๓. ตีณุปฺปลมาลิยตฺเถรอปทานํ

๑๓. ‘‘จนฺทภาคานทีตีเร, อโหสึ วานโร ตทา;

อทฺทสํ วิรชํ พุทฺธํ, นิสินฺนํ ปพฺพตนฺตเร.

๑๔. ‘‘โอภาเสนฺตํ ทิสา สพฺพา, สาลราชํว ผุลฺลิตํ;

ลกฺขณพฺยญฺชนูเปตํ, ทิสฺวานตฺตมโน อหํ.

๑๕. ‘‘อุทคฺคจิตฺโต สุมโน, ปีติยา หฏฺฐมานโส;

ตีณิ อุปฺปลปุปฺผานิ, มตฺถเก อภิโรปยึ.

๑๖. ‘‘ปูชยิตฺวาน ปุปฺผานิ, ผุสฺสสฺสาหํ มเหสิโน;

สคารโว ภวิตฺวาน, ปกฺกามึ อุตฺตรามุโข.

๑๗. ‘‘คจฺฉนฺโต ปฏิกุฏิโก, วิปฺปสนฺเนน เจตสา;

เสลนฺตเร ปติตฺวาน, ปาปุณึ ชีวิตกฺขยํ.

๑๘. ‘‘เตน กมฺเมน สุกเตน, เจตนาปณิธีหิ จ;

ชหิตฺวา ปุริมํ ชาตึ, ตาวตึสมคจฺฉหํ.

๑๙. ‘‘สตานํ ตีณิกฺขตฺตุญฺจ, เทวรชฺชมการยึ;

สตานํ ปญฺจกฺขตฺตุญฺจ, จกฺกวตฺตี อโหสหํ.

๒๐. ‘‘เทฺวนวุเต อิโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๒๑. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ตีณุปฺปลมาลิโย เถโร อิมา คาถาโย อภาสิตฺถาติ.

ตีณุปฺปลมาลิยตฺเถรสฺสาปทานํ ตติยํ.