๒๖. โถมกวคฺโค

๑. โถมกตฺเถรอปทานํ

๑. ‘‘เทวโลเก ฐิโต สนฺโต, วิปสฺสิสฺส มเหสิโน;

ธมฺมํ สุณิตฺวา มุทิโต, อิมํ วาจํ อภาสหํ.

๒. ‘‘‘นโม เต ปุริสาชญฺญ, นโม เต ปุริสุตฺตม;

พหุชฺชนํ [พหุํ ชนํ (สี.)] ตารยสิ, เทเสนฺโต อมตํ ปทํ’.

๓. ‘‘เอกนวุติโต กปฺเป, ยํ วาจมภณึ ตทา;

ทุคฺคตึ นาภิชานามิ, โถมนาย อิทํ ผลํ.

๔. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา โถมโก เถโร อิมา คาถาโย อภาสิตฺถาติ.

โถมกตฺเถรสฺสาปทานํ ปฐมํ.

๒. เอกาสนทายกตฺเถรอปทานํ

๕. ‘‘วิชหิตฺวา เทววณฺณํ, สภริโย อิธาคมึ;

อธิการํ กตฺตุกาโม, พุทฺธเสฏฺฐสฺส สาสเน.

๖. ‘‘เทวโล นาม นาเมน, ปทุมุตฺตรสาวโก;

ตสฺส ภิกฺขา มยา ทินฺนา, วิปฺปสนฺเนน เจตสา.

๗. ‘‘สตสหสฺสิโต กปฺเป, ยํ กมฺมมกรึ ตทา;

ทุคฺคตึ นาภิชานามิ, ปิณฺฑปาตสฺสิทํ ผลํ.

๘. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา เอกาสนทายโก เถโร อิมา คาถาโย อภาสิตฺถาติ.

เอกาสนทายกตฺเถรสฺสาปทานํ ทุติยํ.

๓. จิตกปูชกตฺเถรอปทานํ

๙. ‘‘อานนฺโท นาม สมฺพุทฺโธ, สยมฺภู อปราชิโต;

อรญฺเญ ปรินิพฺพายิ, อมนุสฺสมฺหิ กานเน.

๑๐. ‘‘เทวโลกา อิธาคนฺตฺวา, จิตํ กตฺวานหํ ตทา;

สรีรํ ตตฺถ ฌาเปสึ, สกฺการญฺจ อกาสหํ.

๑๑. ‘‘เอกนวุติโต กปฺเป, ยํ กมฺมมกรึ ตทา;

ทุคฺคตึ นาภิชานามิ, พุทฺธปูชายิทํ ผลํ.

๑๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา จิตกปูชโก เถโร อิมา คาถาโย อภาสิตฺถาติ.

จิตกปูชกตฺเถรสฺสาปทานํ ตติยํ.

๔. ติจมฺปกปุปฺผิยตฺเถรอปทานํ

๑๓. ‘‘หิมวนฺตสฺสาวิทูเร, วิกโต [วิกโน (สี. สฺยา.)] นาม ปพฺพโต;

ตสฺส เวมชฺเฌ วสติ, สมโณ ภาวิตินฺทฺริโย.

๑๔. ‘‘ทิสฺวาน ตสฺโสปสมํ, วิปฺปสนฺเนน เจตสา;

ตีณิ จมฺปกปุปฺผานิ, คเหตฺวาน สโมกิรึ.

๑๕. ‘‘เอกนวุติโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๑๖. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ติจมฺปกปุปฺผิโย เถโร อิมา คาถาโย อภาสิตฺถาติ.

ติจมฺปกปุปฺผิยตฺเถรสฺสาปทานํ จตุตฺถํ.

๕. สตฺตปาฏลิยตฺเถรอปทานํ

๑๗. ‘‘กณิการํว โชตนฺตํ, นิสินฺนํ ปพฺพตนฺตเร;

สตฺต ปาฏลิปุปฺผานิ, พุทฺธสฺส อภิโรปยึ.

๑๘. ‘‘จตุนฺนวุติโต กปฺเป, ยํ ปุปฺผมภิโรปยึ;

ทุคฺคตึ นาภิชานามิ, พุทฺธปูชายิทํ ผลํ.

๑๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สตฺตปาฏลิโย เถโร อิมา คาถาโย อภาสิตฺถาติ.

สตฺตปาฏลิยตฺเถรสฺสาปทานํ ปญฺจมํ.

๖. อุปาหนทายกตฺเถรอปทานํ

๒๐. ‘‘อโหสึ จนฺทโน นาม, สมฺพุทฺธสฺสตฺรโช ตทา;

เอโกปาหโน มยา ทินฺโน, โพธึ สมฺปชฺช เม ตุวํ.

