๔. มธุมํสทายกตฺเถรอปทานํ

๑๐๖. ‘‘นคเร พนฺธุมติยา, สูกริโก อโหสหํ;

อุกฺโกฏํ รนฺธยิตฺวาน [อุกฺโกฏกํ รนฺธยิตฺวา (สี. สฺยา.)], มธุมํสมฺหิ [มธุสปฺปิมฺหิ (ปี.), มธุํ มํสมฺหิ (ก.)] โอกิรึ.

๑๐๗. ‘‘สนฺนิปาตํ อหํ คนฺตฺวา, เอกํ ปตฺตํ คเหสหํ;

ปูรยิตฺวาน ตํ ปตฺตํ, ภิกฺขุสงฺฆสฺสทาสหํ.

๑๐๘. ‘‘โยตฺถ เถรตโร ภิกฺขุ, นิยฺยาเทสิ มมํ ตทา;

อิมินา ปตฺตปูเรน, ลภสฺสุ วิปุลํ สุขํ.

๑๐๙. ‘‘ทุเว สมฺปตฺติโย ภุตฺวา, สุกฺกมูเลน โจทิโต;

ปจฺฉิเม วตฺตมานมฺหิ, กิเลเส ฌาปยิสฺสติ.

๑๑๐. ‘‘ตตฺถ จิตฺตํ ปสาเทตฺวา, ตาวตึสมคจฺฉหํ;

ตตฺถ ภุตฺวา ปิวิตฺวา จ, ลภามิ วิปุลํ สุขํ.

๑๑๑. ‘‘มณฺฑเป รุกฺขมูเล วา, ปุพฺพกมฺมํ อนุสฺสรึ;

อนฺนปานาภิวสฺโส เม, อภิวสฺสติ ตาวเท.

๑๑๒. ‘‘อิทํ ปจฺฉิมกํ มยฺหํ, จริโม วตฺตเต ภโว;

อิธาปิ อนฺนปานํ เม, วสฺสเต สพฺพกาลิกํ.

๑๑๓. ‘‘เตเนว มธุทาเนน [มํสทาเนน (สี. ปี.)], สนฺธาวิตฺวา ภเว อหํ;

สพฺพาสเว ปริญฺญาย, วิหรามิ อนาสโว.

๑๑๔. ‘‘เอกนวุติโต กปฺเป, ยํ ทานมททึ ตทา;

ทุคฺคตึ นาภิชานามิ, มธุทานสฺสิทํ ผลํ.

๑๑๕. ‘‘กิเลสา ฌาปิตา มยฺหํ…เป… วิหรามิ อนาสโว.

๑๑๖. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๑๗. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา มธุมํสทายโก เถโร อิมา คาถาโย อภาสิตฺถาติ.

มธุมํสทายกตฺเถรสฺสาปทานํ จตุตฺถํ.