๙. คณฺฐิปุปฺผิยตฺเถรอปทานํ

๙๑. ‘‘สุวณฺณวณฺโณ สมฺพุทฺโธ, วิปสฺสี ทกฺขิณารโห;

ปุรกฺขโต สาวเกหิ, อารามา อภินิกฺขมิ.

๙๒. ‘‘ทิสฺวานหํ พุทฺธเสฏฺฐํ, สพฺพญฺญุํ ตมนาสกํ;

ปสนฺนจิตฺโต สุมโน, คณฺฐิปุปฺผํ [คตมคฺคํ (สฺยา. ก.)] อปูชยึ.

๙๓. ‘‘เตน จิตฺตปฺปสาเทน, ทฺวิปทินฺทสฺส ตาทิโน;

หฏฺโฐ หฏฺเฐน จิตฺเตน, ปุน วนฺทึ ตถาคตํ.

๙๔. ‘‘เอกนวุติโต กปฺเป, ยํ ปุปฺผมภิโรปยึ;

ทุคฺคตึ นาภิชานามิ, พุทฺธปูชายิทํ ผลํ.

๙๕. ‘‘เอกตาลีสิโต กปฺเป, จรโณ นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโล.

๙๖. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา คณฺฐิปุปฺผิโย [คนฺธปุปฺผิโย (สฺยา. ก.)] เถโร อิมา คาถาโย อภาสิตฺถาติ.

คณฺฐิปุปฺผิยตฺเถรสฺสาปทานํ นวมํ.