๖. องฺโกลปุปฺผิยตฺเถรอปทานํ

๒๙. ‘‘นารโท [วรโท (ก.)] อิติ เม นามํ, กสฺสโป อิติ มํ วิทู;

อทฺทสํ สมณานคฺคํ, วิปสฺสึ เทวสกฺกตํ.

๓๐. ‘‘อนุพฺยญฺชนธรํ พุทฺธํ, อาหุตีนํ ปฏิคฺคหํ;

องฺโกลปุปฺผํ [วกุลปุปฺผํ (สฺยา.), พโกลปุปฺผํ (ก.)] ปคฺคยฺห, พุทฺธสฺส อภิโรปยึ.

๓๑. ‘‘เอกนวุติโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๓๒. ‘‘จตุสตฺตติโต กปฺเป, โรมโส นาม ขตฺติโย;

อามุกฺกมาลาภรโณ, สโยคฺคพลวาหโน.

๓๓. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา องฺโกลปุปฺผิโย [วกุลปุปฺผิโย (สฺยา.), พโกลปุปฺผิโย (ก.)] เถโร อิมา คาถาโย อภาสิตฺถาติ.

องฺโกลปุปฺผิยตฺเถรสฺสาปทานํ ฉฏฺฐํ.