๑๔. สุชาตพุทฺธวํโส

๑. ตตฺเถว มณฺฑกปฺปมฺหิ, สุชาโต นาม นายโก;

สีหหนุสภกฺขนฺโธ, อปฺปเมยฺโย ทุราสโท.

๒. จนฺโทว วิมโล สุทฺโธ, สตรํสีว ปตาปวา;

เอวํ โสภติ สมฺพุทฺโธ, ชลนฺโต สิริยา สทา.

๓. ปาปุณิตฺวาน สมฺพุทฺโธ, เกวลํ โพธิมุตฺตมํ;

สุมงฺคลมฺหิ นคเร, ธมฺมจกฺกํ ปวตฺตยิ.

๔. เทเสนฺเต [เทเสนฺโต (สฺยา. กํ.)] ปวรํ ธมฺมํ, สุชาเต โลกนายเก [สุชาโต โลกนายโก (สฺยา. กํ.)];

อสีติโกฏี อภิสมึสุ, ปฐเม ธมฺมเทสเน.

๕. ยทา สุชาโต อมิตยโส, เทเว วสฺสํ อุปาคมิ;

สตฺตตึสสตสหสฺสานํ, ทุติยาภิสมโย อหุ.

๖. ยทา สุชาโต อสมสโม, อุปคจฺฉิ ปิตุสนฺติกํ;

สฏฺฐิสตสหสฺสานํ [สตฺตตึสสหสฺสานํ (สี.)], ตติยาภิสมโย อหุ.

๗. สนฺนิปาตา ตโย อาสุํ, สุชาตสฺส มเหสิโน;

ขีณาสวานํ วิมลานํ, สนฺตจิตฺตาน ตาทินํ.

๘. อภิญฺญาพลปฺปตฺตานํ, อปฺปตฺตานํ ภวาภเว;

สฏฺฐิสตสหสฺสานิ, ปฐมํ สนฺนิปตึสุ เต.

๙. ปุนาปรํ สนฺนิปาเต, ติทิโวโรหเณ ชิเน;

ปญฺญาสสตสหสฺสานํ, ทุติโย อาสิ สมาคโม.

๑๐. อุปสงฺกมนฺโต นราสภํ, ตสฺส โย อคฺคสาวโก;

จตูหิ สตสหสฺเสหิ, สมฺพุทฺธํ อุปสงฺกมิ.

๑๑. อหํ เตน สมเยน, จตุทีปมฺหิ อิสฺสโร;

อนฺตลิกฺขจโร อาสึ, จกฺกวตฺตี มหพฺพโล.

๑๒. โลเก อจฺฉริยํ ทิสฺวา, อพฺภุตํ โลมหํสนํ;

อุปคนฺตฺวาน วนฺทึ โส, สุชาตํ โลกนายกํ.

๑๓. จตุทีเป มหารชฺชํ, รตเน สตฺต อุตฺตเม;

พุทฺเธ นิยฺยาทยิตฺวาน, ปพฺพชึ ตสฺส สนฺติเก.

๑๔. อารามิกา ชนปเท, อุฏฺฐานํ ปฏิปิณฺฑิย;

อุปเนนฺติ ภิกฺขุสงฺฆสฺส, ปจฺจยํ สยนาสนํ.

๑๕. โสปิ มํ พุทฺโธ [ตทา (สฺยา. กํ.)] พฺยากาสิ, ทสสหสฺสิมฺหิ อิสฺสโร;

‘‘ตึสกปฺปสหสฺสมฺหิ, อยํ พุทฺโธ ภวิสฺสติ.

๑๖. ‘‘ปธานํ ปทหิตฺวาน…เป… เหสฺสาม สมฺมุขา อิมํ’’.

๑๗. ตสฺสาปิ วจนํ สุตฺวา, ภิยฺโย หาสํ ชเนสหํ;

อธิฏฺฐหึ วตํ อุคฺคํ, ทสปารมิปูริยา.

๑๘. สุตฺตนฺตํ วินยญฺจาปิ, นวงฺคํ สตฺถุสาสนํ;

สพฺพํ ปริยาปุณิตฺวาน, โสภยึ ชินสาสนํ.

