๒๕. ตุวรทายกวคฺโค

๑. ตุวรทายกตฺเถรอปทานํ

๑. ‘‘มิคลุทฺโท ปุเร อาสึ, อรญฺเญ กานเน อหํ;

ภริตฺวา ตุวรมาทาย [ภริตฺวา ตุรวมาทาย (ก.), ภชฺชิตํ ตุวรมาทาย (?) เอตฺถ ตุวรนฺติ มุคฺคกลายสทิสํ ตุวรฏฺฐินฺติ ตทฏฺฐกถา; ตุวโร ธญฺญเภเทติ สกฺกตาภิธาเน], สงฺฆสฺส อททึ อหํ.

๒. ‘‘เอกนวุติโต กปฺเป, ยํ ทานมททึ ตทา;

ทุคฺคตึ นาภิชานามิ, ตุวรสฺส อิทํ ผลํ.

๓. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา ตุวรทายโก เถโร อิมา คาถาโย อภาสิตฺถาติ.

ตุวรทายกตฺเถรสฺสาปทานํ ปฐมํ.

๒. นาคเกสริยตฺเถรอปทานํ

๔. ‘‘ธนุํ อเทฺวชฺฌํ กตฺวาน, วนมชฺโฌคหึ อหํ;

เกสรํ โอคตํ [โอสรํ (สฺยา.), โอสฏํ (สี.)] ทิสฺวา, ปตปตฺตํ สมุฏฺฐิตํ.

๕. ‘‘อุโภ หตฺเถหิ ปคฺคยฺห, สิเร กตฺวาน อญฺชลึ;

พุทฺธสฺส อภิโรเปสึ, ติสฺสสฺส โลกพนฺธุโน.

๖. ‘‘เทฺวนวุเต อิโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๗. ‘‘เตสตฺตติมฺหิ กปฺปมฺหิ [สตฺตสตฺตติเม กปฺเป (สฺยา.)], สตฺต เกสรนามกา;

สตฺตรตนสมฺปนฺนา, จกฺกวตฺตี มหพฺพลา.

๘. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา นาคเกสริโย เถโร อิมา คาถาโย อภาสิตฺถาติ.

นาคเกสริยตฺเถรสฺสาปทานํ ทุติยํ.

๓. นฬินเกสริยตฺเถรอปทานํ

๙. ‘‘ชาตสฺสรสฺส เวมชฺเฌ, วสามิ ชลกุกฺกุโฏ;

อทฺทสาหํ [อถทฺทสํ (สี. สฺยา.)] เทวเทวํ, คจฺฉนฺตํ อนิลญฺชเส.

๑๐. ‘‘ตุณฺเฑน เกสรึ [เกสรํ (สฺยา.)] คยฺห, วิปฺปสนฺเนน เจตสา;

พุทฺธสฺส อภิโรเปสึ, ติสฺสสฺส โลกพนฺธุโน.

๑๑. ‘‘เทฺวนวุเต อิโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๑๒. ‘‘เตสตฺตติมฺหิ กปฺปมฺหิ, สตฺต เกสรนามกา [สตปตฺตสนามโก (สี. สฺยา.)];

สตฺตรตนสมฺปนฺนา, จกฺกวตฺตี มหพฺพลา.

๑๓. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา นฬินเกสริโย เถโร อิมา คาถาโย อภาสิตฺถาติ.

นฬินเกสริยตฺเถรสฺสาปทานํ ตติยํ.

๔. วิรวปุปฺผิยตฺเถรอปทานํ

๑๔. ‘‘ขีณาสวสหสฺเสหิ, นิยฺยาติ โลกนายโก;

วิรวปุปฺผมาทาย [วิรวิปุปฺผํ ปคฺคยฺห (สี.)], พุทฺธสฺส อภิโรปยึ.

๑๕. ‘‘เอกนวุติโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๑๖. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา วิรวปุปฺผิโย เถโร อิมา คาถาโย อภาสิตฺถาติ.

วิรวปุปฺผิยตฺเถรสฺสาปทานํ จตุตฺถํ.

๕. กุฏิธูปกตฺเถรอปทานํ

๑๗. ‘‘สิทฺธตฺถสฺส ภควโต, อโหสึ กุฏิโคปโก;

กาเลน กาลํ ธูเปสึ, ปสนฺโน เสหิ ปาณิภิ.

๑๘. ‘‘จตุนฺนวุติโต กปฺเป, ยํ กมฺมมกรึ ตทา;

ทุคฺคตึ นาภิชานามิ, ธูปทานสฺสิทํ [พุทฺธปูชายิทํ (สี.)] ผลํ.

