๒๙. ธาตุภาชนียกถา

๑. มหาโคตโม ชินวโร, กุสินารมฺหิ นิพฺพุโต;

ธาตุวิตฺถาริกํ อาสิ, เตสุ เตสุ ปเทสโต.

๒. เอโก อชาตสตฺตุสฺส, เอโก เวสาลิยา ปุเร;

เอโก กปิลวตฺถุสฺมึ, เอโก จ อลฺลกปฺปเก.

๓. เอโก จ รามคามมฺหิ, เอโก จ เวฐทีปเก;

เอโก ปาเวยฺยเก มลฺเล, เอโก จ โกสินารเก.

๔. กุมฺภสฺส ถูปํ กาเรสิ, พฺราหฺมโณ โทณสวฺหโย;

องฺคารถูปํ กาเรสุํ, โมริยา ตุฏฺฐมานสา.

๕. อฏฺฐ สารีริกา ถูปา, นวโม กุมฺภเจติโย;

องฺคารถูโป ทสโม, ตทาเยว ปติฏฺฐิโต.

๖. อุณฺหีสํ จตสฺโส ทาฐา, อกฺขกา เทฺว จ ธาตุโย;

อสมฺภินฺนา อิมา สตฺต, เสสา ภินฺนาว ธาตุโย.

๗. มหนฺตา มุคฺคมตฺตา จ [มุคฺคมาสาว (ก.)], มชฺฌิมา ภินฺนตณฺฑุลา;

ขุทฺทกา สาสปมตฺตา จ, นานาวณฺณา จ ธาตุโย.

๘. มหนฺตา สุวณฺณวณฺณา จ, มุตฺตวณฺณา จ มชฺฌิมา;

ขุทฺทกา มกุลวณฺณา จ, โสฬสโทณมตฺติกา.

๙. มหนฺตา ปญฺจ นาฬิโย, นาฬิโย ปญฺจ มชฺฌิมา;

ขุทฺทกา ฉ นาฬี เจว, เอตา สพฺพาปิ ธาตุโย.

๑๐. อุณฺหีสํ สีหเฬ ทีเป, พฺรหฺมโลเก จ วามกํ;

สีหเฬ ทกฺขิณกฺขญฺจ, สพฺพาเปตา ปติฏฺฐิตา.

๑๑. เอกา ทาฐา ติทสปุเร, เอกา นาคปุเร อหุ;

เอกา คนฺธารวิสเย, เอกา กลิงฺคราชิโน.

๑๒. จตฺตาลีสสมา ทนฺตา, เกสา โลมา จ สพฺพโส;

เทวา หรึสุ เอเกกํ, จกฺกวาฬปรมฺปรา.

๑๓. วชิรายํ ภควโต, ปตฺโต ทณฺฑญฺจ จีวรํ;

นิวาสนํ กุลฆเร, ปจฺจตฺถรณํ กปิลวฺหเย [สิลวฺหเย (สฺยา.)].

๑๔. ปาฏลิปุตฺตปุรมฺหิ, กรณํ กายพนฺธนํ;

จมฺปายุทกสาฏิยํ, อุณฺณโลมญฺจ โกสเล.

๑๕. กาสาวํ พฺรหฺมโลเก จ, เวฐนํ ติทเส ปุเร;

นิสีทนํ อวนฺตีสุ, รฏฺเฐ [เทวรฏฺเฐ (สฺยา.)] อตฺถรณํ ตทา.

๑๖. อรณี จ มิถิลายํ, วิเทเห ปริสาวนํ;

วาสิ สูจิฆรญฺจาปิ, อินฺทปตฺถปุเร ตทา.

๑๗. ปริกฺขารา อวเสสา, ชนปเท อปรนฺตเก;

ปริภุตฺตานิ มุนินา, อกํสุ มนุชา ตทา.

๑๘. ธาตุวิตฺถาริกํ อาสิ, โคตมสฺส มเหสิโน;

ปาณีนํ อนุกมฺปาย, อหุ โปราณิกํ ตทาติ.

ธาตุภาชนียกถา นิฏฺฐิตา.