๖. สปริวาราสนตฺเถรอปทานํ

๔๓. ‘‘ปทุมุตฺตรพุทฺธสฺส, ปิณฺฑปาตํ อทาสหํ;

คนฺตฺวา กิลิฏฺฐกํ ฐานํ [ตํ โภชนฏฺฐานํ (สี.)], มลฺลิกาหิ ปริกฺขิตํ [ปริกฺขิปึ (สี.)].

๔๔. ‘‘ตมฺหาสนมฺหิ อาสีโน, พุทฺโธ โลกคฺคนายโก;

อกิตฺตยิ ปิณฺฑปาตํ, อุชุภูโต สมาหิโต.

๔๕. ‘‘ยถาปิ ภทฺทเก เขตฺเต, พีชํ อปฺปมฺปิ โรปิตํ;

สมฺมา ธารํ ปเวจฺฉนฺเต, ผลํ โตเสติ กสฺสกํ.

๔๖. ‘‘ตเถวายํ ปิณฺฑปาโต, สุเขตฺเต โรปิโต ตยา;

ภเว นิพฺพตฺตมานมฺหิ, ผลํ เต [นิพฺพตฺตมานํ หิ, ผลโต (สี.)] โตสยิสฺสติ [ตปฺปยิสฺสติ (ก.)].

๔๗. ‘‘อิทํ วตฺวาน สมฺพุทฺโธ, ชลชุตฺตมนามโก;

ปิณฺฑปาตํ คเหตฺวาน, ปกฺกามิ อุตฺตรามุโข.

๔๘. ‘‘สํวุโต ปาติโมกฺขสฺมึ, อินฺทฺริเยสุ จ ปญฺจสุ;

ปวิเวกมนุยุตฺโต, วิหรามิ อนาสโว.

๔๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สปริวาราสโน เถโร อิมา คาถาโย อภาสิตฺถาติ.

สปริวาราสนตฺเถรสฺสาปทานํ ฉฏฺฐํ.