๙. สุกตาเวฬิยตฺเถรอปทานํ

๔๓. ‘‘อสิโต นาม นาเมน, มาลากาโร อหํ [อหุํ (?)] ตทา;

อาเวฬํ ปคฺคเหตฺวาน, รญฺโญ ทาตุํ วชามหํ.

๔๔. ‘‘อสมฺปตฺโตมฺหิ [อสมฺปตฺตมฺหิ (สี.), อสมฺปตฺโตว (?)] ราชานํ, อทฺทสํ สิขินายกํ;

หฏฺโฐ หฏฺเฐน จิตฺเตน, พุทฺธสฺส อภิโรปยึ.

๔๕. ‘‘เอกตฺตึเส อิโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๔๖. ‘‘ปญฺจวีเส อิโต กปฺเป, ราชาโหสึ มหพฺพโล;

เวภาโร นาม นาเมน, จกฺกวตฺตี มหพฺพโล.

๔๗. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สุกตาเวฬิโย เถโร อิมา คาถาโย อภาสิตฺถาติ.

สุกตาเวฬิยตฺเถรสฺสาปทานํ นวมํ.