๙. ปานธิทายกตฺเถรอปทานํ

๗๑. ‘‘อโนมทสฺสี ภควา, โลกเชฏฺโฐ นราสโภ;

ทิวาวิหารา นิกฺขมฺม, ปถมารุหิ [ปีติมารุยฺหิ (สฺยา.)] จกฺขุมา.

๗๒. ‘‘ปานธึ สุกตํ คยฺห, อทฺธานํ ปฏิปชฺชหํ;

ตตฺถทฺทสาสึ สมฺพุทฺธํ, ปตฺติกํ จารุทสฺสนํ.

๗๓. ‘‘สกํ จิตฺตํ ปสาเทตฺวา, นีหริตฺวาน ปานธึ;

ปาทมูเล ฐเปตฺวาน, อิทํ วจนมพฺรวึ.

๗๔. ‘‘‘อภิรูห มหาวีร, สุคตินฺท วินายก;

อิโต ผลํ ลภิสฺสามิ, โส เม อตฺโถ สมิชฺฌตุ’.

๗๕. ‘‘อโนมทสฺสี ภควา, โลกเชฏฺโฐ นราสโภ;

ปานธึ อภิรูหิตฺวา, อิทํ วจนมพฺรวิ.

๗๖. ‘‘‘โย ปานธึ เม อทาสิ, ปสนฺโน เสหิ ปาณิภิ;

ตมหํ กิตฺตยิสฺสามิ, สุณาถ มม ภาสโต’.

๗๗. ‘‘พุทฺธสฺส คิรมญฺญาย, สพฺเพ เทวา สมาคตา;

อุทคฺคจิตฺตา สุมนา, เวทชาตา กตญฺชลี.

๗๘. ‘‘ปานธีนํ ปทาเนน, สุขิโตยํ ภวิสฺสติ;

ปญฺจปญฺญาสกฺขตฺตุญฺจ, เทวรชฺชํ กริสฺสติ.

๗๙. ‘‘สหสฺสกฺขตฺตุํ ราชา จ, จกฺกวตฺตี ภวิสฺสติ;

ปเทสรชฺชํ วิปุลํ, คณนาโต อสงฺขิยํ.

๘๐. ‘‘อปริเมยฺเย อิโต กปฺเป, โอกฺกากกุลสมฺภโว;

โคตโม นาม โคตฺเตน [นาเมน (สพฺพตฺถ)], สตฺถา โลเก ภวิสฺสติ.

๘๑. ‘‘ตสฺส ธมฺเมสุ ทายาโท, โอรโส ธมฺมนิมฺมิโต;

สพฺพาสเว ปริญฺญาย, นิพฺพายิสฺสตินาสโว.

๘๒. ‘‘เทวโลเก มนุสฺเส วา, นิพฺพตฺติสฺสติ ปุญฺญวา;

เทวยานปฏิภาคํ, ยานํ ปฏิลภิสฺสติ.

๘๓. ‘‘ปาสาทา สิวิกา วยฺหํ, หตฺถิโน สมลงฺกตา;

รถา วาชญฺญสํยุตฺตา, สทา ปาตุภวนฺติ เม.

๘๔. ‘‘อคารา นิกฺขมนฺโตปิ, รเถน นิกฺขมึ อหํ;

เกเสสุ ฉิชฺชมาเนสุ, อรหตฺตมปาปุณึ.

๘๕. ‘‘ลาภา มยฺหํ สุลทฺธํ เม, วาณิชฺชํ สุปฺปโยชิตํ;

ทตฺวาน ปานธึ เอกํ, ปตฺโตมฺหิ อจลํ ปทํ.

๘๖. ‘‘อปริเมยฺเย อิโต กปฺเป, ยํ ปานธิมทาสหํ;

ทุคฺคตึ นาภิชานามิ, ปานธิสฺส อิทํ ผลํ.

๘๗. ‘‘กิเลสา ฌาปิตา มยฺหํ…เป… วิหรามิ อนาสโว.

๘๘. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๘๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ปานธิทายโก เถโร อิมา คาถาโย

อภาสิตฺถาติ.

ปานธิทายกตฺเถรสฺสาปทานํ นวมํ.