๑๐. โมฆราชตฺเถรอปทานํ

๓๒๗. ‘‘ปทุมุตฺตโร นาม ชิโน, สพฺพโลกวิทู มุนิ;

อิโต สตสหสฺสมฺหิ, กปฺเป อุปฺปชฺชิ จกฺขุมา.

๓๒๘. ‘‘โอวาทโก วิญฺญาปโก, ตารโก สพฺพปาณินํ;

เทสนากุสโล พุทฺโธ, ตาเรสิ ชนตํ พหุํ.

๓๒๙. ‘‘อนุกมฺปโก การุณิโก, หิเตสี สพฺพปาณินํ;

สมฺปตฺเต ติตฺถิเย สพฺเพ, ปญฺจสีเล ปติฏฺฐปิ.

๓๓๐. ‘‘เอวํ นิรากุลํ อาสิ, สุญฺญตํ ติตฺถิเยหิ จ;

วิจิตฺตํ อรหนฺเตหิ, วสีภูเตหิ ตาทิภิ.

๓๓๑. ‘‘รตนานฏฺฐปญฺญาสํ, อุคฺคโต โส มหามุนิ;

กญฺจนคฺฆิยสงฺกาโส, พาตฺตึสวรลกฺขโณ.

๓๓๒. ‘‘วสฺสสตสหสฺสานิ, อายุ วิชฺชติ ตาวเท;

ตาวตา ติฏฺฐมาโน โส, ตาเรสิ ชนตํ พหุํ.

๓๓๓. ‘‘ตทาหํ หํสวติยํ, กุเล อญฺญตเร อหุํ;

ปรกมฺมายเน ยุตฺโต, นตฺถิ เม กิญฺจิ สํธนํ.

๓๓๔. ‘‘ปฏิกฺกมนสาลายํ, วสนฺโต กตภูมิยํ;

อคฺคึ อุชฺชาลยึ ตตฺถ, ทฬฺหํ กณฺหาสิ สา [กณฺหา สิยา (สี. ปี.), ฑยฺหกณฺหา สิลา (สฺยา.)] หี.

๓๓๕. ‘‘ตทา ปริสตึ นาโถ, จตุสจฺจปกาสโก;

สาวกํ สมฺปกิตฺเตสิ, ลูขจีวรธารกํ.

๓๓๖. ‘‘ตสฺส ตมฺหิ คุเณ ตุฏฺโฐ, ปณิปจฺจ [ปติปชฺช (สฺยา.)] ตถาคตํ;

ลูขจีวรธารคฺคํ, ปตฺถยึ ฐานมุตฺตมํ.

๓๓๗. ‘‘ตทา อโวจ ภควา, สาวเก ปทุมุตฺตโร;

‘ปสฺสเถตํ ปุริสกํ, กุเจลํ ตนุเทหกํ.

๓๓๘. ‘‘‘ปีติปฺปสนฺนวทนํ, สทฺธาธนสมนฺวิตํ [สทฺธาเสฺนหสมนฺวตํ (ก.)];

อุทคฺคตนุชํ หฏฺฐํ, อจลํ สาลปิณฺฑิตํ.

๓๓๙. ‘‘‘เอโส ปตฺเถติ ตํ ฐานํ, สจฺจเสนสฺส ภิกฺขุโน;

ลูขจีวรธาริสฺส, ตสฺส วณฺณสิตาสโย [วณฺณคตาสโย (สี. สฺยา. ปี.)].

๓๔๐. ‘‘ตํ สุตฺวา มุทิโต หุตฺวา, นิปจฺจ สิรสา ชินํ;

ยาวชีวํ สุภํ กมฺมํ, กริตฺวา ชินสาสเน.

๓๔๑. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสูปโค อหํ.

๓๔๒. ‘‘ปฏิกฺกมนสาลายํ, ภูมิทาหกกมฺมุนา;

สมสหสฺสํ นิรเย, อทยฺหึ เวทนาฏฺฏิโต.

๓๔๓. ‘‘เตน กมฺมาวเสเสน, ปญฺจ ชาติสตานิหํ;

มนุสฺโส กุลโช หุตฺวา, ชาติยา ลกฺขณงฺกิโต.

๓๔๔. ‘‘ปญฺจ ชาติสตาเนว, กุฏฺฐโรคสมปฺปิโต;

มหาทุกฺขํ อนุภวึ, ตสฺส กมฺมสฺส วาหสา.

