๖. ราหุลตฺเถรอปทานํ

๖๘. ‘‘ปทุมุตฺตรสฺส ภควโต, โลกเชฏฺฐสฺส ตาทิโน;

สตฺตภูมมฺหิ ปาสาเท, อาทาสํ สนฺถรึ อหํ.

๖๙. ‘‘ขีณาสวสหสฺเสหิ, ปริกิณฺโณ มหามุนิ;

อุปาคมิ คนฺธกุฏึ, ทฺวิปทินฺโท [ทิปทินฺโท (สี. สฺยา.)] นราสโภ.

๗๐. ‘‘วิโรเจนฺโต [วิโรจยํ (สฺยา.)] คนฺธกุฏึ, เทวเทโว นราสโภ;

ภิกฺขุสงฺเฆ ฐิโต สตฺถา, อิมา คาถา อภาสถ.

๗๑. ‘‘‘เยนายํ โชติตา เสยฺยา, อาทาโสว สุสนฺถโต;

ตมหํ กิตฺตยิสฺสามิ, สุณาถ มม ภาสโต.

๗๒. ‘‘‘โสณฺณมยา รูปิมยา, อโถ เวฬุริยามยา;

นิพฺพตฺติสฺสนฺติ ปาสาทา, เย เกจิ มนโส ปิยา.

๗๓. ‘‘‘จตุสฏฺฐิกฺขตฺตุํ เทวินฺโท, เทวรชฺชํ กริสฺสติ;

สหสฺสกฺขตฺตุํ จกฺกวตฺตี, ภวิสฺสติ อนนฺตรา.

๗๔. ‘‘‘เอกวีสติกปฺปมฺหิ, วิมโล นาม ขตฺติโย;

จาตุรนฺโต วิชิตาวี, จกฺกวตฺตี ภวิสฺสติ.

๗๕. ‘‘‘นครํ เรณุวตี นาม, อิฏฺฐกาหิ สุมาปิตํ;

อายามโต ตีณิ สตํ, จตุรสฺสสมายุตํ.

๗๖. ‘‘‘สุทสฺสโน นาม ปาสาโท, วิสฺสกมฺเมน มาปิโต [วิสุกมฺเมน§มาปิโต (ก.), วิสฺสกมฺเมน นิมฺมิโต (สี.)];

กูฏาคารวรูเปโต, สตฺตรตนภูสิโต.

๗๗. ‘‘‘ทสสทฺทาวิวิตฺตํ ตํ [อวิวิตฺตํ (สี.)], วิชฺชาธรสมากุลํ;

สุทสฺสนํว นครํ, เทวตานํ ภวิสฺสติ.

๗๘. ‘‘‘ปภา นิคฺคจฺฉเต ตสฺส, อุคฺคจฺฉนฺเตว สูริเย;

วิโรเจสฺสติ ตํ นิจฺจํ, สมนฺตา อฏฺฐโยชนํ.

๗๙. ‘‘‘กปฺปสตสหสฺสมฺหิ, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติ.

๘๐. ‘‘‘ตุสิตา โส จวิตฺวาน, สุกฺกมูเลน โจทิโต;

โคตมสฺส ภควโต, อตฺรโช โส ภวิสฺสติ.

๘๑. ‘‘‘สเจ วเสยฺย [สจา’วเสยฺย (?)] อคารํ, จกฺกวตฺตี ภเวยฺย โส;

อฏฺฐานเมตํ ยํ ตาที, อคาเร รติมชฺฌคา.

๘๒. ‘‘‘นิกฺขมิตฺวา อคารมฺหา, ปพฺพชิสฺสติ สุพฺพโต;

ราหุโล นาม นาเมน, อรหา โส ภวิสฺสติ’.

๘๓. ‘‘กิกีว อณฺฑํ รกฺเขยฺย, จามรี วิย วาลธึ;

นิปโก สีลสมฺปนฺโน, มมํ รกฺขิ มหามุนิ [เอวํ รกฺขึ มหามุนิ (สี. ก.), มมํ ทกฺขิ มหามุนิ (สฺยา.)].

๘๔. ‘‘ตสฺสาหํ ธมฺมมญฺญาย, วิหาสึ สาสเน รโต;

สพฺพาสเว ปริญฺญาย, วิหรามิ อนาสโว.

๘๕. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา ราหุโล เถโร อิมา คาถาโย อภาสิตฺถาติ.

ราหุลตฺเถรสฺสาปทานํ ฉฏฺฐํ.