๘. โพธิสมฺมชฺชกตฺเถรอปทานํ

๔๘. ‘‘อหํ ปุเร โพธิปตฺตํ, อุชฺฌิตํ เจติยงฺคเณ;

ตํ คเหตฺวาน ฉฑฺเฑสึ, อลภึ วีสตีคุเณ.

๔๙. ‘‘ตสฺส กมฺมสฺส เตเชน, สํสรนฺโต ภวาภเว;

ทุเว ภเว สํสรามิ, เทวตฺเต จาปิ มานุเส.

๕๐. ‘‘เทวโลกา จวิตฺวาน, อาคนฺตฺวา มานุสํ ภวํ;

ทุเว กุเล ปชายามิ, ขตฺติเย จาปิ พฺราหฺมเณ.

๕๑. ‘‘องฺคปจฺจงฺคสมฺปนฺโน, อาโรหปริณาหวา;

อภิรูโป สุจิ โหมิ, สมฺปุณฺณงฺโค อนูนโก.

๕๒. ‘‘เทวโลเก มนุสฺเส วา, ชาโต วา ยตฺถ กตฺถจิ;

ภเว สุวณฺณวณฺโณ จ, อุตฺตตฺตกนกูปโม.

๕๓. ‘‘มุทุกา มทฺทวา สฺนิทฺธา [มุทุ มทฺทวา สินิทฺธา (สฺยา.)], สุขุมา สุกุมาริกา;

ฉวิ เม สพฺพทา โหติ, โพธิปตฺเต สุฉฑฺฑิเต [สุฉฑฺฑิเน (สี.)].

๕๔. ‘‘ยโต กุโตจิ คตีสุ, สรีเร สมุทาคเต;

น ลิมฺปติ รโชชลฺลํ, วิปาโก ปตฺตฉฑฺฑิเต.

๕๕. ‘‘อุเณฺห วาตาตเป ตสฺส, อคฺคิตาเปน วา ปน;

คตฺเต เสทา น มุจฺจนฺติ, วิปาโก ปตฺตฉฑฺฑิเต.

๕๖. ‘‘กุฏฺฐํ คณฺโฑ กิลาโส จ, ติลกา ปิฬกา ตถา;

น โหนฺติ กาเย ททฺทุ จ, วิปาโก ปตฺตฉฑฺฑิเต.

๕๗. ‘‘อปรมฺปิ คุณํ ตสฺส, นิพฺพตฺตติ ภวาภเว;

โรคา น โหนฺติ กายสฺมึ, วิปาโก ปตฺตฉฑฺฑิเต.

๕๘. ‘‘อปรมฺปิ คุณํ ตสฺส, นิพฺพตฺตติ ภวาภเว;

น โหติ จิตฺตชา ปีฬา, วิปาโก ปตฺตฉฑฺฑิเต.

๕๙. ‘‘อปรมฺปิ คุณํ ตสฺส, นิพฺพตฺตติ ภวาภเว;

อมิตฺตา น ภวนฺตสฺส, วิปาโก ปตฺตฉฑฺฑิเต.

๖๐. ‘‘อปรมฺปิ คุณํ ตสฺส, นิพฺพตฺตติ ภวาภเว;

อนูนโภโค ภวติ, วิปาโก ปตฺตฉฑฺฑิเต.

๖๑. ‘‘อปรมฺปิ คุณํ ตสฺส, นิพฺพตฺตติ ภวาภเว;

อคฺคิราชูหิ โจเรหิ, น โหติ อุทเก ภยํ.

๖๒. ‘‘อปรมฺปิ คุณํ ตสฺส, นิพฺพตฺตติ ภวาภเว;

ทาสิทาสา อนุจรา, โหนฺติ จิตฺตานุวตฺตกา.

๖๓. ‘‘ยมฺหิ อายุปฺปมาณมฺหิ, ชายเต มานุเส ภเว;

ตโต น หายเต อายุ, ติฏฺฐเต ยาวตายุกํ.

๖๔. ‘‘อพฺภนฺตรา จ พาหิรา [พหิจรา (สี. ปี. ก.)], เนคมา จ สรฏฺฐกา;

นุยุตฺตา โหนฺติ สพฺเพปิ, วุทฺธิกามา สุขิจฺฉกา.

๖๕. ‘‘โภควา ยสวา โหมิ, สิริมา ญาติปกฺขวา;

อเปตภยสนฺตาโส, ภเวหํ สพฺพโต ภเว.

๖๖. ‘‘เทวา มนุสฺสา อสุรา, คนฺธพฺพา ยกฺขรกฺขสา;

สพฺเพ เต ปริรกฺขนฺติ, ภเว สํสรโต สทา.

๖๗. ‘‘เทวโลเก มนุสฺเส จ, อนุโภตฺวา อุโภ ยเส;

อวสาเน จ นิพฺพานํ, สิวํ ปตฺโต อนุตฺตรํ.

๖๘. ‘‘สมฺพุทฺธมุทฺทิสิตฺวาน, โพธึ วา ตสฺส สตฺถุโน;

โย ปุญฺญํ ปสเว โปโส, ตสฺส กึ นาม ทุลฺลภํ.

๖๙. ‘‘มคฺเค ผเล อาคเม จ, ฌานาภิญฺญาคุเณสุ จ;

อญฺเญสํ อธิโก หุตฺวา, นิพฺพายามิ อนาสโว.

๗๐. ‘‘ปุเรหํ โพธิยา ปตฺตํ, ฉฑฺเฑตฺวา หฏฺฐมานโส;

อิเมหิ วีสตงฺเคหิ, สมงฺคี โหมิ สพฺพทา.

๗๑. ‘‘กิเลสา ฌาปิตา มยฺหํ…เป… วิหรามิ อนาสโว.

๗๒. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๗๓. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา โพธิสมฺมชฺชโก เถโร อิมา คาถาโย

อภาสิตฺถาติ.

โพธิสมฺมชฺชกตฺเถรสฺสาปทานํ อฏฺฐมํ.