๗. เรวตพุทฺธวํโส

๑. สุมนสฺส อปเรน, เรวโต นาม นายโก;

อนูปโม อสทิโส, อตุโล อุตฺตโม ชิโน.

๒. โสปิ ธมฺมํ ปกาเสสิ, พฺรหฺมุนา อภิยาจิโต;

ขนฺธธาตุววตฺถานํ, อปฺปวตฺตํ ภวาภเว.

๓. ตสฺสาภิสมยา ตีณิ, อเหสุํ ธมฺมเทสเน;

คณนาย น วตฺตพฺโพ, ปฐมาภิสมโย อหุ.

๔. ยทา อรินฺทมํ ราชํ [ราชานํ (ก.)], วิเนสิ เรวโต มุนิ;

ตทา โกฏิสหสฺสานํ, ทุติยาภิสมโย อหุ.

๕. สตฺตาหํ ปฏิสลฺลานา, วุฏฺฐหิตฺวา นราสโภ;

โกฏิสตํ นรมรูนํ, วิเนสิ อุตฺตเม ผเล.

๖. สนฺนิปาตา ตโย อาสุํ, เรวตสฺส มเหสิโน;

ขีณาสวานํ วิมลานํ, สุวิมุตฺตาน ตาทินํ.

๗. อติกฺกนฺตา คณนปถํ, ปฐมํ เย สมาคตา;

โกฏิสตสหสฺสานํ, ทุติโย อาสิ สมาคโม.

๘. โยปิ [โย โส (สฺยา. กํ. ก.)] ปญฺญาย อสโม, ตสฺส จกฺกานุวตฺตโก;

โส ตทา พฺยาธิโต อาสิ, ปตฺโต ชีวิตสํสยํ.

๙. ตสฺส คิลานปุจฺฉาย, เย ตทา อุปคตา มุนี;

โกฏิสหสฺสา อรหนฺโต, ตติโย อาสิ สมาคโม.

๑๐. อหํ เตน สมเยน, อติเทโว นาม พฺราหฺมโณ;

อุปคนฺตฺวา เรวตํ พุทฺธํ, สรณํ ตสฺส คญฺฉหํ.

๑๑. ตสฺส สีลํ สมาธิญฺจ, ปญฺญาคุณมนุตฺตมํ;

โถมยิตฺวา ยถาถามํ, อุตฺตรียมทาสหํ.

๑๒. โสปิ มํ พุทฺโธ พฺยากาสิ, เรวโต โลกนายโก;

‘‘อปริเมยฺยิโต กปฺเป, อยํ พุทฺโธ ภวิสฺสติ.

๑๓. ‘‘ปธานํ ปทหิตฺวาน…เป… เหสฺสาม สมฺมุขา อิมํ’’.

๑๔. ตสฺสาปิ วจนํ สุตฺวา, ภิยฺโย จิตฺตํ ปสาทยึ;

อุตฺตรึ วตมธิฏฺฐาสึ, ทสปารมิปูริยา.

๑๕. ตทาปิ ตํ พุทฺธธมฺมํ, สริตฺวา อนุพฺรูหยึ;

อาหริสฺสามิ ตํ ธมฺมํ, ยํ มยฺหํ อภิปตฺถิตํ.

๑๖. นครํ สุธญฺญวตี นาม [สุธมฺมกํ นาม (สี.), สุธญฺญกํ นาม (สฺยา.)], วิปุโล นาม ขตฺติโย;

วิปุลา นาม ชนิกา, เรวตสฺส มเหสิโน.

๑๗. ฉ จ วสฺสสหสฺสานิ [ฉพฺพสฺสสหสฺสานิ (สี. สฺยา.)], อคารํ อชฺฌ โส วสิ;

สุทสฺสโน รตนคฺฆิ, อาเวโฬ จ วิภูสิโต;

ปุญฺญกมฺมาภินิพฺพตฺตา, ตโย ปาสาทมุตฺตมา.

๑๘. เตตฺตึส จ สหสฺสานิ, นาริโย สมลงฺกตา;

สุทสฺสนา นาม นารี, วรุโณ นาม อตฺรโช.

๑๙. นิมิตฺเต จตุโร ทิสฺวา, รถยาเนน นิกฺขมิ;

อนูนสตฺตมาสานิ, ปธานํ ปทหี ชิโน.

๒๐. พฺรหฺมุนา ยาจิโต สนฺโต, เรวโต โลกนายโก;

วตฺติ จกฺกํ มหาวีโร, วรุณาราเม สิรีฆเร.

๒๑. วรุโณ พฺรหฺมเทโว จ, อเหสุํ อคฺคสาวกา;

สมฺภโว นามุปฏฺฐาโก, เรวตสฺส มเหสิโน.

๒๒. ภทฺทา เจว สุภทฺทา จ, อเหสุํ อคฺคสาวิกา;

โสปิ พุทฺโธ อสมสโม, นาคมูเล อพุชฺฌถ.

๒๓. ปทุโม กุญฺชโร เจว, อเหสุํ อคฺคุปฏฺฐิกา;

สิรีมา เจว ยสวตี, อเหสุํ อคฺคุปฏฺฐิกา.

๒๔. อุจฺจตฺตเนน โส พุทฺโธ, อสีติหตฺถมุคฺคโต;

โอภาเสติ ทิสา สพฺพา, อินฺทเกตุว อุคฺคโต.

๒๕. ตสฺส สรีเร นิพฺพตฺตา, ปภามาลา อนุตฺตรา;

ทิวา วา ยทิ วา รตฺตึ, สมนฺตา ผรติ โยชนํ.

๒๖. สฏฺฐิวสฺสสหสฺสานิ, อายุ วิชฺชติ ตาวเท;

ตาวตา ติฏฺฐมาโน โส, ตาเรสิ ชนตํ พหุํ.

๒๗. ทสฺสยิตฺวา พุทฺธพลํ, อมตํ โลเก ปกาสยํ;

นิพฺพายิ อนุปาทาโน, ยถคฺคุปาทานสงฺขยา.

๒๘. โส จ กาโย รตนนิโภ, โส จ ธมฺโม อสาทิโส;

สพฺพํ ตมนฺตรหิตํ, นนุ ริตฺตา สพฺพสงฺขารา.

๒๙. เรวโต ยสธโร พุทฺโธ, นิพฺพุโต โส มหาปุเร;

ธาตุวิตฺถาริกํ อาสิ, เตสุ เตสุ ปเทสโตติ.

เรวตสฺส ภควโต วํโส ปญฺจโม.