๑. อากาสุกฺขิปิยตฺเถรอปทานํ

๑. ‘‘สุวณฺณวณฺณํ สิทฺธตฺถํ, คจฺฉนฺตํ อนฺตราปเณ;

ชลชคฺเค ทุเว คยฺห, อุปาคจฺฉึ นราสภํ.

๒. ‘‘เอกญฺจ ปุปฺผํ ปาเทสุ, พุทฺธเสฏฺฐสฺส นิกฺขิปึ;

เอกญฺจ ปุปฺผํ ปคฺคยฺห, อากาเส อุกฺขิปึ อหํ.

๓. ‘‘จตุนฺนวุติโต กปฺเป, ยํ ปุปฺผมภิโรปยึ;

ทุคฺคตึ นาภิชานามิ, ปุปฺผทานสฺสิทํ ผลํ.

๔. ‘‘อิโต ฉตฺตึสกปฺปมฺหิ, เอโก อาสึ มหีปติ;

อนฺตลิกฺขกโร นาม, จกฺกวตฺตี มหพฺพโล.

๕. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา อากาสุกฺขิปิโย เถโร อิมา คาถาโย อภาสิตฺถาติ.

อากาสุกฺขิปิยตฺเถรสฺสาปทานํ ปฐมํ.