๒. ปุปฺผถูปิยตฺเถรอปทานํ

๑๐. ‘‘หิมวนฺตสฺสาวิทูเร, กุกฺกุโร นาม [กุกฺกุโฏ นาม (สี.)] ปพฺพโต;

เวมชฺเฌ ตสฺส วสติ, พฺราหฺมโณ มนฺตปารคู.

๑๑. ‘‘ปญฺจ สิสฺสสหสฺสานิ, ปริวาเรนฺติ มํ สทา;

ปุพฺพุฏฺฐายี จ เต อาสุํ, มนฺเตสุ จ วิสารทา.

๑๒. ‘‘พุทฺโธ โลเก สมุปฺปนฺโน, ตํ วิชานาถ โน ภวํ;

อสีติพฺยญฺชนานสฺส, พาตฺตึสวรลกฺขณา.

๑๓. ‘‘พฺยามปฺปโภ ชินวโร, อาทิจฺโจว วิโรจติ;

สิสฺสานํ วจนํ สุตฺวา, พฺราหฺมโณ มนฺตปารคู.

๑๔. ‘‘อสฺสมา อภินิกฺขมฺม, ทิสํ ปุจฺฉติ สิสฺสเก [พฺราหฺมโณ (สฺยา.)];

ยมฺหิ เทเส มหาวีโร, วสติ โลกนายโก.

๑๕. ‘‘ตาหํ ทิสํ นมสฺสิสฺสํ, ชินํ อปฺปฏิปุคฺคลํ;

อุทคฺคจิตฺโต สุมโน, ปูเชสึ ตํ ตถาคตํ.

๑๖. ‘‘เอถ สิสฺสา คมิสฺสาม, ทกฺขิสฺสาม ตถาคตํ;

วนฺทิตฺวา สตฺถุโน ปาเท, โสสฺสาม ชินสาสนํ.

๑๗. ‘‘เอกาหํ อภินิกฺขมฺม, พฺยาธึ ปฏิลภึ อหํ;

พฺยาธินา ปีฬิโต สนฺโต, สาลํ วาสยิตุํ คมึ.

๑๘. ‘‘สพฺเพ สิสฺเส สมาเนตฺวา, อปุจฺฉึ เต ตถาคตํ;

กีทิสํ โลกนาถสฺส, คุณํ ปรมพุทฺธิโน.

๑๙. ‘‘เต เม ปุฏฺฐา วิยากํสุ, ยถา ทสฺสาวิโน ตถา;

สกฺกจฺจํ พุทฺธเสฏฺฐํ ตํ, เทเสสุํ [ทสฺเสสุํ (สี. สฺยา.)] มม สมฺมุขา.

๒๐. ‘‘เตสาหํ วจนํ สุตฺวา, สกํ จิตฺตํ ปสาทยึ;

ปุปฺเผหิ ถูปํ กตฺวาน, ตตฺถ กาลงฺกโต อหํ.

๒๑. ‘‘เต เม สรีรํ ฌาเปตฺวา, อคมุํ พุทฺธสนฺติกํ;

อญฺชลึ ปคฺคเหตฺวาน, สตฺถารมภิวาทยุํ.

๒๒. ‘‘ปุปฺเผหิ ถูปํ กตฺวาน, สุคตสฺส มเหสิโน;

กปฺปานํ สตสหสฺสํ, ทุคฺคตึ นุปปชฺชหํ.

๒๓. ‘‘จตฺตาลีสสหสฺสมฺหิ, กปฺเป โสฬส ขตฺติยา;

นาเมนคฺคิสมา นาม, จกฺกวตฺตี มหพฺพลา.

๒๔. ‘‘วีสกปฺปสหสฺสมฺหิ, ราชาโน จกฺกวตฺติโน;

ฆตาสนสนามาว, อฏฺฐตฺตึส มหีปตี.

๒๕. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ปุปฺผถูปิโย เถโร อิมา คาถาโย อภาสิตฺถาติ.

ปุปฺผถูปิยตฺเถรสฺสาปทานํ ทุติยํ.