๔. สโกสกโกรณฺฑทายกตฺเถรอปทานํ

๑๔. ‘‘อกฺกนฺตญฺจ ปทํ ทิสฺวา, สิขิโน โลกพนฺธุโน;

เอกํสํ อชินํ กตฺวา, ปทเสฏฺฐํ อวนฺทหํ.

๑๕. ‘‘โกรณฺฑํ ปุปฺผิตํ ทิสฺวา, ปาทปํ ธรณีรุหํ;

สโกสกํ [สโกฏกํ (สี. สฺยา.)] คเหตฺวาน, ปทจกฺกํ อปูชยึ.

๑๖. ‘‘เอกตฺตึเส อิโต กปฺเป, ยํ กมฺมมกรึ ตทา;

ทุคฺคตึ นาภิชานามิ, ปทปูชายิทํ ผลํ.

๑๗. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สโกสก [สโกฏก (สี. สฺยา.)] โกรณฺฑทายโก เถโร อิมา คาถาโย อภาสิตฺถาติ.

สโกสกโกรณฺฑทายกตฺเถรสฺสาปทานํ จตุตฺถํ.