๓๔๕. ‘‘อิมสฺมึ ภทฺทเก กปฺเป, อุปริฏฺฐํ ยสสฺสินํ;

ปิณฺฑปาเตน ตปฺเปสึ, ปสนฺนมานโส อหํ.

๓๔๖. ‘‘เตน กมฺมวิเสเสน, เจตนาปณิธีหิ จ;

ชหิตฺวา มานุสํ เทหํ, ตาวตึสมคจฺฉหํ.

๓๔๗. ‘‘ปจฺฉิเม ภเว สมฺปตฺเต, อชายึ ขตฺติเย กุเล;

ปิตุโน อจฺจเยนาหํ, มหารชฺชสมปฺปิโต.

๓๔๘. ‘‘กุฏฺฐโรคาธิภูโตหํ, น รตึ น สุขํ ลเภ;

โมฆํ รชฺชํ สุขํ ยสฺมา, โมฆราชา ตโต อหํ.

๓๔๙. ‘‘กายสฺส โทสํ ทิสฺวาน, ปพฺพชึ อนคาริยํ;

พาวริสฺส ทิชคฺคสฺส, สิสฺสตฺตํ อชฺฌุปาคมึ.

๓๕๐. ‘‘มหตา ปริวาเรน, อุเปจฺจ นรนายกํ;

อปุจฺฉึ นิปุณํ ปญฺหํ, ตํ วีรํ วาทิสูทนํ.

๓๕๑. ‘‘‘อยํ โลโก ปโร โลโก, พฺรหฺมโลโก สเทวโก;

ทิฏฺฐึ โน [ทิฏฺฐา โน (สี.), ทิฏฺฐํ โน (ปี.), ทิฏฺฐึ เต (สฺยา.)] นาภิชานามิ, โคตมสฺส ยสสฺสิโน.

๓๕๒. ‘‘‘เอวาภิกฺกนฺตทสฺสาวึ, อตฺถิ ปเญฺหน อาคมํ;

กถํ โลกํ อเวกฺขนฺตํ, มจฺจุราชา น ปสฺสติ’.

๓๕๓. ‘‘‘สุญฺญโต โลกํ อเวกฺขสฺสุ, โมฆราช สทา สโต;

อตฺตานุทิฏฺฐึ อุหจฺจ, เอวํ มจฺจุตโร สิยา.

๓๕๔. ‘‘‘เอวํ โลกํ อเวกฺขนฺตํ, มจฺจุราชา น ปสฺสติ’;

อิติ มํ อภณิ พุทฺโธ, สพฺพโรคติกิจฺฉโก.

๓๕๕. ‘‘สห คาถาวสาเนน, เกสมสฺสุวิวชฺชิโต;

กาสาววตฺถวสโน, อาสึ ภิกฺขุ ตถารหา.

๓๕๖. ‘‘สงฺฆิเกสุ วิหาเรสุ, น วสึ โรคปีฬิโต;

มา วิหาโร ปทุสฺสีติ, วาตโรเคหิ ปีฬิโต [วาจายาภิสุปีฬิโต (สฺยา. ปี.), วาตโรคี สุปีฬิโต (ก.)].

๓๕๗. ‘‘สงฺการกูฏา อาหิตฺวา, สุสานา รถิกาหิ จ;

ตโต สงฺฆาฏึ กริตฺวา, ธารยึ ลูขจีวรํ.

๓๕๘. ‘‘มหาภิสกฺโก ตสฺมึ เม, คุเณ ตุฏฺโฐ วินายโก;

ลูขจีวรธารีนํ, เอตทคฺเค ฐเปสิ มํ.

๓๕๙. ‘‘ปุญฺญปาปปริกฺขีโณ, สพฺพโรควิวชฺชิโต;

สิขีว อนุปาทาโน, นิพฺพายิสฺสมนาสโว.

๓๖๐. ‘‘กิเลสา ฌาปิตา มยฺหํ…เป… วิหรามิ อนาสโว.

๓๖๑. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๓๖๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา โมฆราชา เถโร อิมา คาถาโย

อภาสิตฺถาติ.

โมฆราชตฺเถรสฺสาปทานํ ทสมํ.

กจฺจายนวคฺโค จตุปญฺญาสโม.