๒. เอกสงฺขิยตฺเถรอปทานํ

๑๓. ‘‘วิปสฺสิโน ภควโต, มหาโพธิมโห อหุ;

มหาชนา สมาคมฺม, ปูเชนฺติ โพธิมุตฺตมํ.

๑๔. ‘‘น หิ ตํ โอรกํ มญฺเญ, พุทฺธเสฏฺโฐ ภวิสฺสติ;

ยสฺสายํ อีทิสา โพธิ, ปูชนียา [อีทิโส โพธิ, ปูชนีโย (สฺยา.)] จ สตฺถุโน.

๑๕. ‘‘ตโต สงฺขํ คเหตฺวาน, โพธิรุกฺขมุปฏฺฐหึ;

ธมนฺโต สพฺพทิวสํ, อวนฺทึ โพธิมุตฺตมํ.

๑๖. ‘‘อาสนฺนเก กตํ กมฺมํ, เทวโลกํ อปาปยี;

กเฬวรํ เม ปติตํ, เทวโลเก รมามหํ.

๑๗. ‘‘สฏฺฐิตุริยสหสฺสานิ, ตุฏฺฐหฏฺฐา ปโมทิตา;

สทา มยฺหํ อุปฏฺฐนฺติ, พุทฺธปูชายิทํ ผลํ.

๑๘. ‘‘เอกสตฺตติเม กปฺเป, ราชา อาสึ สุทสฺสโน;

จาตุรนฺโต วิชิตาวี, ชมฺพุมณฺฑสฺส อิสฺสโร.

๑๙. ‘‘ตโต องฺคสตา ตุริยา [ตูรา (สี. ก.)], ปริวาเรนฺติ มํ สทา;

อนุโภมิ สกํ กมฺมํ, อุปฏฺฐานสฺสิทํ ผลํ.

๒๐. ‘‘ยํ ยํ โยนุปปชฺชามิ, เทวตฺตํ อถ มานุสํ;

มาตุกุจฺฉิคตสฺสาปิ, วชฺชเร เภริโย สทา.

๒๑. ‘‘อุปฏฺฐิตฺวาน สมฺพุทฺธํ, อนุภุตฺวาน สมฺปทา;

สิวํ สุเขมํ อมตํ, ปตฺโตมฺหิ อจลํ ปทํ.

๒๒. ‘‘เอกนวุติโต กปฺเป, ยํ กมฺมมกรึ ตทา;

ทุคฺคตึ นาภิชานามิ, พุทฺธปูชายิทํ ผลํ.

๒๓. ‘‘กิเลสา ฌาปิตา มยฺหํ…เป… วิหรามิ อนาสโว.

๒๔. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๒๕. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา เอกสงฺขิโย เถโร อิมา คาถาโย

อภาสิตฺถาติ.

เอกสงฺขิยตฺเถรสฺสาปทานํ ทุติยํ.