๒๑. ‘‘เอกนวุติโต กปฺเป, ยํ ปานธึ [ยมุปาหนํ (สี.), ยํ ปาทุํ (สฺยา.)] ททึ ตทา;

ทุคฺคตึ นาภิชานามิ, อุปาหนสฺสิทํ ผลํ.

๒๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา อุปาหนทายโก เถโร อิมา คาถาโย อภาสิตฺถาติ.

อุปาหนทายกตฺเถรสฺสาปทานํ ฉฏฺฐํ.

๗. มญฺชริปูชกตฺเถรอปทานํ

๒๓. ‘‘มญฺชริกํ กริตฺวาน, รถิยํ ปฏิปชฺชหํ;

อทฺทสํ สมณานคฺคํ, ภิกฺขุสงฺฆปุรกฺขตํ.

๒๔. ‘‘ปสนฺนจิตฺโต สุมโน, ปรมาย จ ปีติยา;

อุโภ หตฺเถหิ ปคฺคยฺห, พุทฺธสฺส อภิโรปยึ.

๒๕. ‘‘เทฺวนวุเต อิโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, ปุปฺผปูชายิทํ ผลํ.

๒๖. ‘‘อิโต เตสตฺตติกปฺเป, เอโก อาสึ มหีปติ;

โชติโย นาม นาเมน, จกฺกวตฺตี มหพฺพโล.

๒๗. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา มญฺชริปูชโก เถโร อิมา คาถาโย อภาสิตฺถาติ.

มญฺชริปูชกตฺเถรสฺสาปทานํ สตฺตมํ.

๘. ปณฺณทายกตฺเถรอปทานํ

๒๘. ‘‘ปพฺพเต หิมวนฺตมฺหิ, วากจีรธโร อหํ;

อโลณปณฺณภกฺโขมฺหิ, นิยเมสุ จ สํวุโต.

๒๙. ‘‘ปาตราเส อนุปฺปตฺเต, สิทฺธตฺโถ อุปคจฺฉิ มํ;

ตาหํ พุทฺธสฺส ปาทาสึ, ปสนฺโน เสหิ ปาณิภิ.

๓๐. ‘‘จตุนฺนวุติโต กปฺเป, ยํ ปณฺณมททึ ตทา;

ทุคฺคตึ นาภิชานามิ, ปณฺณทานสฺสิทํ ผลํ.

๓๑. ‘‘สตฺตวีสติกปฺปมฺหิ, ราชา อาสึ สทตฺถิโย [ยทตฺถิโย (สี. สฺยา.)];

สตฺตรตนสมฺปนฺโน, จกฺกวตฺตี มหพฺพโล.

๓๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ปณฺณทายโก เถโร อิมา คาถาโย อภาสิตฺถาติ.

ปณฺณทายกตฺเถรสฺสาปทานํ อฏฺฐมํ.

๙. กุฏิทายกตฺเถรอปทานํ

๓๓. ‘‘วิปินจารี สมฺพุทฺโธ, รุกฺขมูเล วสี ตทา;

ปณฺณสาลํ กริตฺวาน, อทาสึ อปราชิเต.

๓๔. ‘‘เอกนวุติโต กปฺเป, ยํ ปณฺณกุฏิกํ อทํ;

ทุคฺคตึ นาภิชานามิ, กุฏิทานสฺสิทํ ผลํ.

๓๕. ‘‘อฏฺฐวีเส [อฏฺฐตึเส (สฺยา.)] อิโต กปฺเป, โสฬสาสึสุ ราชาโน;

สพฺพตฺถ อภิวสฺสีติ, วุจฺจเร จกฺกวตฺติโน.

๓๖. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา กุฏิทายโก เถโร อิมา คาถาโย อภาสิตฺถาติ.

กุฏิทายกตฺเถรสฺสาปทานํ นวมํ.

๑๐. อคฺคปุปฺผิยตฺเถรอปทานํ

๓๗. ‘‘สุวณฺณวณฺณํ สมฺพุทฺธํ, นิสินฺนํ ปพฺพตนฺตเร;

โอภาสยนฺตํ รํเสน [รํสิยา (สฺยา.)], สิขินํ สิขินํ ยถา.

๓๘. ‘‘อคฺคชํ ปุปฺผมาทาย, อุปาคจฺฉึ นรุตฺตมํ;

ปสนฺนจิตฺโต สุมโน, พุทฺธสฺส อภิโรปยึ.

๓๙. ‘‘เอกตฺตึเส อิโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๔๐. ‘‘ปญฺจวีสติกปฺปมฺหิ, อโหสิ อมิโตคโต [อมิตวฺหโย (สี.)];

สตฺตรตนสมฺปนฺโน, จกฺกวตฺตี มหพฺพโล.

๔๑. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา อคฺคปุปฺผิโย เถโร อิมา คาถาโย อภาสิตฺถาติ.

อคฺคปุปฺผิยตฺเถรสฺสาปทานํ ทสมํ.

โถมกวคฺโค ฉพฺพีสติโม.