๑๙. ตตฺถปฺปมตฺโต วิหรนฺโต, พฺรหฺมํ ภาเวตฺว ภาวนํ;

อภิญฺญาปารมึ คนฺตฺวา, พฺรหฺมโลกมคญฺฉหํ.

๒๐. สุมงฺคลํ นาม นครํ, อุคฺคโต นาม ขตฺติโย;

มาตา ปภาวตี นาม, สุชาตสฺส มเหสิโน.

๒๑. นววสฺสสหสฺสานิ, อคารํ อชฺฌ โส วสิ;

สิรี อุปสิรี นนฺโท, ตโย ปาสาทมุตฺตมา.

๒๒. เตวีสติสหสฺสานิ, นาริโย สมลงฺกตา;

สิรินนฺทา นาม นารี, อุปเสโน นาม อตฺรโช.

๒๓. นิมิตฺเต จตุโร ทิสฺวา, อสฺสยาเนน นิกฺขมิ;

อนูนนวมาสานิ, ปธานํ ปทหี ชิโน.

๒๔. พฺรหฺมุนา ยาจิโต สนฺโต, สุชาโต โลกนายโก;

วตฺติ จกฺกํ มหาวีโร, สุมงฺคลุยฺยานมุตฺตเม.

๒๕. สุทสฺสโน สุเทโว จ, อเหสุํ อคฺคสาวกา;

นารโท นามุปฏฺฐาโก, สุชาตสฺส มเหสิโน.

๒๖. นาคา จ นาคสมาลา จ, อเหสุํ อคฺคสาวิกา;

โพธิ ตสฺส ภควโต, มหาเวฬูติ วุจฺจติ.

๒๗. โส จ รุกฺโข ฆนกฺขนฺโธ [ฆนรุจิโร (สี. ก.)], อจฺฉิทฺโท โหติ ปตฺติโก;

อุชุ วํโส พฺรหา โหติ, ทสฺสนีโย มโนรโม.

๒๘. เอกกฺขนฺโธ ปวฑฺฒิตฺวา, ตโต สาขา ปภิชฺชติ;

ยถา สุพทฺโธ โมรหตฺโถ, เอวํ โสภติ โส ทุโม.

๒๙. น ตสฺส กณฺฏกา โหนฺติ, นาปิ ฉิทฺทํ มหา อหุ;

วิตฺถิณฺณสาโข อวิรโล, สนฺทจฺฉาโย มโนรโม.

๓๐. สุทตฺโต เจว จิตฺโต จ, อเหสุํ อคฺคุปฏฺฐกา;

สุภทฺทา จ ปทุมา จ, อเหสุํ อคฺคุปฏฺฐิกา.

๓๑. ปญฺญาสรตโน อาสิ, อุจฺจตฺตเนน โส ชิโน;

สพฺพาการวรูเปโต, สพฺพคุณมุปาคโต.

๓๒. ตสฺส ปภา อสมสมา, นิทฺธาวติ สมนฺตโต;

อปฺปมาโณ อตุลิโย, โอปมฺเมหิ อนูปโม.

๓๓. นวุติวสฺสสหสฺสานิ, อายุ วิชฺชติ ตาวเท;

ตาวตา ติฏฺฐมาโน โส, ตาเรสิ ชนตํ พหุํ.

๓๔. ยถาปิ สาคเร อูมี, คคเน ตารกา ยถา;

เอวํ ตทา ปาวจนํ, อรหนฺเตหิ จิตฺติตํ [จิตฺตกํ (สฺยา. กํ.)].

๓๕. โส จ พุทฺโธ อสมสโม, คุณานิ จ ตานิ อตุลิยานิ;

สพฺพํ ตมนฺตรหิตํ, นนุ ริตฺตา สพฺพสงฺขารา.

๓๖. สุชาโต ชินวโร พุทฺโธ, สิลารามมฺหิ นิพฺพุโต;

ตตฺเถว ตสฺส เจติโย [ตตฺเถว เจติโย สตฺถุ (สฺยา. กํ.)], ตีณิคาวุตมุคฺคโตติ.

สุชาตสฺส ภควโต วํโส ทฺวาทสโม.