ชรํ อุเปติ;

สตญฺจ ธมฺโม น ชรํ อุเปติ, สนฺโต หเว สพฺภิ ปเวทยนฺติ.

๑๕๒. อปฺปสฺสุตายํ ปุริโส, พลิพทฺโธว [พลิวทฺโทว (สี. สฺยา. ปี.)] ชีรติ;

มํสานิ ตสฺส วฑฺฒนฺติ, ปญฺญา ตสฺส น วฑฺฒติ.

๑๕๓. อเนกชาติสํสารํ, สนฺธาวิสฺสํ อนิพฺพิสํ;

คหการํ [คหการกํ (สี. สฺยา. ปี.)] คเวสนฺโต, ทุกฺขา ชาติ ปุนปฺปุนํ.

๑๕๔. คหการก ทิฏฺโฐสิ, ปุน เคหํ น กาหสิ;

สพฺพา เต ผาสุกา ภคฺคา, คหกูฏํ วิสงฺขตํ;

วิสงฺขารคตํ จิตฺตํ, ตณฺหานํ ขยมชฺฌคา.

๑๕๕. อจริตฺวา พฺรหฺมจริยํ, อลทฺธา โยพฺพเน ธนํ;

ชิณฺณโกญฺจาว ฌายนฺติ, ขีณมจฺเฉว ปลฺลเล.

๑๕๖. อจริตฺวา พฺรหฺมจริยํ, อลทฺธา โยพฺพเน ธนํ;

เสนฺติ จาปาติขีณาว, ปุราณานิ อนุตฺถุนํ.

ชราวคฺโค เอกาทสโม นิฏฺฐิโต.