๕. จนฺทนมาลิยตฺเถรอปทานํ

๗๕. ‘‘ปญฺจ กามคุเณ หิตฺวา, ปิยรูเป มโนรเม;

อสีติโกฏิโย หิตฺวา, ปพฺพชึ อนคาริยํ.

๗๖. ‘‘ปพฺพชิตฺวาน กาเยน, ปาปกมฺมํ วิวชฺชยึ;

วจีทุจฺจริตํ หิตฺวา, นทีกูเล วสามหํ.

๗๗. ‘‘เอกกํ มํ วิหรนฺตํ, พุทฺธเสฏฺโฐ อุปาคมิ;

นาหํ ชานามิ พุทฺโธติ, อกาสึ ปฏิสนฺถรํ [ปฏิสนฺธารํ (ก.)].

๗๘. ‘‘กริตฺวา ปฏิสนฺถารํ, นามโคตฺตมปุจฺฉหํ;

‘เทวตานุสิ คนฺธพฺโพ, อทุ สกฺโก ปุรินฺทโท.

๗๙. ‘‘‘โก วา ตฺวํ กสฺส วา ปุตฺโต, มหาพฺรหฺมา อิธาคโต;

วิโรเจสิ ทิสา สพฺพา, อุทยํ สูริโย ยถา.

๘๐. ‘‘‘สหสฺสารานิ จกฺกานิ, ปาเท ทิสฺสนฺติ มาริส;

โก วา ตฺวํ กสฺส วา ปุตฺโต, กถํ ชาเนมุ ตํ มยํ;

นามโคตฺตํ ปเวเทหิ, สํสยํ อปเนหิ เม’.

๘๑. ‘‘‘นมฺหิ เทโว น คนฺธพฺโพ, นมฺหิ [นาปิ (สี.)] สกฺโก ปุรินฺทโท;

พฺรหฺมภาโว จ เม นตฺถิ, เอเตสํ อุตฺตโม อหํ.

๘๒. ‘‘‘อตีโต วิสยํ เตสํ, ทาลยึ กามพนฺธนํ;

สพฺเพ กิเลเส ฌาเปตฺวา, ปตฺโต สมฺโพธิมุตฺตมํ’.

๘๓. ‘‘ตสฺส วาจํ สุณิตฺวาหํ, อิทํ วจนมพฺรวึ;

‘ยทิ พุทฺโธติ สพฺพญฺญู, นิสีท ตฺวํ มหามุเน.

๘๔. ‘ตมหํ ปูชยิสฺสามิ, ทุกฺขสฺสนฺตกโร ตุวํ’;

‘‘ปตฺถริตฺวา ชินจมฺมํ, อทาสิ สตฺถุโน อหํ.

๘๕. ‘‘นิสีทิ ตตฺถ ภควา, สีโหว คิริคพฺภเร;

ขิปฺปํ ปพฺพตมารุยฺห, อมฺพสฺส ผลมคฺคหึ.

๘๖. ‘‘สาลกลฺยาณิกํ ปุปฺผํ, จนฺทนญฺจ มหารหํ;

ขิปฺปํ ปคฺคยฺห ตํ สพฺพํ, อุเปตฺวา โลกนายกํ.

๘๗. ‘‘ผลํ พุทฺธสฺส ทตฺวาน, สาลปุปฺผมปูชยึ;

จนฺทนํ อนุลิมฺปิตฺวา, อวนฺทึ สตฺถุโน อหํ.

๘๘. ‘‘ปสนฺนจิตฺโต สุมโน, วิปุลาย จ ปีติยา;

อชินมฺหิ นิสีทิตฺวา, สุเมโธ โลกนายโก.

๘๙. ‘‘มม กมฺมํ ปกิตฺเตสิ, หาสยนฺโต มมํ ตทา;

‘อิมินา ผลทาเนน, คนฺธมาเลหิ จูภยํ.

๙๐. ‘‘‘ปญฺจวีเส กปฺปสเต, เทวโลเก รมิสฺสติ;

อนูนมนสงฺกปฺโป, วสวตฺตี ภวิสฺสติ.

๙๑. ‘‘‘ฉพฺพีสติกปฺปสเต, มนุสฺสตฺตํ คมิสฺสติ;

ภวิสฺสติ จกฺกวตฺตี, จาตุรนฺโต มหิทฺธิโก.

๙๒. ‘‘‘เวภารํ นาม นครํ, วิสฺสกมฺเมน มาปิตํ;

เหสฺสติ สพฺพโสวณฺณํ, นานารตนภูสิตํ.

๙๓. ‘‘‘เอเตเนว อุปาเยน, สํสริสฺสติ โส ภเว [โยนิโส (สฺยา. ปี.)];

สพฺพตฺถ ปูชิโต หุตฺวา, เทวตฺเต อถ มานุเส.

๙๔. ‘‘‘ปจฺฉิเม ภเว สมฺปตฺเต, พฺรหฺมพนฺธุ ภวิสฺสติ;

อคารา อภินิกฺขมฺม, อนคารี ภวิสฺสติ;

อภิญฺญาปารคู หุตฺวา, นิพฺพายิสฺสตินาสโว’.

๙๕. ‘‘อิทํ วตฺวาน สมฺพุทฺโธ, สุเมโธ โลกนายโก;

มม นิชฺฌายมานสฺส, ปกฺกามิ อนิลญฺชเส.

๙๖. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสมคจฺฉหํ.

๙๗. ‘‘ตุสิตโต จวิตฺวาน, นิพฺพตฺตึ มาตุกุจฺฉิยํ;

โภเค เม อูนตา นตฺถิ, ยมฺหิ คพฺเภ วสามหํ.

๙๘. ‘‘มาตุกุจฺฉิคเต มยิ, อนฺนปานญฺจ โภชนํ;

มาตุยา มม ฉนฺเทน, นิพฺพตฺตติ ยทิจฺฉกํ.

๙๙. ‘‘ชาติยา ปญฺจวสฺเสน, ปพฺพชึ อนคาริยํ;

โอโรปิตมฺหิ เกสมฺหิ, อรหตฺตมปาปุณึ.

๑๐๐. ‘‘ปุพฺพกมฺมํ คเวสนฺโต, โอเรน นาทฺทสํ อหํ;

ตึสกปฺปสหสฺสมฺหิ, มม กมฺมมนุสฺสรึ.

๑๐๑. ‘‘นโม เต ปุริสาชญฺญ, นโม เต ปุริสุตฺตม;

ตว สาสนมาคมฺม, ปตฺโตมฺหิ อจลํ ปทํ.

๑๐๒. ‘‘ตึสกปฺปสหสฺสมฺหิ, ยํ พุทฺธมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๑๐๓. ‘‘กิเลสา ฌาปิตา มยฺหํ…เป… วิหรามิ อนาสโว.

๑๐๔. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๐๕. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา จนฺทนมาลิโย เถโร อิมา คาถาโย

อภาสิตฺถาติ.

จนฺทนมาลิยตฺเถรสฺสาปทานํ ปญฺจมํ.