๔. เอกาสนิยตฺเถรอปทานํ

๓๑. ‘‘วรุโณ นาม นาเมน, เทวราชา อหํ ตทา;

อุปฏฺฐเหสึ สมฺพุทฺธํ, สโยคฺคพลวาหโน.

๓๒. ‘‘นิพฺพุเต โลกนาถมฺหิ, อตฺถทสฺสีนรุตฺตเม;

ตูริยํ สพฺพมาทาย, อคมํ โพธิมุตฺตมํ.

๓๓. ‘‘วาทิเตน จ นจฺเจน, สมฺมตาฬสมาหิโต;

สมฺมุขา วิย สมฺพุทฺธํ, อุปฏฺฐึ โพธิมุตฺตมํ.

๓๔. ‘‘อุปฏฺฐหิตฺวา ตํ โพธึ, ธรณีรุหปาทปํ;

ปลฺลงฺกํ อาภุชิตฺวาน, ตตฺถ กาลงฺกโต อหํ.

๓๕. ‘‘สกกมฺมาภิรทฺโธหํ, ปสนฺโน โพธิมุตฺตเม;

เตน จิตฺตปฺปสาเทน, นิมฺมานํ อุปปชฺชหํ.

๓๖. ‘‘สฏฺฐิตูริยสหสฺสานิ, ปริวาเรนฺติ มํ สทา;

มนุสฺเสสุ จ เทเวสุ, วตฺตมานํ ภวาภเว.

๓๗. ‘‘ติวิธคฺคี นิพฺพุตา มยฺหํ, ภวา สพฺเพ สมูหตา;

ธาเรมิ อนฺติมํ เทหํ, สมฺมาสมฺพุทฺธสาสเน [อยญฺจ คาถา ปฏิสมฺภิทา จตสฺเสติคาถาย เอกสมฺพนฺธา ภวิตํ ยุตฺตา].

๓๘. ‘‘สุพาหู นาม นาเมน, จตุตฺตึสาสุ ขตฺติยา;

สตฺตรตนสมฺปนฺนา, ปญฺจกปฺปสเต อิโต.

๓๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา เอกาสนิโย เถโร อิมา คาถาโย อภาสิตฺถาติ.

เอกาสนิยตฺเถรสฺสาปทานํ จตุตฺถํ.