๗. ยูถิกปุปฺผิยตฺเถรอปทานํ

๓๓. ‘‘จนฺทภาคานทีตีเร, อนุโสตํ วชามหํ;

สยมฺภุํ อทฺทสํ ตตฺถ, สาลราชํว ผุลฺลิตํ.

๓๔. ‘‘ปุปฺผํ ยูถิกมาทาย, อุปคจฺฉึ มหามุนึ;

ปสนฺนจิตฺโต สุมโน, พุทฺธสฺส อภิโรปยึ.

๓๕. ‘‘จตุนฺนวุติโต กปฺเป, ยํ ปุปฺผมภิโรปยึ;

ทุคฺคตึ นาภิชานามิ, พุทฺธปูชายิทํ ผลํ.

๓๖. ‘‘สตฺตสฏฺฐิมฺหิโต กปฺเป, เอโก สามุทฺธโร อหุ;

สตฺตรตนสมฺปนฺโน, จกฺกวตฺตี มหพฺพโล.

๓๗. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ยูถิกปุปฺผิโย เถโร อิมา คาถาโย อภาสิตฺถาติ.

ยูถิกปุปฺผิยตฺเถรสฺสาปทานํ สตฺตมํ.