๘. อาสนุปฏฺฐาหกตฺเถรอปทานํ

๔๗. ‘‘กานนํ วนโมคยฺห, อปฺปสทฺทํ นิรากุลํ;

สีหาสนํ มยา ทินฺนํ, อตฺถทสฺสิสฺส ตาทิโน.

๔๘. ‘‘มาลาหตฺถํ คเหตฺวาน, กตฺวา จ นํ ปทกฺขิณํ;

สตฺถารํ ปยิรุปาสิตฺวา, ปกฺกามึ อุตฺตรามุโข.

๔๙. ‘‘เตน กมฺเมน ทฺวิปทินฺท, โลกเชฏฺฐ นราสภ;

สนฺนิพฺพาเปมิ [สนฺทิฏฺฐาเปมิ (ก.)] อตฺตานํ, ภวา สพฺเพ สมูหตา.

๕๐. ‘‘อฏฺฐารสกปฺปสเต, ยํ ทานมททึ ตทา;

ทุคฺคตึ นาภิชานามิ, สีหาสนสฺสิทํ ผลํ.

๕๑. ‘‘อิโต สตฺตกปฺปสเต, สนฺนิพฺพาปก [สนฺนิฏฺโฐ นาม (ก.)] ขตฺติโย;

สตฺตรตนสมฺปนฺโน, จกฺกวตฺตี มหพฺพโล.

๕๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา อาสนุปฏฺฐาหโก เถโร อิมา คาถาโย อภาสิตฺถาติ.

อาสนุปฏฺฐาหกตฺเถรสฺสาปทานํ อฏฺฐมํ.