๑๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา กุฏิธูปโก เถโร อิมา คาถาโย อภาสิตฺถาติ.

กุฏิธูปกตฺเถรสฺสาปทานํ ปญฺจมํ.

๖. ปตฺตทายกตฺเถรอปทานํ

๒๐. ‘‘ปรเมน ทมเถน, สิทฺธตฺถสฺส มเหสิโน;

ปตฺตทานํ มยา ทินฺนํ, อุชุภูตสฺส ตาทิโน.

๒๑. ‘‘จตุนฺนวุติโต กปฺเป, ยํ ทานมททึ ตทา;

ทุคฺคตึ นาภิชานามิ, ปตฺตทานสฺสิทํ ผลํ.

๒๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ปตฺตทายโก เถโร อิมา คาถาโย อภาสิตฺถาติ.

ปตฺตทายกตฺเถรสฺสาปทานํ ฉฏฺฐํ.

๗. ธาตุปูชกตฺเถรอปทานํ

๒๓. ‘‘นิพฺพุเต โลกนาถมฺหิ, สิทฺธตฺถมฺหิ นรุตฺตเม;

เอกา ธาตุ มยา ลทฺธา, ทฺวิปทินฺทสฺส ตาทิโน.

๒๔. ‘‘ตาหํ ธาตุํ คเหตฺวาน, พุทฺธสฺสาทิจฺจพนฺธุโน;

ปญฺจวสฺเส ปริจรึ, ติฏฺฐนฺตํว นรุตฺตมํ.

๒๕. ‘‘จตุนฺนวุติโต กปฺเป, ยํ ธาตุํ ปูชยึ ตทา;

ทุคฺคตึ นาภิชานามิ, ธาตุปฏฺฐหเน ผลํ.

๒๖. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ธาตุปูชโก เถโร อิมา คาถาโย อภาสิตฺถาติ.

ธาตุปูชกตฺเถรสฺสาปทานํ สตฺตมํ.

๘. สตฺตลิปุปฺผปูชกตฺเถรอปทานํ

๒๗. ‘‘สตฺต สตฺตลิปุปฺผานิ, สีเส กตฺวานหํ ตทา;

พุทฺธสฺส อภิโรเปสึ, เวสฺสภุมฺหิ นรุตฺตเม [วิภตฺติวิปลฺลาโส จินฺเตตพฺโพ].

๒๘. ‘‘เอกตฺตึเส อิโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๒๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สตฺตลิปุปฺผปูชโก เถโร อิมา คาถาโย อภาสิตฺถาติ.

สตฺตลิปุปฺผปูชกตฺเถรสฺสาปทานํ อฏฺฐมํ.

๙. พิมฺพิชาลิยตฺเถรอปทานํ

๓๐. ‘‘ปทุมุตฺตโร นาม ชิโน, สยมฺภู อคฺคปุคฺคโล;

จตุสจฺจํ ปกาเสติ, ทีเปติ อมตํ ปทํ.

๓๑. ‘‘พิมฺพิชาลกปุปฺผานิ [พิมฺพชาลกปุปฺผานิ (ก.)], ปุถุ กตฺวานหํ ตทา;

พุทฺธสฺส อภิโรเปสึ, ทฺวิปทินฺทสฺส ตาทิโน.

๓๒. ‘‘อฏฺฐสฏฺฐิมฺหิโต กปฺเป, จตุโร กิญฺชเกสรา;

สตฺตรตนสมฺปนฺนา, จกฺกวตฺตี มหพฺพลา.

๓๓. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา พิมฺพิชาลิโย เถโร อิมา คาถาโย อภาสิตฺถาติ.

พิมฺพิชาลิยตฺเถรสฺสาปทานํ นวมํ.

๑๐. อุทฺทาลกทายกตฺเถรอปทานํ

๓๔. ‘‘กกุโธ นาม นาเมน, สยมฺภู อปราชิโต;

ปวนา นิกฺขมิตฺวาน, อนุปฺปตฺโต มหานทึ.

๓๕. ‘‘อุทฺทาลกํ คเหตฺวาน, สยมฺภุสฺส อทาสหํ;

สํยตสฺสุชุภูตสฺส, ปสนฺนมานโส อหํ.

๓๖. ‘‘เอกตฺตึเส อิโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, ปุปฺผทานสฺสิทํ ผลํ.

๓๗. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา อุทฺทาลกทายโก เถโร อิมา คาถาโย อภาสิตฺถาติ.

อุทฺทาลกทายกตฺเถรสฺสาปทานํ ทสมํ.

ตุวรทายกวคฺโค ปญฺจวีสติโม.