๕. สีหาสนทายกตฺเถรอปทานํ

๒๑. ‘‘นิพฺพุเต โลกนาถมฺหิ, ปทุมุตฺตรนายเก;

ปสนฺนจิตฺโต สุมโน, สีหาสนมทาสหํ.

๒๒. ‘‘พหูหิ คนฺธมาเลหิ, ทิฏฺฐธมฺมสุขาวเห;

ตตฺถ ปูชญฺจ กตฺวาน, นิพฺพายติ พหุชฺชโน.

๒๓. ‘‘ปสนฺนจิตฺโต สุมโน, วนฺทิตฺวา โพธิมุตฺตมํ;

กปฺปานํ สตสหสฺสํ, ทุคฺคตึ นุปปชฺชหํ.

๒๔. ‘‘ปนฺนรสสหสฺสมฺหิ, กปฺปานํ อฏฺฐ อาสุ เต [อฏฺฐ อาสยุํ (ก.)];

สิลุจฺจยสนามา จ, ราชาโน จกฺกวตฺติโน.

๒๕. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สีหาสนทายโก เถโร อิมา คาถาโย อภาสิตฺถาติ;

สีหาสนทายกตฺเถรสฺสาปทานํ ปญฺจมํ.