๑. โถมกตฺเถรอปทานํ

๑. ‘‘เทวโลเก ฐิโต สนฺโต, วิปสฺสิสฺส มเหสิโน;

ธมฺมํ สุณิตฺวา มุทิโต, อิมํ วาจํ อภาสหํ.

๒. ‘‘‘นโม เต ปุริสาชญฺญ, นโม เต ปุริสุตฺตม;

พหุชฺชนํ [พหุํ ชนํ (สี.)] ตารยสิ, เทเสนฺโต อมตํ ปทํ’.

๓. ‘‘เอกนวุติโต กปฺเป, ยํ วาจมภณึ ตทา;

ทุคฺคตึ นาภิชานามิ, โถมนาย อิทํ ผลํ.

๔. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา โถมโก เถโร อิมา คาถาโย อภาสิตฺถาติ.

โถมกตฺเถรสฺสาปทานํ ปฐมํ.